“Isu ti Dios . . . Dagiti Sibibiag”

Nabilbileg kadi ni patay ngem iti Dios? Siempre, saan! Kasano koma a ni patay​—wenno aniaman a “kabusor”​—nabilbileg ngem iti “Dios a Mannakabalin-amin”? (1 Corinto 15:26; Exodo 6:3) Kabaelan ti Dios a pukawen ni patay babaen ti panagungar, ken inkarina nga aramiden dayta iti baro a lubong.a Apay a sigurado dayta a kari? Ngamin ti Anak ti Dios a ni Jesus impanamnamana dayta.​—Basaem ti Mateo 22:31, 32.

Kinuna ni Jesus kadagiti Saduceo a di mamati iti panagungar: “No maipapan iti panagungar dagiti natay, saanyo aya a nabasa ti sinao kadakayo ti Dios, a kunkunana, ‘Siak ti Dios ni Abraham ken ti Dios ni Isaac ken ti Dios ni Jacob’? Isu ti Dios, saan a dagiti natay, no di ket dagiti sibibiag.” Tinukoy ditoy ni Jesus ti pannakisarita ti Dios ken Moises iti sanguanan ti sumsumged a bassit a kayo idi agarup 1514 B.C.E. (Exodo 3:1-6) Sigun ken Jesus, ti kinuna ni Jehova ken Moises a​—“Siak ti Dios ni Abraham ken ti Dios ni Isaac ken ti Dios ni Jacob”​—ipakitana a sigurado a matungpal ti kari a panagungar. Kasano?

Ammuentayo nga umuna ti konteksto. Idi nakisarita ni Jehova ken Moises, nabayagen a natay dagiti patriarka a da Abraham, Isaac, ken Jacob. Napalabasen ti 329 a tawen a natay ni Abraham, 224 a tawenen a natay ni Isaac, ken 197 a tawenen a natay ni Jacob. Ngem kinuna ni Jehova, “Siak” ti Diosda saan ket a “Siak idi” ti Diosda. Dinakamat ni Jehova dagitoy tallo a natayen a patriarka a kas man la sibibiagda pay laeng. Apay?

Inlawlawag ni Jesus: “Isu [ni Jehova] ti Dios, saan a dagiti natay, no di ket dagiti sibibiag.” Panunotem biit ti kaipapanan dagita a sasao. No awan ti panagungar, agtalinaed ngarud a natay iti agnanayon da Abraham, Isaac, ken Jacob. No awan ti panagungar, ni Jehova ti Dios dagiti natay. Ngarud no pudno dayta, nabilbileg ni patay ngem ni Jehova a kas man la nakapuy unay a mangwayawaya kadagiti matalek nga adipenna manipud ken patay.

Ania ngarud ti makunatayo maipapan kada Abraham, Isaac, Jacob, ken amin a natayen a matalek nga adipen ni Jehova? Imbaga ni Jesus daytoy makaguyugoy a sasao: “Sibibiagda amin kenkuana.” (Lucas 20:38) Kinapudnona, sigurado a matungpal ti panggep ni Jehova a mangpagungar kadagiti natayen a matalek nga adipenna ta imbagana a kas man la sibibiagda. (Roma 4:16, 17) Adda iti perpekto a memoria ni Jehova ti amin a matalek nga adipenna a natay agingga iti tiempo a pagungarenna ida.

Maragsakanka kadi iti namnama a makaduamto manen dagiti pimmusayen nga ipatpategmo? No kasta, laglagipem nga awan a pulos ti gaway ni patay no idilig iti pannakabalin ni Jehova. Awan ti makalapped kenkuana a mangtungpal iti karina a mangpagungar kadagiti natay. Kayatmo kadi a maammuan ti ad-adu pay maipapan iti panagungar nga inkari ti Dios ken no kasanona nga aramiden dayta? No aramidem dayta, sigurado a sumingedka ken Jehova, “ti Dios . . . dagiti sibibiag.”