Tulongan Dagiti Diborsiado a Kapammatian—Kasano?

Maysa a babai a mangliwliwa iti diborsiada a kabsat

Nalabit adda am-ammom a diborsiado. Gagangay ngamin itan ti diborsio. Kas pagarigan, ipakita ti maysa a surbey iti Poland a kaaduan nga agdibdiborsio ket dagiti agedad iti 30 a naasawaanen iti tallo agingga’t innem a tawen; ngem saan laeng nga isuda ti agdibdiborsio.

Iti kinapudnona, inreport ti Institute for Family Policy iti Espania nga “ipakita dagiti estadistika [iti Europa] a kagudua kadagidiay nagkasar ti agdiborsio.” Kasta met laeng ti kasasaad iti dadduma pay a narang-ay a pagilian.

AGTUTUPATOP A RIKRIKNA

Ania ti karaman iti daytoy a gagangayen a situasion? Kuna ti maysa nga eksperto a marriage counselor iti Makindaya a Europa: “Ti panagdiborsio ket legalidad laeng iti nalpasen a napasamak—ti pannakawaswas ti maysa a relasion ken ti ibungana a panagsina, maysa a nakasasaem a pasamak.” Innayonna a masansan a mangibunga dayta iti “nakaro nga emosion, kas iti pungtot, babawi, pannakapaay, pannakadismaya, ken bain.” No dadduma, mapanunot payen ti maysa ti agpakamatay. “No indeklaran ti korte a pinal ti diborsio, mangrugin ti agtutupatop a rikrikna. Mabalin a maisaludsod ti naliday a diborsiado: ‘Siasinoak itan ta maysaak metten a diborsiado? Ania itan ti aramidek iti biagko?’”

Malagip ni Ewa ti rikriknana sumagmamanon a tawen ti napalabas. Kinunana: “Idi nagbalinen a pinal ti pannakidiborsiok, mababainak unay ta aw-awagandak iti ‘diborsiada’ dagiti kaarrubak ken katrabahuak. Napalalo ti pungtotko. Gapu ta nabati kaniak ti dua a babassit nga annakmi, kapilitan a siak ti ina ken ama.”a Kastoy ti kuna ni Adam a 12 a tawenen a mararaem kas panglakayen: “Gistay awanen ti nabati a panagraemko iti bagik, isu a no dadduma agpupungtotak ken kayatko ti agmaymaysa.”

PANANGILIWLIWAG ITI NAPASAMAK

Gapu ta madandanaganda unay iti masanguananda, adda dagidiay marigatan a mangiliwliwag iti pannakidiborsioda—uray adun a tawtawen ti napalabas. Mabalin nga ipapanda nga awanen ti maseknan kadakuada. Malaksid iti dayta, kuna ti maysa a kolumnista a kasapulan a “baliwanda ti nakayugalianda ket sursuruenda ti agmaymaysa a mangsango kadagiti problemada.”

Kuna ni Stanisław: “Idi nagdiborsiokami ken baketko, pinaritannak a sumarungkar iti dua a babbalasitangmi. Isu a nariknak a kasla awanen ti mangipatpateg kaniak ken binaybay-annakon ni Jehova. Napukawen ti ganasko nga agbiag. Idi agangay, nabigbigko a di umiso ti pampanunotek.” Nadanagan met ni Wanda, a maysa a diborsiada, maipapan iti masakbayanna. Kinunana: “Ipagarupko idi nga awanton ti maseknan kaniak ken kadagiti annakko, uray pay dagiti kapammatiak. Ngem makitak itan no kasano a simmaranay ken timmulong dagiti kakabsat bayat a padpadakkelek dagiti annakko nga agbalinto met a managdaydayaw ken Jehova.”

Ipakita dagitoy a komento a kalpasan ti diborsio, agtutupatop ti negatibo a rikrikna ti dadduma a diborsiado. Mabalin a bumaba ti panangmatmatda iti bagida, ken mariknada a saandan a maikari a maipaayan iti atension. Posible met nga agbalinda a manangkritikar iti sabsabali. Kas resultana, mabalin nga ipagarupda a saanen a maseknan kadakuada ti kongregasion. Ngem kas ipakita ti kapadasan da Stanisław ken Wanda, mapaneknekan dagiti diborsiado a talaga a maseknan kadakuada dagiti kakabsat. Kinapudnona, dakkel ti maitultulong dagiti padada a Kristiano, uray no saan a dagus a madlaw dayta.

