“Tiempo ti Panagayat ken Tiempo ti Pananggura”

“TI Dios ket ayat.” Iti dadduma a pagilian, dagitoy a sasao ti idispley dagiti tattao iti diding wenno ridaw ti pagtaenganda. Talaga a nagsayaat dagita a sasao a mangiladawan iti Dios​—ti kangrunaan a pagwadan ti ayat.

Ngem saan nga ammo ti adu a tattao a nagtaud dagita a sasao iti Biblia. Kastoy ti insurat ni apostol Juan: “Ti saan nga agayat saanna a naam-ammo ti Dios, agsipud ta ti Dios ket ayat.” (1 Juan 4:8) Insuratna pay maipapan iti ayat ti Dios iti lubong, wenno tattao, a mabalin a masubbot: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”​—Juan 3:16.

Gapuna, ipagarup ti dadduma a kanayon a palabsen ti Dios ti aniaman a dakes a maaramidantayo. Kas ipakita ti panagbiag ti adu a tattao, patienda nga awan sungsungbatanda iti Dios uray ania ti aramidenda. Ngem pudno kadi dayta? Ay-ayaten kadi ti Dios ti amin a tattao, naimbag man wenno dakes? Adda kadi tiempo a gumura ti Dios?

Makarikna ti Dios iti Ayat ken Gura

Kinuna ti masirib nga Ari Solomon: “Ta iti tunggal banag adda naituding a tiempo, ti mismo a tiempo iti tunggal aramid iti baba ti langlangit . . . tiempo ti panagayat ken tiempo ti pananggura.” (Eclesiastes 3:1, 8) Sigun iti daytoy a prinsipio, nupay managayat ken nadungngo ti Dios, adda dagiti gundaway a gumura.

Umuna, ania ti kaipapanan ti “gura” kas naaramat iti Biblia? Kuna ti maysa a reperensia: “Iti Kasuratan, adda nadumaduma a kaipapanan ti sao a ‘gura.’ Mabalin a mangipamatmat iti nakaro a rurod, agtultuloy a sakit ti nakem a napakuyogan iti gandat a mangdangran. Ti kasta a gura ti mabalin a mangiduron iti maysa a tao a mangranggas iti kagurana.” Kasta a kita ti gura ti makitkitatayo iti intero a lubong agraman dagiti epektona. Ngem kuna pay dayta a reperensia: “Ti ‘gura’ mabalin met a kaipapananna ti kasta unay a panangbusor ngem awanan gandat a mangdangran.”

Daytoy a kita ti gura ti mausig iti daytoy nga artikulo. Dayta ti nakaro a pananggura ken kasta unay a pannakarimon​—awanan gandat a mangdangran, mangrurod, wenno mangpasakit. Posible kadi a maaddaan ti Dios iti kastoy a kita ti gura? Kastoy ti kuna ti Proverbio 6:16-19: “Adda innem a banag a guraen ni Jehova; wen, pito ti bambanag a nakarimrimon iti kararuana: napalalo a matmata, ulbod a dila, ken im-ima nga agibukbukbok iti awanan basol a dara, puso a mangparpartuat kadagiti makapasakit a gandat, saksaka nga agdardaras a tumaray nga agturong iti kinadakes, ulbod a saksi nga agyesngaw kadagiti kinaulbod, ken asinoman a mangparnuay kadagiti rinnupir iti nagtetengngaan dagiti agkakabsat.”

Kas naibaga, adda ar-aramid a kagura ti Dios. Nupay kasta, saanna a kagura daydiay tao a nakaaramid kadagita. Ikabilanganna dagiti pagkapuyan, kasasaad ti aglawlaw, pannakapadakkel, ken ti kurang a pannakaammo ti tao. (Genesis 8:21; Roma 5:12) Ti nagsurat iti Proverbio ilawlawagna daytoy babaen iti nagsayaat a pagarigan: “Daydiay ayaten ni Jehova tubngarenna, kas met laeng iti panangtubngar ti maysa nga ama iti anak a pakasarakanna iti ragsak.” (Proverbio 3:12) Mabalin a kagura ti nagannak ti kinasukir ti anakna, ngem kaskasdi nga ay-ayatenna ti anakna ket ikagumaanna a disiplinaen tapno maikkatna ti dakes a kababalinna. Gapu iti ayat ni Jehova, kasta met laeng ti aramidenna no adda pay namnama a mailinteg ti nagbasol a tao.

