Ipapatay ken Panagungar ni Jesus​—No Apay a Napategda Kenka

Saan a naparsua ti tao tapno matay

“Ni Jehova a Dios innalana ti tao ket insaadna iti minuyongan ti Eden tapno talonenna dayta ken tapno aywananna. Ket ni Jehova a Dios impasdekna met daytoy a bilin iti tao: ‘Manipud iti tunggal kayo iti minuyongan mabalinmo ti agpennek a mangan. Ngem no maipapan iti kayo ti pannakaammo iti naimbag ken dakes dika mangan manipud iti dayta, ta iti aldaw a manganka manipud iti dayta mataykanto a di bumurong.’”​—Genesis 2:15-17.

Pinagnaed ti Dios ti umuna a tao a ni Adan iti hardin ti Eden, maysa a paraiso a daga a napno iti an-animal ken napipintas a mulmula. Mabalinna ti mangan kadagiti bunga ti kaykayo nga adda sadiay. Ngem silalawag nga imbilin ni Jehova a Dios ken Adan a saan a mangan iti bunga ti maysa a kayo. Matay no mangan iti dayta.

Naawatan ngata ni Adan dayta a bilin? Ammona no ania ti ipapatay; nakitana a matmatay dagiti animal. No naparsua ni Adan sa matay inton agangay, awan serserbi ti pakdaar ti Dios. Ammo ni Adan a no agtulnog iti Dios ken saan a mangan manipud iti kayo, mabalinna ti agbiag nga agnanayon​—saan a matay.

Patien ti dadduma a ti kayo isimbolona ti seksual a relasion, ngem saan a pudno dayta. Kayat ni Jehova nga ‘agbunga ken agadu’ da Adan ken Eva ken ‘punnuenda ti daga ken parukmaenda’ dayta. (Genesis 1:28) Literal a kayo ti maiparparit. Inawagan dayta ni Jehova iti “kayo ti pannakaammo iti naimbag ken dakes” gapu ta irepresentarna ti kalintegan ti Dios a mangikeddeng no ania ti naimbag ken dakes para kadagiti tattao. Ti saan a pannangan ni Adan iti bunga dayta a kayo ket panagtulnog ken panangapresiar pay iti Daydiay nangparsua ken nangipaay kenkuana iti adu a bendision.

Natay ni Adan gapu ta nagsukir iti Dios

“[Kinuna ti Dios] ken Adan: ‘Agsipud ta . . . nanganka manipud iti kayo a maipapan iti dayta intedko kenka daytoy a bilin, . . . iti ling-et ta rupam mangankanto iti tinapay agingga nga agsublika iti daga, ta dayta ti nakaalaam. Ta tapokka ket iti tapok agsublikanto.’”​—Genesis 3:17, 19.

Nangan ni Adan manipud iti maiparparit a kayo. Saan a rumbeng a tagtagilag-anen dayta a panagsukir. Maysa dayta a panagrebelde, nabatad a panangilaksid kadagiti amin a naimbag nga inaramid ni Jehova para kenkuana. Idi nangan ni Adan iti bunga, inlaksidna ni Jehova. Pinilina ti agbiag a naisina iti Dios, a nangyeg kadagiti makadadael a resulta.

Idi agangay, natay ni Adan kas impakpakauna ni Jehova. Inaramid ti Dios ni Adan “manipud tapok a naggapu iti daga” ken imbagana nga ‘agsubli iti daga.’ Saan a nagbiag ni Adan iti sabali a kita ti biag wenno iti sabali a lubong. Idi natay, awanen ti biagna a kas iti tapok a nakaalaanna.​—Genesis 2:7; Eclesiastes 9:5, 10.

Mataytayo gapu ta naggaputayo ken Adan

“Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.”​—Roma 5:12.

Nasaknap ti epekto ti panagsukir​—wenno basol​—ni Adan. Napukawna saan laeng a ti gagangay a 70 wenno 80 a tawen, no di ket ti namnama nga agbiag nga agnanayon. Napukawna pay ti perpekto a biag isu a kinaimperpekto laengen ti maipatawidna kadagiti kaputotanna.

Naggaputayo amin ken Adan. Uray ditay kayat, natawidtayo ti imperpekto a bagi nga agbasol ken matay inton agangay. Kastoy ti panangdeskribir ni Pablo iti kasasaadtayo: “Nainlasaganak, a nailako iti sidong ti basol. Nakaay-ay-ayak a tao! Siasinonto ti mangalaw kaniak iti bagi nga agpaspasar itoy nga ipapatay?” Sinungbatanna met laeng ti saludsodna: “Pagyamanan iti Dios baeten ken Jesu-Kristo nga Apotayo!”​—Roma 7:14, 24, 25.

Inted ni Jesus ti biagna tapno mabalintayo ti agbiag nga agnanayon

“Ti Ama imbaonna ti Anakna kas Manangisalakan iti lubong.”​—1 Juan 4:14.