PANNAKARIKNA ITI LIDAY KEN PANNAKABAYBAY-A

Laglagipentayo nga iti laksid dagiti panagreggettayo, umapay latta ti liday kadagiti kapammatiantayo a diborsiado. Dagiti diborsiado a kakabsat a babbai, kangrunaanna, mabalin a mariknada a manmano laengen ti maseknan kadakuada. Inadmitir ni Alicja: “Walo a tawenen a diborsiadaak. Ngem mariknak pay laeng no dadduma nga awan serserbik, isu a kaykayatko no kua ti agmaymaysa ken agsangit gapu ta ay-ay-ayek ti bagik.”

Nupay gagangay laeng dagitoy a rikrikna ti maysa a diborsiado, ibalakad ti Biblia a dina koma isinsina ti bagina. Mabalin ngamin nga agresulta dayta iti panangilaksidna iti “isuamin a praktikal a kinasirib.” (Prov. 18:1) Nupay kasta, no maladladingitan, nainsiriban no liklikanna ti kanayon nga umasideg wenno agpabalakad iti maysa a saanna a kasekso. Iti kasta, maliklikan ti itatanor ti di umiso a romantiko a rikrikna.

Mabalin nga agtutupatop ti rikrikna dagiti diborsiado a kapammatiantayo, nga ipagarupda a nabaybay-andan ken madanaganda iti masakbayanda. Maawatantay koma a gagangay ken narigat nga iliwliwag dagita a rikrikna, ket masapul a tuladentayo ni Jehova babaen ti agtultuloy a panangsuportatayo kadakuada. (Sal. 55:22; 1 Ped. 5:6, 7) Masiguradotayo a tagipatgenda ti aniaman a tulong nga ipaaytayo kas pudno a gagayyem!—Prov. 17:17; 18:24.

a Nabaliwan ti dadduma a nagan.

Balanse a Panangmatmat iti Diborsio

Para kadagiti adipen ni Jehova, serioso a banag ti panagasawa. Dayta a panangmatmattayo ket naibatay iti Kasuratan. Kas pagarigan, silalawag a kuna ti Malakias 2:16 maipapan iti Dios: “Ginurana ti panagdiborsio.” Ti kakaisuna a Nainkasuratan a pakaibatayan ti diborsio ket no nakaaramid ti asawa iti seksual nga immoralidad. Isu a maysa a dakkel a kamali no pampanunoten ti maysa ti makidiborsio gapu iti di nainkasuratan a rason, nalabit tapno laeng makiasawa iti sabali.—Gen. 2:22-24; Deut. 5:21; Mat. 19:4-6, 9.

Ngem no mapasamak ti diborsio, kas no napaneknekan a nakikamalala ti asawa ti maysa a Kristiano, sumaranay dagiti kakabsat iti kongregasion. Kas panangtuladda ken Jehova, ar-aramidenda ti amin a kabaelanda a tumulong kadagiti nalinteg a “nadunor ti pusoda.”—Sal. 34:15, 18; Isa. 41:10.

KASANOKA A MAKATULONG?

Mabalinmo kadi ti sumuporta? Ania ti mabalinmo nga aramiden tapno matulongam ti maysa nga agpaspasar kadagiti rikrikna a nadakamat iti daytoy nga artikulo? Usigem ti kuna ti Biblia ken ammuem no kasano a nangipaay iti praktikal a tulong ti dadduma a nasungdo a Kristiano.