No Kaano nga Umiso ti Pananggura

Ngem kasanon no naammuan ti maysa a tao ti pagayatan ti Dios ngem dina kayat a tungpalen dayta? Saanna a magun-od ti anamong ti Dios. Guraen ni Jehova ti sipapakinakem a mangaramid iti bambanag a kagurana. Kas pagarigan, kuna ti Biblia: “Ni met laeng Jehova sukimatenna daydiay nalinteg kasta met daydiay nadangkes, ket ti asinoman a mangay-ayat iti kinaranggas pudno unay a guraen ti kararuana.” (Salmo 11:5) Kuna ni apostol Pablo a di mapakawan ti saan nga agbabawi. Inlawlawagna dayta iti suratna kadagiti Hebreo: “Ta no sipapakinakem nga iyugalitayo ti panagbasol kalpasan nga inawattayon ti umiso a pannakaammo iti kinapudno, awanen ti nabati nga aniaman a sakripisio maipaay iti basbasol, no di ket adda nakabutbuteng a panangin-inanama iti pannakaukom ken adda umap-apuy nga imon a mangibus kadagidiay bumusbusor.” (Hebreo 10:26, 27) Apay a kastoy ti aramiden ti naayat a Dios?

No sipapakinakem nga agar-aramid ti maysa a tao iti nakaro a basol, mabalin nga agramut ti kinadakes iti pusona ket saanen a makapagbalbaliw. Posible a dumakdakes pay, mairuam, ken din agbaliw. Iti Biblia, nayarig ti kasta a tao iti maysa a leopardo a dinan mabaliwan dagiti labangna. (Jeremias 13:23) Gapu ta saanen nga agbabawi, nakaaramiden iti aw-awagan ti Biblia nga “agnanayon a basol,” a saanen a pulos mapakawan.​—Marcos 3:29.

Kasta ti napasamak kada Adan ken Eva, kasta met ken Judas Iscariote. Nupay naparsua a perpekto da Adan ken Eva ken nalawag kadakuada ti bilin ti Dios, sipapakinakem ken inggagarada ti nagbasol ket saanda ngarud a mapakawan. Isu a saan nga inawis ida ti Dios nga agbabawi. (Genesis 3:16-24) Iti biang ni Judas, nupay saan a perpekto, kanayon a nakikadkadua iti Anak ti Dios ngem kaskasdi a nagbalin a traidor. Tinukoy ni Jesus daytoy a tao kas “anak ti pannakadadael.” (Juan 17:12) Ipakita met ti Biblia a napeklan a managbasol ti Diablo nga agur-uray laengen a madadael. (1 Juan 3:8; Apocalipsis 12:12) Linak-am dagitoy nga indibidual ti gura ti Dios.

Ngem makapabang-ar a maammuan a mabalin nga aonen dagiti tattao iti panagbasolda. Nakaan-anus ni Jehova ken saan a maragsakan a mangdusa kadagidiay dida inggagara ti nagbasol. (Ezequiel 33:11) Isu nga awisenna ida nga agbabawi tapno mapakawanda. Kastoy ti mabasatayo: “Ti nadangkes a tao panawanna koma ti dalanna, ken ti makadangran a tao ti pampanunotna; ket agsubli koma ken Jehova, a mangngaasinto kenkuana, ken iti Diostayo, ta dakkelto ti pammakawanna.”​—Isaias 55:7.

