Panangikompara a Makatulong Unay Kenka

IBILBILANGMO kadi ti bagim kas maysa a Kristiano? No wen, maysaka kadagiti nasurok a dua a bilion a tattao—dandani 1 iti kada 3—a mangibagbaga a pasurot isuda ti Kristo. Ita, adda rinibu a narelihiosuan a grupo a maaw-awagan iti Kristiano, ngem nasinasinada ta agkokontra dagiti doktrina ken patpatienda. Isu a mabalin a naiduma unay dagiti patpatiem kadagiti patpatien ti dadduma nga agkunkuna a Kristiano. Importante kadi a talaga no ania ti patpatiem? Siempre, wen—no kayatmo a suroten dagiti pannursuro dagiti pudpudno a Kristiano nga ibagbaga ti Biblia.

Dagiti immun-una a pasurot ni Jesu-Kristo ket naam-ammo kas “Kristiano.” (Aramid 11:26) Saanda a kasapulan ti sabali a nagan kas pakabigbiganda ta maymaysa laeng ti patpatien idi ti amin a Kristiano. Sangsangkamaysa a sursuroten dagiti Kristiano idi dagiti pannursuro ken instruksion ni Jesu-Kristo, ti Nangirugi iti pudpudno a Kristiano a relihion. Ti ngay relihionmo? Patiem kadi nga isursuro ti relihionmo ti insuro ti Kristo ken dagiti patpatien dagiti immun-una a pasurot ti Kristo? Kasanom a masigurado? Adda laeng maysa a pamay-an—usarem ti Biblia kas pagrukodan.

Panunotem daytoy: Dakkel ti respeto ni Jesu-Kristo iti nasantuan a Sursurat kas Sao ti Dios. Dina inakseptar dagiti tattao nga ad-adda a mangipatpateg kadagiti kaugalian nga inaramid ti tao, imbes a kadagiti sursuro ti Biblia. (Marcos 7:9-13) Maikunatayo ngarud a ti Biblia ti masapul a pangibatayan dagiti pudno a Kristiano kadagiti patpatienda. Isu nga importante nga isaludsod ti amin a Kristiano, ‘Naibatay met laeng kadi iti Biblia dagiti isursuro ti relihionko?’ Tapno masungbatam, padasem a pagkomparaen ti isursuro ti relihionmo ken ti mismo nga ibagbaga ti Biblia.

Kinuna ni Jesus a ti panagdaydayawtayo iti Dios ket masapul a naibatay iti kinapudno—ti kinapudno a masarakan iti Biblia. (Juan 4:24; 17:17) Ken kinuna ni apostol Pablo a maisalakantayo laeng no addaantayo iti “umiso a pannakaammo iti kinapudno.” (1 Timoteo 2:4) Nagpateg ngarud a dagiti patpatientayo ket naibatay iti kinapudno a linaon ti Biblia. Biagtayo a mismo ti nakataya!

NO KASANOTAYO NGA IKOMPARA TI PATPATIENTAYO ITI ISURSURO TI BIBLIA

Awisendaka a mangbasa iti innem a saludsod iti kahon ken siputam ti sungbat ti Biblia. Kitaem dagiti naikabil a bersikulo ti Biblia, ken panunotem a naimbag dagiti sungbat. Sa isaludsodmo iti bagim, ‘Komusta ti isursuro ti relihionko no ikompara iti ibagbaga ti Biblia?’

Makatulong dagiti saludsod iti baba tapno maaramidmo ti panangikompara a makatulong unay kenka. Kayatmo kadi nga ikompara ti dadduma pay nga isursuro ti relihionmo iti ibagbaga ti Biblia? Maragsakan dagiti Saksi ni Jehova a tumulong kenka tapno maawatam ti talaga nga isursuro ti Biblia. Mabalinmo nga ibaga iti maysa a Saksi no kayatmo ti libre a panagadal iti Biblia. Wenno bisitaem ti website-mi a jw.org/ilo.

1 SALUDSOD: Asino ti Dios?

SUNGBAT: Ni Jehova, nga Ama ni Jesus, ti Dios nga awan nangrugian ken pagpatinggaanna ken ti mannakabalin-amin a Namarsua iti amin a bambanag.

