Mapilim ti Masanguanam!
MAPILIM KADI TI MASANGUANAM? Mamati ti dadduma a naikeddengen ti masanguananda ket saanda a mabalin a pilien dayta. No mapaay ti planoda, panunotenda a daytan ti gasatda. “Talaga a saan a para kaniak dayta!” kunada.
Madismaya ti dadduma no makitada nga awan ti maaramidanda iti panangirurumen ken kinaawan hustisia ditoy lubong. Mabalin nga ikarigatanda a pasayaaten ti biagda ngem masansan a mapaay dagiti planoda gapu iti gubat, krimen, kalamidad, ken sakit. Isu a kunada, ‘Apay pay la a problemaek dayta?’
Agpayso a dagiti pasamak iti biagtayo apektaranna dagiti planotayo. (Eclesiastes 9:11) Ngem no maipapan iti biagmo iti masanguanan, mabalinmo a pilien dayta. Kinapudnona, ibaga ti Biblia a nakadepende ti masanguanam iti desisionmo. Kitaem ti ibagbagana.
Ti lider ti nagkauna a nasion ti Israel a ni Moises, kinunana kadagiti Israelita idi dandanidan sumrek iti Naikari a Daga: “Inkabilko ti biag ken ipapatay iti sanguananyo, ti bendision ken ti lunod; ket masapul a pilienyo ti biag tapno agbiagkayo, dakayo ken dagiti annakyo, babaen ti panangayatyo ken Jehova a Diosyo, panangipangagyo iti timekna, ken panagmatalekyo kenkuana.”—Deuteronomio 30:15, 19, 20.
“Inkabilko ti biag ken ipapatay iti sanguananyo, ti bendision ken ti lunod; ket masapul a pilienyo ti biag.”—Deuteronomio 30:19
Wen! Insalakan ti Dios dagiti Israelita manipud iti pannakaadipen idiay Egipto ken inikkanna ida iti namnama a maaddaan iti wayawaya ken naragsak a biag iti Naikari a Daga. Ngem saan nga automatiko a maadda dayta kadakuada. Tapno maalada dagita a bendision, masapul a ‘pilienda ti biag.’ Kasano? ‘Babaen ti panangayatda iti Dios, panangipangagda iti timekna, ken panagmatalekda kenkuana.’
Adda met laeng kasta a pagpiliam ita, ket nakadepende ti masanguanam iti piliem. No piliem nga ayaten ti Dios, no umimdengka iti timekna, ken no agtalinaedka kenkuana, kaipapananna a pilpiliem ti biag—biag nga agnanayon iti paraiso a daga. Ngem ania ti ramanen ti panangaramid kadagita?
PILIEM NGA AYATEN TI DIOS
Ayat ti kangrunaan a kualidad ti Dios. Insurat ni apostol Juan: “Ti Dios ket ayat.” (1 Juan 4:8) Isu nga idi adda nangisaludsod ken Jesus no ania ti kapatgan a bilin, insungbatna: “Masapul nga ayatem ni Jehova a Diosmo iti amin a pusom ken amin a kararuam ken amin a panunotmo.” (Mateo 22:37) Ti pudpudno a relasion ken Jehova a Dios ket naibatay iti ayat, saan nga iti buteng wenno basta panagtulnog lattan. Ngem apay a masapul a pilientayo nga ayaten ti Dios?
Ti ayat ni Jehova kadagiti tattao ket kas iti ayat dagiti nagannak iti annakda. Uray imperpekto dagiti naayat a nagannak, isuro, paregtaen, suportaran, ken disiplinaenda dagiti annakda gapu ta kayatda a naragsak ken naballigida. Ania ti namnamaen dagiti nagannak? Namnamaenda nga ayaten ida dagiti annakda ken ipapusoda dagiti naisuro kadakuada para iti pagimbaganda. Saan kadi a nainkalintegan laeng a namnamaen ti perpekto a nailangitan nga Amatayo nga apresiarentayo ti amin nga inaramidna para kadatayo?
