Mabigbigmo Kadi a Masapul a Mangsanayka?

1, 2. Apay a masapul a sanayentayo ti dadduma nga umawat kadagiti teokratiko nga annongen?

TI PANANGIWARAGAWAG iti naimbag a damag ti Pagarian ti kangrunaan a nakaibaonan ni Jesus. Nupay kasta, nangipaay iti tiempo tapno mangsanay kadagiti agbalin a pastor ken mannursuro. (Mat. 10:5-7) Nupay okupado ni Felipe kas maysa a manangaskasaba, sigurado a tinulonganna ti uppat nga annakna a babbai nga agbalin a nalaing a mangiranud ti kinapudno iti Biblia iti sabsabali. (Ara. 21:8, 9) Kasano kapateg ti kasta a panangsanay ita?

² Iti intero a lubong, umad-adu a tattao ti umaw-awat iti naimbag a damag. Masapul a maawatan dagiti kabbaro a saan pay a nabautisaran ti kinapateg ti personal a panagadal iti Biblia. Masapul met a maisuroda a mangikasaba iti naimbag a damag ken mangisuro iti kinapudno. Kadagiti kongregasiontayo, masapul a maparegta dagiti kakabsat a lallaki nga agreggetda a mangragpat iti kualipikasion ti agbalin a ministerial nga adipen ken panglakayen. Babaen ti nasayaat a panangisuro, dagiti nataengan a Kristiano matulonganda dagiti kabbaro a rumang-ay iti naespirituan.​—Prov. 4:2.

TULONGAN DAGITI KABBARO A MAADDAAN ITI BILEG KEN SIRIB MANIPUD ITI SAO TI DIOS

3, 4. (a) Kasano nga innaig ni Pablo ti panagadal iti Biblia iti nabunga a ministerio? (b) Sakbay a paregtaentayo dagiti iyad-adalantayo a maaddaan iti personal a panagadal iti Biblia, ania koma ti aramidentayo?

³ Kasano kapateg ti personal a panagadal iti Biblia? Maammuantayo ti sungbat iti sasao ni apostol Pablo kadagiti Kristiano idiay Colosas. Insuratna: “Saankami a namingga a mangikarkararag kadakayo ken agdawdawat tapno mapnokayo koma iti umiso a pannakaammo iti pagayatanna iti isuamin a sirib ken naespirituan a pannakaawat, tapno magnakayo a maikari ken Jehova iti panggep a panangay-ayo a naan-anay kenkuana bayat nga agtultuloykayo nga agbunga iti tunggal naimbag nga aramid ken rumang-ay iti umiso a pannakaammo iti Dios.” (Col. 1:9, 10) Babaen ti kasta a pannakaammo, kabaelan dagiti Kristiano a taga-Colosas ti magna a maitunos iti pagayatan ni Jehova ken naan-anay a maay-ayoda. Makatulong dayta tapno agtultuloyda nga “agbunga iti tunggal naimbag nga aramid,” nangruna ti panangikasaba iti naimbag a damag. Tapno naan-anay a makapagserbi ti maysa nga agdaydayaw ken Jehova, masapul a maaddaan iti regular a panagadal iti Biblia. Nasayaat a tulongantayo dagiti mayad-adalan iti Biblia a mangtarus iti dayta.

⁴ Tapno matulongantayo ti dadduma a magunggonaan iti personal a panagadal iti Biblia, masapul a kombinsidotayo nga umuna a napateg dayta. Kinapudnona, masapul a maaddaantayo a mismo iti nasayaat ken regular a panagadal iti Biblia. Gapuna, isaludsodtayo: ‘No adda mangibaga iti kapanunotanna a saan a maitunos iti pannursuro ti Biblia wenno adda agdamag kadagiti narigat a sungbatan a saludsod, masungbatak kadi dayta a naibatay iti Biblia? No mabasak no kasano a nagtultuloy da Jesus, Pablo, ken ti dadduma pay iti ministerio, pampanunotek kadi no kasano a makatulong ti panagtultuloyda iti panagserbik ken Jehova?’ Amintayo ket agkasapulan iti pannakaammo ken balakad manipud iti Sao ti Dios. Ket no ibagatayo iti sabsabali a dakkel ti nagunggonatayo iti personal a panagadaltayo iti Biblia, mabalin a maparegtada met nga agbalin a napasnek nga agadal iti Kasuratan tapno magunggonaanda.