Agimdengka a naimbag. (Prov. 16:20, 23)

Kalpasan ti diborsio, amangan no saan a kayat ti maysa a pagsaritaan dagiti detalye no apay a nagdiborsioda iti asawana. Kinapudnona, ti panangipeksa ti maysa iti sakit ti nakemna ket mabalin a saan a makatulong tapno maksayan ti pakariribukanna. (Prov. 12:25; Roma 12:15) Ni Michał, a timmulong ken Adam a nadakamat itay, ket mamati met a saan a kasapulan a maammuam ti amin a detalye tapno agbalinka a mannakaawat ken mannakipagrikna. Kinunana: “Inlawlawagko ken Adam nga iti kanito a dina masbaalan dagiti negatibo a rikriknana, normal laeng a makaisawang iti banag a pagbabawyanna inton agangay.” Isu nga imbaga ni Michał a saanna a padpadasen nga ammuen ti amin a detalye. Ngem sisasagana a dumngeg kas maysa a pudno a gayyem. Mabalin a dakkel ti maitulongtayo iti maysa a kabsat a diborsiado sakbay wenno kalpasan ti gimong babaen ti panangibagatayo iti: “Komusta? Ammok a narigat ti kasasaadmo. Addaak la ditoy no kasapulam ti tulong.”

Ipakitam a maseknanka. (Fil. 2:4)

Malagip ni Mirosław: “Inyeskediulmi ken baketko ti tumulong iti maysa a diborsiado a kabsat a babai. Kas pagarigan, tinarimaanmi ti lock ti ridawna. Inusarmi met ti luganmi a nangipan kenkuana iti doktor.” Kasla simple laeng dagita a bambanag, ngem praktikal ken dakkel ti maitulongda. Gapu iti dayta, in-inut a nadaeran ti kabsat a babai ti kasasaadna. Nagpayunir pay ketdi idi agangay, ken nagpabautisar ti balasangna nga agtawen iti 11.

Ipanamnamam iti diborsiado a maawatan ni Jehova ti situasionna.

No ipagarup ti maysa nga awanen patpategna, mabalin nga ipasiguradom kenkuana nga ipatpateg ti Dios ti tunggal adipenna. Iti panangmatmat ti Dios, tunggal maysa kadatayo ket naidumduma ken ‘napatpateg ngem iti adu a billit-tuleng.’ (Mat. 10:29-31) “Ni Jehova isu ti manangsukimat kadagiti puso” ket maawatanna ngarud ti kasasaad dagiti diborsiado. Saanna a baybay-an ti asinoman a matalek nga adipenna. (Prov. 17:3; Sal. 145:18; Heb. 13:5) Isu a bayat a tultulongam ti maysa a diborsiado, ipasiguradom kenkuana a napateg iti Dios ti panagayatna iti kinapudno ken ti panagreggetna a mangsuporta iti pudno a panagdayaw.—Fil. 2:29.

Paregtaem ti diborsiado nga agtalinaed a nasinged iti kongregasion.

No malapunos ti maysa iti negatibo a rikrikna, mabalin a marigatan nga umatender kadagiti gimong. Ngem dagitoy a gimong ti mangpapigsa ken mangparegta kenkuana —agpaay a ‘pakapabilganna.’ (1 Cor. 14:26; Sal. 122:1) Dakkel ti maitulong dagiti panglakayen iti daytoy a banag. Kuna ni Wanda, a nadakamat itay, “Malaglagipmi pay laeng ti pannakaseknan ken panagayatda.”

Paregtaem ti diborsiado a pabilgenna ti relasionna iti Dios babaen ti panagkararag, personal a panagadal, ken panagmennamennana. (Sant. 4:8)

Nupay mannakabalin-amin ni Jehova ken adda idiay langit, ipapaayanna iti atension “daydiay naparigatan ken sibababawi ti espirituna.” Ipalagipmo dayta iti diborsiado, ken ipaganetgetmo a makatulong kadatayo ti panagbalin a nasinged iti Dios babaen ti panagkararag ken personal a panagadal.—Isa. 66:2.

Awisem nga agkaduakayo iti ministerio wenno iti panagsagana para iti gimong.

Makatulong daytoy iti maysa a diborsiado a Kristiano tapno nabilbileg ti kompiansana bayat ti panangdaerna iti situasionna. Kuna ni Marta, a timmulong iti maysa a naregta a kabsat a babai a napalalo ti ladingitna kalpasan a nakidiborsio: “Regularkami nga agkadua iti ministerio. Nakaragragsakkami no maragpatmi dagiti kalatmi. No dadduma, agkaduakami nga agadal para iti gimong, ket kalpasanna mangisaganakami iti naimas a taraon.”