Kasano nga Isuro ti Annak Maipapan iti Dios​—Ania Dagiti Kasayaatan a Pamay-an?

“Dagitoy a sasao nga ibilbilinko kenka ita nga aldaw addadanto ita pusom; ket masapul nga iyukuokmo ida iti anakmo ken sawem ti maipapan kadagita no agtugawka iti balaymo ken no magnaka iti dalan ken no agiddaka ken no bumangonka.”​—DEUTERONOMIO 6:6, 7.

NO DADDUMA, marigatan dagiti nagannak a mangsanay kadagiti annakda. Ngem ad-adda laeng a mariroda iti kaadu ti agsisimparat a balakad. Masansan nga adu ti singasing dagiti kabagian ken gagayyemda. Agduduma met ti balakad dagiti libro, magasin, ken website iti Internet.

Iti sabali a bangir, adda mapagtalkan a balakad ti Biblia no ania ti isuro dagiti nagannak kadagiti annakda ken no kasano ti panangisuroda kadakuada. Kas ipakita dagiti bersikulo ti Biblia a nakotar iti ngato, masapul nga inaldaw nga isuro dagiti nagannak ti annakda maipapan iti Dios. Naibinsabinsa iti baba ti uppat a singasing a naibatay iti Biblia a nakatulong iti adu a nagannak.

1. Usaren dagiti parsua ti Dios. Insurat ni apostol Pablo: “Dagiti di makita a kualidad [ti Dios] ket silalawag a makita manipud pannakaparsua ti lubong ken agpatpatuloy, agsipud ta matarusan ida babaen iti bambanag a naaramid, ti mismo nga agnanayon a pannakabalin ken kina-Diosna.” (Roma 1:20) Adu ti maitulong dagiti nagannak tapno maawatan dagiti annakda a mabalinda ti makigayyem iti Dios. Mabalinda a dakamaten dagiti parsua ti Dios ket tulonganda dagiti annakda a mangtarus kadagiti kualidad ti Dios a masursuro kadagitoy a parsua.

Kasta ti inaramid ni Jesus idi insurona dagiti adalanna. Kas pagarigan kinunana: “Paliiwenyo a sipapasnek dagiti tumatayab iti langit, agsipud ta saanda nga agmula iti bin-i wenno agani wenno agipempen kadagiti kamalig; kaskasdi a ti nailangitan nga Amayo taraonanna ida. Saan kadi a napatpategkayo ngem isuda?” (Mateo 6:26) Impaganetget ni Jesus ditoy ti ayat ken kinamanangngaasi ni Jehova. Ngem saan la a dayta ti inaramidna. Tinulonganna pay dagiti adalanna a mangtarus no kasano nga ipakpakita ti Dios dagitoy a kualidadna kadagiti annakna.

Dinakamat ni Ari Solomon ti nainkasigudan a sirib nga inted ti Dios kadagiti kuton ket inaramatna dagitoy a babassit a parsua a mangipaganetget iti nagpateg a leksion. “Mapanka iti kuton, sika a nasadut,” insuratna, “kitaem ti daldalanna ket agbalinka a masirib. Nupay awanan iti komandante, opisial wenno agturay, isaganana ti taraonna iti mismo a kalgaw; nagurnong kadagiti abastona a taraon iti mismo a panagani.” (Proverbio 6:6-8) Nagsayaat dayta a pamay-an ti panangisuro iti kinapateg ti kaadda ti makagunggona a kalat ken panangusar iti pigsatayo tapno maragpat dagita.

Matulad met dagiti nagannak ti epektibo a panangisuro da Jesus ken Solomon no aramidenda dagitoy: (1) Saludsodenda kadagiti annakda no ania ti magustuanda a mula ken animal. (2) Adalenda a nalaing dagitoy a parsua. (3) Ipakitada no ania dagiti kualidad ti Dios a masursuro dagiti annakda kadagitoy a parsua.

2. Tuladen ti panangtrato ni Jesus kadagiti sinuruanna. Iti amin a tattao a nagbiagen, ni Jesus ti addaan iti kababagasan a kapanunotan. Ngem masansan a nagsalsaludsod. Interesado iti pampanunoten ken rikrikna dagidiay sinuruanna. (Mateo 17:24, 25; Marcos 8:27-29) Kasta met, adu ti napapateg a leksion a maisuro dagiti nagannak kadagiti annakda. Ngem tapno agbalinda nga epektibo, masapul a tuladenda ni Jesus ken gutugotenda dagiti ubbing a mangyebkas iti kapanunotanda.

Ngem kasanon no adda madi a kababalin dagiti ubbing wenno narigatda a maawatan ti napateg a leksion? Usigentayo ti pannakilangen ni Jesus kadagiti apostolna. Agsusupiatda no dadduma ken saanda a maawatan ti pagimbagan ti panagbalin a napakumbaba. Ngem kaskasdi a naanus latta ni Jesus ken maulit-ulit nga inlawlawagna a kasapulan ti kinapakumbaba. (Marcos 9:33, 34; Lucas 9:46-48; 22:24, 25) Dagiti nagannak a mangtultulad ken Jesus siaanus nga aturenda dagiti annakda, ket no kasapulan, ulit-ulitenda ti napateg a leksion agingga a naan-anay a matarusan dayta dagiti ubbing.a

3. Mangisuro babaen iti ulidan. Nasayaat no ipangag dagiti nagannak ti balakad ni apostol Pablo kadagidi Kristiano idiay Roma. Insuratna kadakuada: “Sika a mangisursuro iti asinoman, dika aya isuro ta bagim? Sika, a mangikaskasaba iti ‘Dika agtakaw,’ agtakawka aya?”​— Roma 2:21.

Nasken dayta a balakad ta ad-adda a matignay dagiti annak iti ar-aramiden ngem iti ibagbaga dagiti nagannakda. Iti kinapudnona, dagiti nagannak a mangtungtungpal iti isursuroda ad-adda nga agtungpal kadakuada dagiti annakda.

4. Suruan ti ubing bayat a bassit pay. Ni Timoteo a kadua ni apostol Pablo iti panagmisionerona ket addaan iti nasayaat a reputasion iti lugarda. (Aramid 16:1, 2) Nasursuruan ngamin iti “nasantuan a sursurat” manipud ‘kinamaladagana.’ Saan la a basta imbasa ti ina ken lolana ti Kasuratan no di ket tinulonganda pay ni Timoteo a mangtarus kadagiti kinapudno a linaon dagita a sursurat.​—2 Timoteo 1:5; 3:14, 15.

Pakasarakan iti Tulong

Adu a publikasion ti ipabpablaak dagiti Saksi ni Jehova a makatulong kadagiti nagannak a mangisuro iti annakda kadagiti kinapudno maipapan iti Dios. Adda dagiti publikasion a para kadagiti ubbing. Adda met dagiti literatura a makatulong iti nawaya a panagtungtong dagiti nagannak ken dagiti agtutuboda.b

Siempre, tapno maisuro dagiti nagannak ti annakda maipapan iti Dios, masapul nga ammoda a sungbatan ti sumagmamano a naririgat a saludsod a mabalin nga iyimtuod dagiti annakda. Kas pagarigan, ania ti sungbatmo kadagitoy a saludsod: Apay nga impalubos ti Dios ti panagsagaba? Ania ti panggep ti Dios para iti daga? Sadino ti ayan dagiti natay? Kayat dagiti Saksi ni Jehova ti tumulong kenka a mangammo iti sungbat dagitoy a saludsod ken ti dadduma pay. Iti kasta, makaadanika iti Dios agraman ti pamiliam.​—Santiago 4:8.

[Footnotes]