5. Mangted iti singasing no kasano a tulongan dagiti kabbaro a maaddaan iti regular a personal a panagadal iti Biblia.

⁵ Nalabit maisaludsodyo, ‘Kasano a masanayko dagiti iyad-adalak a regular nga agadal iti Biblia?’ Ti nasayaat a pangrugian ket ti panangipakita kenkuana no kasano ti agsagana para iti panagadalyo. Mabalin nga ibagam a mangbasa iti paset ti apendise iti libro nga Ania a Talaga ti Isursuro ti Biblia? ken basaenna dagiti naisitar a teksto. Tulongam nga agsagana para kadagiti gimong tapno makapagkomento. Paregtaem a basaenna ti tunggal ruar ti Pagwanawanan ken Agriingkayo! No magun-odan iti lengguahena ti Watchtower Library wenno Watchtower ONLINE LIBRARY, ipakitam no kasano nga usaren dayta tapno masungbatan dagiti saludsodna maipapan iti Biblia. Babaen kadagita a tulong, mabalin a maragsakanto ti iyad-adalam a personal nga agadal iti Sao ti Dios.

6. (a) Kasano a matulongam ti iyad-adalam a mangpatanor iti naimpusuan a panagayat iti Biblia? (b) No mapatanor ti iyad-adalam ti naimpusuan a panagayatna iti Biblia, ania ti mabalin nga aramidenna?

⁶ Siempre, saantayo koma a piliten ti asinoman nga agbasa ken agadal iti Biblia. Imbes ketdi, usarentayo dagiti alikamen nga ipapaay ti organisasion ni Jehova tapno tulongantayo dagiti iyad-adalantayo a mangipateg iti Biblia. Inton agangay, ti napasnek nga agad-adal mabalin a mariknana ti kas iti narikna ti salmista a nangikanta: “Ti iyaadani iti Dios naimbag kaniak. Iti Soberano nga Apo Jehova insaadko ti kamangko.” (Sal. 73:28) Tumulong ti espiritu ni Jehova kadagitoy a napinget ken manangapresiar nga agad-adal ti Biblia.

SANAYEN DAGITI KABBARO A MANGASABA KEN MANGISURO

7. Kasano a sinanay ni Jesus dagiti mangikasaba iti naimbag a damag? (Kitaen ti ladawan iti rugi ti artikulo.)

⁷ Iti Mateo kapitulo 10, mabasatayo dagiti instruksion nga inted ni Jesus kadagiti 12 nga apostolna. Imbes a nalawa ti saklawen ti ibagana, dagiti espesipiko a banag ti dinakamatna.^[1] Dimngeg dagiti apostol bayat nga insuro ni Jesus ti epektibo a panangasaba. Kalpasanna, napanda nangasaba. Babaen ti panangpaliiwda iti pamay-an ni Jesus, nagbalinda idi agangay a nalaing a mangisuro iti kinapudno iti Biblia. (Mat. 11:1) Masanaytayo met dagiti iyad-adalantayo iti Biblia nga agbalin nga epektibo a mangasaba iti naimbag a damag. Usigentayo ita ti dua a pamay-an tapno matulongantayo ida.

8, 9. (a) Kasano a nakisarita ni Jesus kadagiti indibidual iti ministeriona? (b) Kasano a matulongantayo dagiti kabbaro a makisarita kadagiti tattao kas iti inaramid ni Jesus?

⁸ Makisarita kadagiti tattao. Masansan a nakisarita ni Jesus kadagiti indibidual maipapan iti Pagarian. Kas pagarigan, nagsayaat ken nabunga ti pannakisaritana iti babai iti bubon ni Jacob iti asideg ti siudad ti Sicar. (Juan 4:5-30) Nakisarita met ken Mateo Levi, maysa nga agsingsingir iti buis. Bassit laeng ti nadakamat iti Ebanghelio maipapan iti dayta, ngem inawat ni Mateo ti awis ni Jesus nga agbalin a pasurotna. Nangngeg ni Mateo ken ti dadduma ti napaut a panagpalawag ni Jesus bayat ti padaya iti balay ni Mateo.​—Mat. 9:9; Luc. 5:27-39.

⁹ Iti sabali a gundaway, nainggayyeman ti pannakisarita ni Jesus ken Natanael, nga addaan idi iti negatibo a panangmatmat kadagiti taga-Nazaret. Nupay kasta, natignay ni Natanael a mangbalbaliw iti kapanunotanna. Kayatna a maammuan ti ad-adu pay maipapan iti isursuro ni Jesus, a taga-Nazaret. (Juan 1:46-51) Nasayaat ngarud a sanayentayo dagiti kabbaro a manangaskasaba a makisaritada a nainggayyeman ken naalumamay kadagiti tattao.^[2] Maragsakan dagiti tultulongantayo a makakita no kasano a dumngeg dagiti nasingpet a tattao no mangipakitatayo iti personal nga interes ken nasayaat ti panagsasaotayo.