Nangyurnos ni Jehova a Dios iti pamay-an tapno maikkat dagiti epekto ti basol ken mawayawayaantayo iti dusa nga agnanayon nga ipapatay. Kasano? Imbaonna ditoy daga ti patpatgenna nga Anak tapno maipasngay kas perpekto a tao a kas ken Adan. Ngem maisupadi ken Adan, “saan a nakaaramid [ni Jesus] iti basol.” (1 Pedro 2:22) Gapu ta perpekto, saan a karaman iti dusa nga ipapatay ken mabalinna koma ti agbiag nga agnanayon kas perpekto a tao.

Nupay kasta, impalubos ni Jehova a ni Jesus ket papatayen dagiti kabusorna. Kalpasan ti tallo nga aldaw, pinagungar ni Jehova kas espiritu tapno makasubli idiay langit. Sadiay nga indatag ni Jesus iti Dios ti pateg ti perpekto a biagna kas tao tapno masubbot ti napukaw ni Adan para kenkuana ken kadagiti kaputotanna. Inawat ni Jehova dayta a daton, isu a posible a maaddaan iti agnanayon a biag dagidiay mangipakpakita iti pammati ken Jesus.​—Roma 3:23, 24; 1 Juan 2:2.

Naisubli ni Jesus ti napukaw ni Adan. Natay tapno mabalintayo ti agbiag nga agnanayon. Kuna ti Biblia: “Ni Jesus . . . [nagsagaba] iti ipapatay, tapno ramananna ni patay maipaay iti tunggal tao babaen ti di kaikarian a kinamanangngaasi ti Dios.”​—Hebreo 2:9.

Adu ti maammuantayo maipapan ken Jehova iti daytoy a probision. Gapu ta nangato ti pagalagadanna iti kinahustisia, imposible a masubbot dagiti imperpekto a tattao ti bagbagida. Ngem ti ayat ken asina ti mangtignay kenkuana a mangannurot iti bukodna a pagalagadan uray no nagdakkel ti isakripisiona​—ipaayna ti mismo nga Anakna kas subbot.​—Roma 5:6-8.

Napagungar ni Jesus, ken mapagungarto pay ti sabsabali

“Ni Kristo naibangonen manipud kadagiti natay, ti umuna a bungbunga kadagidiay naturog ken patay. Ta yantangay ti ipapatay ket gapu iti maysa a tao, ti panagungar dagiti natay ket gapu met iti maysa a tao. Ta no kasano a ken Adan matmatay ti amin, kasta met nga iti Kristo mapagbiagto ti amin.”​—1 Corinto 15:20-22.

Sigurado a nagbiag ken natay ni Jesus, ngem ania ti pammaneknek a napagungar? Ti maysa kadagiti kabilgan a pammaneknek ket ti panagparangna iti adu a tattao iti nagduduma nga okasion ken lugar kalpasan a napagungar. Naminsan, nagpakita iti nasurok a 500 a tattao. Insurat dayta ni apostol Pablo kadagiti taga-Corinto, nga imbagana a sibibiag pay idi ti dadduma kadagiti nakakita ken Jesus, isu a mabalinda a saksian ti nakita ken nangngegda.​—1 Corinto 15:3-8.

Makapainteres ta idi insurat ni Pablo a ni Kristo ti “umuna a bungbunga” kadagidiay mapagungar, impamatmatna nga addanto pay sumaruno a mapagungar. Imbaga ni Jesus a dumtengto ti tiempo nga “amin dagidiay adda kadagiti pakalaglagipan a tanem . . . rummuarda.”​—Juan 5:28, 29.

Masapul a mangipakitatayo iti pammati ken Jesus tapno agbiagtayo nga agnanayon

“Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”​—Juan 3:16.

Salaysayen ti umuna a libro ti Biblia no kasano a dimteng ti ipapatay ken napukaw ti Paraiso. Salaysayen met ti maudi a libro no kasano a mapukaw ti ipapatay ken isubli ti Dios ti Paraiso a daga. Kalpasanna, makagunggona ken naragsakton ti biag dagiti tattao iti agnanayon. Kuna ti Apocalipsis 21:4: “Awanton ni patay.” Tapno ipaganetget a mapagtalkan dayta a kari, kuna ti bersikulo 5: “Dagitoy a sasao matalek ken napudnoda.” Naan-anay a tungpalen ni Jehova ti aniaman a karina.

Mamatika kadi a “dagitoy a sasao matalek ken napudnoda?” No kasta, ammuem ti ad-adu pay maipapan ken Jesu-Kristo, ken ipakitam ti pammati kenkuana. Iti kasta, magun-odmo ti anamong ni Jehova. Saanmo laeng a masagrap itan ti nagadu a bendisionna, no di ket maaddaanka pay iti namnama nga agbiag nga agnanayon iti Paraiso a daga nga ‘awanan iti ipapatay, panagleddaang, panagsangit, wenno ut-ot.’