TI KUNA TI BIBLIA:

“Agyamankami a kankanayon iti Dios nga Ama ni Apotayo a Jesu-Kristo no ikararagandakayo.”—Colosas 1:3.

“Maikarika, Jehova, a mismo a Diosmi, nga umawat iti dayag ken iti dayaw ken iti pannakabalin, agsipud ta pinarsuam ti amin a bambanag.”—Apocalipsis 4:11.

Kitaem met ti Roma 10:13; 1 Timoteo 1:17.

2 SALUDSOD: Asino ni Jesu-Kristo?

SUNGBAT: Ni Jesus ti inauna nga Anak ti Dios. Naparsua ni Jesus, isu nga adda nangrugianna. Ni Jesus ket adda iti babaen ti Dios ken agtultulnog iti pagayatan ni Amana.

TI KUNA TI BIBLIA:

“Ti Ama dakdakkel ngem siak.”—Juan 14:28.

“[Ni Jesus] ti ladawan ti di makita a Dios, ti inauna iti isuamin a parsua.”—Colosas 1:15.

Kitaem met ti Mateo 26:39; 1 Corinto 15:28.

3 SALUDSOD: Ania ti nasantuan nga espiritu?

SUNGBAT: Ti nasantuan nga espiritu ket puersa nga us-usaren ti Dios a mangitungpal iti pagayatanna. Saan a persona. Mabalin a mapno ti maysa a tao iti nasantuan nga espiritu ken mapapigsa babaen iti dayta.

TI KUNA TI BIBLIA:

“Idi mangngeg ni Elisabet ti kablaaw ni Maria, limmagto ti maladaga iti aanakanna; ket ni Elisabet napno iti nasantuan nga espiritu.”—Lucas 1:41.

“Umawatkayto iti pannakabalin inton dumteng kadakayo ti nasantuan nga espiritu.”—Aramid 1:8.

Kitaem met ti Genesis 1:2; Aramid 2:1-4; 10:38.

4 SALUDSOD: Ania ti Pagarian ti Dios?

SUNGBAT: Ti Pagarian ti Dios ket maysa a gobierno idiay langit. Ni Jesus ti Ari ti Pagarian ti Dios. Din agbayag, itungpalton daytoy a Pagarian ti pagayatan ti Dios iti intero a daga.

TI KUNA TI BIBLIA:

“Ti maikapito nga anghel pinuyotna ti trumpetana. Ket nagadda dagiti natbag a timek idiay langit, a kunkunada: ‘Ti pagarian ti lubong nagbalinen a pagarian ni Apotayo ken ni Kristona, ket agturayto kas ari iti agnanayon ken awan inggana.’”—Apocalipsis 11:15.

Kitaem met ti Daniel 2:44; Mateo 6:9, 10.

5 SALUDSOD: Mapan kadi idiay langit ti amin a nasingpet a tattao?

SUNGBAT: Saan. Adda laeng limitado a bilang ti matalek a tattao a pinili ti Dios a mapan idiay langit. Maawaganda a “bassit nga ipastoran.” Kas ar-ari, kaduadanto ni Jesus a mangituray kadagiti tattao.

TI KUNA TI BIBLIA:

“Dikay agbuteng, bassit nga ipastoran, agsipud ta inanamongan ni Amayo ti panangited kadakayo ti pagarian.”—Lucas 12:32.

“Isudanto ti papadi ti Dios ken ni Kristo, ket makipagturaydanto kenkuana kas ar-ari.”—Apocalipsis 20:6.

Kitaem met ti Apocalipsis 14:1, 3.

6 SALUDSOD: Ania ti kayat ti Dios a mapasamak iti daga ken kadagiti tattao?

SUNGBAT: Iti panagturay ti Pagarian ti Dios, agbalinto a paraiso ti daga ken maaddaanto dagiti matalek a tattao iti perpekto a salun-at, awan inggana a talna, ken agnanayon a biag.

TI KUNA TI BIBLIA:

“Dagidiay naemma [wenno, napakumbaba] tagikuaendanto ti daga, ket pudno a maragsakandanto iti napalalo iti kinaruay ti talna.”—Salmo 37:10, 11.

“Punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”—Apocalipsis 21:3, 4.

Kitaem met ti Salmo 37:29; 2 Pedro 3:13.