Umiso a Panangmatmat iti Ayat ken Gura

Kas tumutulad iti Dios, masapul ngarud a matarusan dagiti Kristiano no kaano ti “tiempo ti panagayat” ken ti “tiempo ti pananggura.” Di balanse ti panangmatmat ti maysa mainaig iti ayat ken asi no bay-anna nga agari ti emosionna. Ngem agbalin a balanse ti panangmatmattayo iti panangipakita iti asi ken pananggura iti basol no ikabilangantayo ti sasao ti adalan a ni Judas. Kunana: “Itultuloyyo ti mangipakita iti asi iti sabsabali, nga aramidenyo ti kasta buyogen ti buteng, bayat a kagurayo uray pay ti makin-uneg a kawes a minansaan ti lasag.” (Judas 22, 23) Guraentayo ngarud ti dakes ngem saan a ti tao a nakaaramid iti dayta.

Naibilin met kadagiti Kristiano nga ayatenda dagiti kabusorda babaen ti panagaramidda iti naimbag kadakuada. “Itultuloyyo nga ayaten dagiti kabusoryo ken ikararagan dagidiay mangidaddadanes kadakayo,” kinuna ni Jesus. (Mateo 5:44) Dayta ti makagapu a di agsarday dagiti Saksi ni Jehova a mangikaskasaba iti naimbag a damag ti Pagarian ti Dios, nupay adu ti saan a mangipangag. (Mateo 24:14) Bigbigen dagiti Saksi ti kunaen ti Biblia isu nga ibilangda ti tunggal tao kas posible a magunggonaan iti ayat ken asi ni Jehova. No saan nga apresiaren dagiti tattao ti panagregget dagiti Saksi wenno saanda nga awaten ti mensaheda wenno idadanesda pay ketdi ida, suroten dagiti Saksi ti balakad ni apostol Pablo: “Itultuloyyo a bendisionan dagidiay mangidadanes; mangbendisionkayo ket dikay agilunod . . . Dikay subadan ti dakes iti dakes iti asinoman.” (Roma 12:14, 17) Sipapanunotda a ni Jehova ti mangikeddeng no siasino ti ayatenna ken no siasino ti guraenna. Isu ti mangikeddeng no siasino ti maikari nga agbiag wenno matay.​—Hebreo 10:30.

Wen, “ti Dios ket ayat.” Apresiarentayo koma ngarud ti ayatna ken pagreggetantayo nga ammuen ken annuroten ti pagayatanna. Kiddawem kadagiti Saksi ni Jehova iti lugaryo a tulongandaka a mangadal iti Bibliam no ania ti pagayatan ti Dios ken no kasano a maannurotmo dayta. No kasta ti aramidem, saannakanto a guraen ti Dios no di ket ayatennaka.

[Blurb iti panid 23]

“Adda innem a banag a guraen ni Jehova; wen, pito ti bambanag a nakarimrimon iti kararuana: napalalo a matmata, ulbod a dila, ken im-ima nga agibukbukbok iti awanan basol a dara, puso a mangparpartuat kadagiti makapasakit a gandat, saksaka nga agdardaras a tumaray nga agturong iti kinadakes, ulbod a saksi nga agyesngaw kadagiti kinaulbod, ken asinoman a mangparnuay kadagiti rinnupir iti nagtetengngaan dagiti agkakabsat.”​—PROVERBIO 6: 16-19

[Blurb iti panid 24]

“No sipapakinakem nga iyugalitayo ti panagbasol kalpasan nga inawattayon ti umiso a pannakaammo iti kinapudno, awanen ti nabati nga aniaman a sakripisio maipaay iti basbasol, no di ket adda nakabutbuteng a panangin-inanama iti pannakaukom.”​—HEBREO 10:26, 27

[Blurb iti panid 25]

“Ti nadangkes a tao panawanna koma ti dalanna, ken ti makadangran a tao ti pampanunotna; ket agsubli koma ken Jehova, a mangngaasinto kenkuana . . . dakkelto ti pammakawanna.”​—ISAIAS 55:7

[Ladawan iti panid 24]

Disiplinaen ti naayat a nagannak ti anakna tapno matulonganna

[Ladawan iti panid 25]

Adu a balud ti nagunggonaan iti ayat ken asi ti Dios