Maikadua a Saludsod: Ania ti Mapasamak no Matayak?

UBING pay ni Roman idi matay ti nasinged a gayyemna. “Naldaanganak unay iti ipapatay ti gayyemko,” kinunana. “Uray adun a tawen ti napalabas, pampanunotek pay laeng no ania ti mapasamak no mataytayo.”

Apay a normal laeng nga isaludsod dayta?

Saan a nairanta a matay ti tao. Aniaman ti edadtayo, ditay kayat ti matay. Adu ti mabuteng no ania ti mapasamak kadakuada kalpasan ti ipapatay.

Ania ti kuna ti dadduma?

Adu ti mamati a no matay ti tao adda kano sumina iti bagi nga agtultuloy nga agbiag. Patienda a mapan idiay langit dagiti naimbag a tattao, idinto ta dagiti dakes madusada nga agnanayon. Patien met ti dadduma a no matay ti maysa a tao, isu ket awanen ken naan-anay a nalipatanen.

Ania ti ipakita dagiti sungbatda?

Ipakita ti umuna a sungbat a no matay ti tao, saan kano a talaga a natay. Ipakita met ti maikadua nga awan kano ti panggep ti biag ta kastoy ti prinsipioda: “Mangan ken uminumtayo, ta inton bigat mataytayo.”—1 Corinto 15:32.

Ania ti isursuro ti Biblia?

Saan nga isursuro ti Biblia nga adda sumina iti bagi nga agtultuloy nga agbiag. Ti Dios pinaltiinganna ni Ari Solomon a mangisurat: “Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman.” (Eclesiastes 9:5) Dagidiay ‘saan a pulos sipapanunot iti aniaman,’ dida ammo ti mapaspasamak iti aglawlawda. Awan ti marikna ken maaramidanda. Isu a dida matulongan wenno madangran dagiti sibibiag.

Maisupadi iti patpatien ti adu, saan a pinanggep ti Dios a matay ti tao. Pinarsuana ti immuna a tao a ni Adan nga addaan namnama nga agbiag nga agnanayon iti daga. Dinakamat laeng ti Dios ti ipapatay idi imbagana ken Adan ti dusa no isu ket agsukir. Imparitna a mangan ni Adan iti bunga ti maysa a kayo ken pinakdaaranna a no mangan iti dayta, ‘matay a di bumurong.’ (Genesis 2:17) No nagtulnog da Adan ken Eva, nagbiagda koma nga agnanayon ditoy daga agraman dagiti annakda a natulnog iti Dios.

Simmukir ni Adan iti pakdaar ti Dios isu a nagbasol ket natay. (Roma 6:23) Awan ti simmina iti bagi ni Adan a nagtultuloy a sibibiag. Imbes ketdi, idi natay ni Adan, awanen. Kinuna ti Dios ken Adan: “Iti ling-et ta rupam mangankanto iti tinapay agingga nga agsublika iti daga, ta dayta ti nakaalaam. Ta tapokka ket iti tapok agsublikanto.” (Genesis 3:19) Gapu ta nagtaud ti amin a tao ken Adan, natawidtayo ti basol ken ipapatay.—Roma 5:12.

Nupay pinili ni Adan ti agsukir, tungpalento latta ti Dios ti panggepna a mangpunno iti daga kadagiti perpekto nga annak ni Adan. (Genesis 1:28; Isaias 55:11) Din agbayag, pagungarento ni Jehova ti kaaduan kadagiti natay. Kinuna ni apostol Pablo maipapan iti dayta a tiempo: “Addanto panagungar agpadpada dagiti nalinteg ken dagiti nakillo.”—Aramid 24:15.

Ni Roman a nadakamat itay ket nagadal iti Biblia. Nagdakkel ti naitulong kenkuana ti naadalna maipapan ken Jehova a Dios ken maipapan iti ipapatay. Basaem ti salaysayna iti artikulo a “Ti Biblia Balbaliwanna ti Biag.”

Para iti ad-adu pay nga impormasion maipapan iti ipapatay, kitaem ti kapitulo 6 ti libro nga Ania a Talaga ti Isursuro ti Biblia? Mabalin nga i-download iti www.jw.org/ilo

Ania ti Kinuna ni Jesus Maipapan iti Ipapatay?

Kinontra ni Jesus dagiti lider ti relihion idi kaaldawanna a mangibagbaga nga awan ti panagungar. (Lucas 20:27) Saanna met nga insuro nga adda sumina iti bagi ti tao nga agtultuloy a sibibiag. Imbes ketdi, dagitoy ti insurona.

Ti natay ket nayarig iti matmaturog. Idi natay ti gayyemna a ni Lazaro, kinuna ni Jesus: “Ni Lazaro a gayyemtayo napan naginana, ngem agbaniagaak sadiay tapno riingek manipud pannaturogna.” Saan a natarusan dagiti adalan ni Jesus ti kayatna a sawen. Kinunada: “Apo, no isu napan naginana, umimbagto.” Inlawlawag ti Biblia: “Nupay kasta, nagsao ni Jesus maipapan ti ipapatayna. Ngem impagarupda a nagsasao maipapan ti panaginana iti pannaturog. Ngarud, sipaprangka a kinuna kadakuada ni Jesus: ‘Ni Lazaro natayen.’”—Juan 11:11-14.

Agungarto dagiti natay. Idi dimteng ni Jesus iti ili ni Lazaro, liniwliwana ti kabsat ni Lazaro a ni Marta, a kunkunana: “Bumangonto ni kabsatmo.” Kalpasanna, imbaga ni Jesus ti makaliwliwa a kari: “Siak ti panagungar ken ti biag. Ti mangwatwat iti pammati kaniak, uray no matay, agbiagto.” Sigurado a matungpal dayta a kari ni Jesus. Iti imatang ti adu a tattao, pinagungar ni Jesus ni Lazaro, nupay uppat nga aldawen a natay.—Juan 11:23, 25, 38-45.

Iti sirmata a naited ken apostol Juan, inkari manen ni Jesus a mapagungarto dagiti natay. Imbagana nga addanto tiempo a mawayawayaan amin nga inadipen ni patay.—Apocalipsis 20:13.