Kinaalumamay​—Pakakitaan iti Kinasirib

ITI simmaruno nga ipapan ni Antonia, pinagsasawan manen ti babai. Ania ti inaramid ni Antonia? “Nagrigat dayta a situasion,” kinunana. “Makapasakit ti panagsasaona.” Ngem nagpadispensar manen ni Antonia, ken imbagana iti babai a maawatanna ti rigat a mapaspasaranna.

No sika ni Antonia, ania ngata ti inaramidmo? Agbalinka ngata a kalmado? Marigatanka ngata a mangkontrol iti emosionmo? Sigurado a saan a nalaka ti agbalin a kalmado iti kasta a kasasaad. No ma-stress-tayo wenno adda mamagpungtot kadatayo, talaga a nakarigrigat ti agbalin a kalmado.

Ngem iparegta ti Biblia kadagiti Kristiano nga agbalinda a naalumamay ken kalmado. Kinapudnona, inaig ti Sao ti Dios ti kinaalumamay iti sirib. “Siasino ti masirib ken mannakaawat kadakayo?” insaludsod ni Santiago. “Ipakitana koma manipud iti nasayaat a kababalinna dagiti aramidna buyogen ti kinaalumamay a kukua ti sirib.” (Sant. 3:13) Kasano a ti kinaalumamay ken panagbalin a kalmado ket sirib manipud ngato? Ken ania ti makatulong tapno mapatanortayo dagita a kababalin?

TI PAGSAYAATAN TI NAALUMAMAY A KABABALIN

Pabaawen ti naalumamay a kababalin ti pungtot. “Ti maysa a sungbat, no naalumamay, pagbaw-ingenna ti pungtot, ngem ti sao a makapasakit parnuayenna ti unget.”​—Prov. 15:1.

Ti panagpungtot ket ad-adda laeng a mangrubrob iti situasion. (Prov. 26:21) Ngem ti naalumamay a sungbat, kaaduanna a pakalmaenna ti situasion. Malunagna pay ketdi ti puso ti nauyong a tao.

Napadasan dayta ni Antonia. Gapu ta naalumamay ti sungbatna, nagsangit ti babai. Inlawlawag ti babai a nagadu ngamin ti problemana. Nagsayaat ti impakita ni Antonia, ket nairugina nga iyadalan ti babai​—gapu iti panagbalinna a kalmado ken mannakikappia.

Naragsaktayo no naalumamaytayo. “Naragsak dagiti naalumamay ti kababalinda, yantangay tawidendanto ti daga.”​—Mat. 5:5.

Apay a naragsak dagiti naalumamay? Adu a dati a nauyong ti naragsak itan ta inkagumaanda ti agbalin a naalumamay. Simmayaat ti panagbiagda, ket ammoda nga addaanda iti nasayaat a masakbayan. (Col. 3:12) Ni Adolfo, a manangaywan iti sirkito idiay Spain, malagipna ti biagna sakbay a naammuanna ti kinapudno.

“Awan idi ti direksion ti biagko,” kuna ni Adolfo. “Nalakaak la idi nga agpungtot, isu a kabutengdak uray ti dadduma a gagayyemko ta nauyong ken naranggasak. Idi kuan, adda namagbalbaliw kaniak. Iti maysa a rambol, innem ti bagsolko ket dandaniak naadasan iti dara.”

Ngem ita, babaen iti sao ken aramid, isursuron ni Adolfo ti panagbalin a naalumamay. Magusgustuan dagiti tattao ta mannakigayyem ken nasingpeten. Kuna ni Adolfo a maragsakan ta nakapagbalbaliw. Ken agyamyaman unay ken Jehova ta isu ket nagbalin a naalumamay.

Makaparagsak ken Jehova ti panagbalin a naalumamay. “Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.”​—Prov. 27:11.

Ni Jehova ket arigna rurruroden ti kangrunaan a kabusorna, ti Diablo. Adda koma karbengan ti Dios nga agpungtot gapu iti kasta a pananginsulto, ngem ibaga ti Biblia a “nabannayat [wenno, saan a nalaka] nga agpungtot” ni Jehova. (Ex. 34:6) No ikagumaantayo a tuladen dayta a kababalin ti Dios ken ti kinaalumamayna, maipakitatayo ti kinasirib a mangparagsak ken Jehova.​—Efe. 5:1.

Napeggad daytoy lubong a pagbibiagantayo. Makapulapoltayo dagiti tattao a “napalangguad, natangsit, managtabbaaw, . . . manangparpardaya, awanan panagteppel, narungsot.” (2 Tim. 3:2, 3) Ngem saan koma a dagita ti manglapped iti maysa a Kristiano a mangpatanor iti naalumamay a kababalin. Palagipannatayo ti Sao ti Dios a “ti sirib manipud ngato [ket] . . . natalna, nainkalintegan.” (Sant. 3:17) No agbalintayo a mannakikappia ken mannakaawat, maipakitatayo nga addaantayo iti nadiosan a sirib. Dayta a sirib ti mamagbalin kadatayo a naalumamay ken kalmado no adda mamagpungtot kadatayo. Dayta met ti mangpasinged pay kadatayo iti Gubuayan ti awan patinggana a sirib, ni Apo Jehova.