UMIMDENGKA ITI TIMEKNA
Iti orihinal a lengguahe ti Biblia, ti sao nga “umimdeng,” wenno dumngeg, ket adda kaipapananna nga “agtulnog.” Saan kadi a dayta ti kayattayo a sawen no ibagatayo iti maysa nga ubing, “Dumngegka kadagiti nagannakmo”? Gapuna, ti panagimdeng iti timek ni Jehova kaipapananna ti panagsursuro ken panagtulnog iti ibagana. Gapu ta saantayo a literal a mangngeg ti timek ti Dios, dumngegtayo kenkuana babaen ti panangbasa ken panangyaplikartayo kadagiti naisurat iti Biblia, ti Saona.—1 Juan 5:3.
Impakita ni Jesus ti kinapateg ti panagimdeng iti timek ti Dios idi kinunana: “Saan laeng a tinapay ti pagbiag ti tao, no di ket ti tunggal sao nga aggapu ken Jehova.” (Mateo 4:4) Nagpateg ti pisikal a taraon iti bagitayo, ngem napatpateg ti pananggun-od iti pannakaammo maipapan iti Dios. Apay? Inlawlawag ti masirib nga Ari Solomon: “Ti sirib ket proteksion no kasano a ti kuarta ket proteksion, ngem daytoy ti pagsayaatan ti pannakaammo: Ti sirib taginayonenna ti biag daydiay addaan iti dayta.” (Eclesiastes 7:12) Maprotektarannatayo ita ti pannakaammo ken sirib manipud iti Dios ken tulongannatayo a mangaramid iti nainsiriban a desision a mangiturong iti biag nga agnanayon iti masanguanan.
AGTALINAEDKA KENKUANA
Panunotem ti ilustrasion ni Jesus a nadakamat iti napalabas nga artikulo. Kinunana: “Ti akikid a ruangan ken nailet a dalan ket agturong iti biag, ket manmano ti makasarak iti dayta.” (Mateo 7:13, 14) No magnatayo iti kasta a dalan, pagimbagantay la ketdi no adda kaduatayo nga eksperto a giya ken saantayo nga umad-adayo kenkuana no kayattayo ti makadanon iti destinasiontayo—ti biag nga agnanayon. Nagpateg ngarud a ditay ad-adaywan ti Dios ken agtalinaedtayo kenkuana. (Salmo 16:8) Kasanotayo a maaramid dayta?
Nakaad-adu ti masapul nga aramidentayo iti inaldaw ken adu pay ti kayattayo nga aramiden. Gapuna, mabalin nga okupadotayo unay wenno masingatayo wenno awanen ti panawentayo a mangpanunot kadagiti ipapaaramid ti Dios kadatayo. Isu nga ipalagip kadatayo ti Biblia: “Itultuloyyo ti agannad a naimbag a ti pannagnayo ket saan a kas kadagiti maag no di ket kas kadagiti masirib, nga usarenyo ti tiempoyo iti kasayaatan a pamay-an ta agbibiagtayon kadagiti dakes nga aldaw.” (Efeso 5:15, 16) Agtalinaedtayo iti Dios babaen ti panangipangpangrunatayo iti biagtayo ti relasiontayo kenkuana.—Mateo 6:33.
SIKA TI AGPILI
Uray saanmon a mabaliwan ti napalabasmo, mabalinmo a pilien ti maaddaan iti nasayaat a masanguanan ken uray dagiti patpatgem. Ipakita ti Biblia nga ay-ayatennatayo unay ti nailangitan nga Amatayo a ni Jehova, ken ipakpakaammona no ania ti kayatna nga aramidentayo. Siputam ti imbaga ni propeta Mikias:
“O tao, imbagana kenka no ania ti naimbag. Ket ania aya ti kayat ni Jehova nga aramidem? Ti laeng panangipakitam iti kinahustisia, ti panangipategmo iti panagbalin a napudno, ken ti panagbalinmo a naemma iti pannakipagnam iti Diosmo!”—Mikias 6:8.
Awatem kadi ti awis ni Jehova a makipagna kenkuana ket maawatmo ti bendision nga isagsaganana para kadagiti mangaramid iti dayta? Sika ti agpili!