10-12. (a) Kasano a tinulongan ni Jesus ti dadduma a maaddaan iti interes iti naimbag a damag? (b) Kasano a matulongantayo dagiti kabbaro nga agbalin a nalaing a mangisuro kadagiti kinapudno iti Biblia?

¹⁰ Parayrayen ti interes. Ababa laeng ti tiempo ni Jesus a mangiringpas iti ministeriona. Nupay kasta, nangipaay iti tiempo a mangparayray iti interes dagiti tattao iti naimbag a damag. Kas pagarigan, insuro ni Jesus dagiti tattao, a nagusar iti bangka kas entabladona. Iti dayta a gundaway, babaen ti milagro, tinulonganna ni Pedro a makakalap iti adu nga ikan ket imbagana kenkuana: “Manipud ita agkalapkan iti tattao a sibibiag.” Ania ti resulta dagiti sasao ken tigtignay ni Jesus? Ni Pedro ken dagiti kakaduana “insublida dagiti barangay iti daga, ket binaybay-anda ti amin a banag ket simmurotda ken [Jesus].”​—Luc. 5:1-11.

¹¹ Naginteres iti pannursuro ni Jesus ni Nicodemo, maysa a miembro ti Sanhedrin. Kayatna nga ad-adu pay ti maammuanna ngem mabuteng iti ibaga ti dadduma no makitada a makisarsarita ken Jesus. Saan a nainget ni Jesus iti tiempona ken nangiwaya iti panawenna. Nakisarita ken Nicodemo iti rabii tapno saan a makita dagiti tattao. (Juan 3:1, 2) Ania ti masursurotayo kadagitoy a salaysay? Nangipaay iti tiempo ti Anak ti Dios a mangpabileg iti pammati dagiti indibidual. Gapuna, nagagettayo koma nga agsarungkar ken mangyadal iti Biblia kadagiti interesado.

¹² Mabalin nga agbalin a nalaing a mangisuro iti kinapudno iti Biblia dagiti kabbaro no kaduaentayo ida a mangasaba. Matulongantayo ida a laglagipenda dagiti nangipakita iti uray bassit laeng nga interes. Mabalintayo nga awisen dagiti kabbaro a mangaskasaba a kuyogendatayo no agsarungkar ken mangyadaltayo iti Biblia. Dagita a panangsanay ken pammaregta ti sigurado a mangtignay kadagiti bassit pay ti kapadasanda a mangaskasaba a mangpatanor iti interes ti dadduma ken maaddaan iti bukodda nga iyad-adalan iti Biblia. Masursuroda met ti agbalin a naanus ket maitultuloyda ti ministerioda.​—Gal. 5:22; kitaen ti kahon a “Napateg ti Panaganus.”

SANAYEN DAGITI KABBARO NGA AGSERBI KADAGITI KAKABSAT

13, 14. (a) Ania ti makunam kadagiti nangaramid iti dakkel a sakripisio para iti sabsabali a nairekord iti Biblia? (b) Ania dagiti praktikal a pamay-an a masanaymo dagiti kabbaro a mangaskasaba ken dagiti agtutubo a mangipakita iti ayatda kadagiti kakabsat?

¹³ Ipaganetget dagiti salaysay ti Biblia ti pribilehiotayo a mangipakita iti “nainkabsatan a panagayat” ken panagserbi iti maysa ken maysa. (Basaen ti 1 Pedro 1:22; Lucas 22:24-27.) Inted ti Anak ti Dios ti isuamin, agraman ti biagna, a nagserbi iti sabsabali. (Mat. 20:28) Ni Dorcas ket “aduan iti naimbag nga ar-aramid ken sagsagut ti asi.” (Ara. 9:36, 39) Ni Mary, a kabsat a taga-Roma, ket nagaget nga agsaksakripisio para kadagiti kakabsat iti kongregasionna. (Roma 16:6) Kasanotayo a matulongan dagiti kabbaro tapno maawatanda ti kinapateg ti panangtulong kadagiti kakabsatda?

¹⁴ Mabalin nga ikuyog dagiti kakabsat nga aduan kapadasan dagiti kabbaro a bumisita kadagiti masakit ken kadagiti lallakay ken babbaket. No maitutop, mabalin nga ikuyog dagiti nagannak ti annakda kadagita nga ibibisita. Mabalin nga ikuyog dagiti panglakayen ti dadduma a mangbisita kadagiti nataengan tapno siguraduenda no adda taraonda ken no nasayaat wenno natalged met laeng ti pagtaenganda. Kadagitoy a pamay-an, masursuro dagiti agtutubo ken dagiti kabbaro ti mangipakita iti kinaimbag iti sabsabali. Bayat ti panangasaba, maysa a panglakayen ti bimmisita iti apagbiit kadagiti Saksi nga agnanaed iti bario a sakup ti teritoriada tapno komustaenna ida. Nasursuro ti agtutubo a lalaki a kanayon a kaduana a masapul a marikna ti amin a miembro ti kongregasion a maay-ayatda.​—Roma 12:10.

15. Apay a nagpateg a maaddaan dagiti panglakayen iti interes iti panagrang-ay dagiti kakabsat a lallaki iti kongregasion?

¹⁵ Gapu ta us-usaren ni Jehova dagiti lallaki kas mannursuro iti kongregasion, nakapatpateg a parang-ayen dagiti kakabsat a lallaki ti abilidad nga agpalawag. No maysaka a panglakayen, mabalinmo kadi a denggen ti maysa a ministerial nga adipen bayat a sanayenna ti palawagna? Babaen ti tulongmo, mabalin a mapasayaatna ti abilidadna a mangisuro iti Sao ti Dios.​—Neh. 8:8.^[3]

16, 17. (a) Ania ti nagustuan ni Pablo iti panagrang-ay ni Timoteo? (b) Kasano nga epektibo a masanay dagiti panglakayen dagiti agbalinto a papastor iti kongregasion iti masanguanan?

¹⁶ Adu a mangipastor ti kasapulan iti kongregasion Kristiano, ket masapul a masanay ita dagiti mangaramidto iti dayta a trabaho. Dinakamat ni Pablo ti pamay-an ti panangsanay idi imbagana ken Timoteo: “Sika, . . . anakko, agtultuloyka a gumun-od iti bileg iti di kaikarian a kinamanangngaasi a mainaig ken Kristo Jesus, ket ti bambanag a nangngegmo kaniak buyogen ti pammatalged ti adu a saksi, dagitoy a banag italekmo kadagiti matalek a lallaki, a kalpasanna, makaanayto a kualipikado a mangisuro iti sabsabali.” (2 Tim. 2:1, 2) Nakasursuro ni Timoteo idi nakipagtrabaho ken Pablo, a maysa a panglakayen. Kalpasanna, dagiti pamay-an ni Pablo ket inyaplikar ni Timoteo iti ministeriona ken iti dadduma pay a paset ti sagrado a panagserbi.​—2 Tim. 3:10-12.

¹⁷ Saan a binaybay-an ni Pablo a masanay lattan ni Timoteo a bukodna. Imbes ketdi, inkuyogna ti baro a ni Timoteo. (Ara. 16:1-5) Matulad dagiti panglakayen ni Pablo no ikuyogda dagiti ministerial nga adipen bayat ti panagipastorda no maitutop. No kasta, makita dagitoy a kakabsat ti pammati, kinaanus, ayat, ken pamay-an ti panangisuro a makalikaguman kadagiti Kristiano a manangaywan. Makatulong dayta iti panangsanay kadagiti agbalinto a papastor iti “arban ti Dios.”​—1 Ped. 5:2.

TI KINAPATEG TI PANANGSANAY ITI SABSABALI

18. Apay a napateg koma kadatayo a sanayentayo ti sabsabali iti panagserbi ken Jehova?

¹⁸ Nakapatpateg ti panangsanay iti sabsabali gapu ta umad-adu ti panagkasapulan ken gundaway nga agserbi ken Jehova. Nagsayaat ken agaplikar pay laeng ita ti pamay-an ti panangsanay nga impaay da Jesus ken Pablo. Kayat ni Jehova a masanay a naimbag dagiti adipenna ita para kadagiti teokratiko nga annongen. Inikkannatayo ti Dios iti pribilehio a tumulong kadagiti bassit pay ti kapadasanda tapno mapatanorda ti abilidad a mangitungpal iti trabaho iti kongregasion. Bayat a dumakdakes ti lubong ken umad-adu ti gundaway a mangasaba, ad-adda pay nga agbalin a napateg ken talaga a kasapulan dagita a panangsanay.

19. Apay a kombinsidotayo koma nga agballigi ti panagreggettayo a mangsanay iti sabsabali nga agserbi ken Jehova?

¹⁹ Siempre, agkasapulan iti tiempo ken panagregget ti panangsanay. Ngem tulongannatayo ni Jehova ken ti dungdungnguenna nga Anak ken ikkannatayo iti sirib a mangsanay. Maragsakantayo a makakita kadagiti tultulongantayo nga ‘agtrabaho a sipipinget ken umag-agawa.’ (1 Tim. 4:10) Itultuloytayo koma ti rumang-ay iti naespirituan iti panangaramidtayo iti sagrado a panagserbi ken Jehova.