Umadanika iti Dios
Inikkannatayo ni Jehova iti Pagpilian
“MASANSAN a makariknaak iti di umiso a panagamak nga amangan ta diakto makapagmatalek ken Jehova.” Kasta ti kinuna ti maysa a Kristiano a babai a nangipagarup a dinto makapagmatalek gapu kadagiti nasaem a kapadasanna idi ubing pay. Talaga kadi nga awanen ti namnama no naaddaantayo iti nasaem a kapadasan? Saan. Inikkannatayo ni Jehova a Dios iti sagut a wayawaya nga agpili, isu a mabalintay nga ikeddeng ti wagas a panagbiagtayo. Kayat ni Jehova a mangaramidtayo kadagiti umiso a panagpili, ket ibaga kadatayo ti Biblia a Saona no kasanotayo a maaramid dayta. Usigenyo ti sasao ni Moises iti Deuteronomio kapitulo 30.
Narigat kadi para kadatayo nga ammuen no ania dagiti kalikaguman ti Dios kadatayo, sa kalpasanna, aramidentayo dagita?a Kinuna ni Moises: “Daytoy a bilin nga ibilbilinko kenka ita nga aldaw saan a nakarigrigat kenka, saan met nga adayo.” (Bersikulo 11) Saan nga imposible ti kalkalikaguman ni Jehova. Rasonable ken kabaelantayo a ragpaten dagiti kalkalikagumanna. Kabaelantayo met nga ammuen dagita. Saan a kasapulan a mapantayo iti “langlangit” wenno “iti ballasiw ti baybay” tapno maammuantayo no ania ti namnamaen ti Dios kadatayo. (Bersikulo 12, 13). Ibatad kadatayo ti Biblia no kasano ti rumbeng a panagbiagtayo.—Mikias 6:8.
Nupay kasta, dinatay pilpiliten ni Jehova nga agtulnog kenkuana. Kinuna ni Moises: “Ita nga aldaw ikabilko iti sangom ti biag ken imbag, ken ti patay ken dakes.” (Bersikulo 15) Nawayatayo a mangpili no ti kayattayo ket biag wenno patay, naimbag wenno dakes. Mabalintay a pilien ti agdayaw ken agtulnog iti Dios ket sagrapentayto dagiti bendisionna, wenno pilientayo ti agsukir kenkuana ket sagabaentayto dagiti resultana. Adda kadatayo no ania kadagita ti pilientayo.—Bersikulo 16-18; Galacia 6:7, 8.
Napateg kadi ken Jehova no ania ti pilientayo? Siempre! Kas impaltiing ti Dios, kinuna ni Moises: “Piliem ti biag.” (Bersikulo 19) Ngem kasano a pilientayo ti biag? Inlawlawag ni Moises: “Babaen ti panangayat ken Jehova a Diosmo, babaen ti panagimdeng iti timekna ken babaen ti panagtalinaed kenkuana.” (Bersikulo 20)No masukaytayo ti panagayat ken Jehova, tarigagayantayo ti umimdeng a situtulnog kenkuana ken agtalinaed a sisusungdo kenkuana, aniaman ti mapasamak. Iti kasta, mapilitayo ti biag—ti kasayaatan a wagas ti panagbiag ita nga addaan namnama a biag nga agnanayon iti um-umay a baro a lubong.—2 Pedro 3:11-13; 1 Juan 5:3.
Makaliwliwa a kinapudno ti isuro kadatayo dagiti sasao ni Moises. Aniaman ti kapadasam iti biag iti daytoy nadangkes a lubong, addaanka iti namnama ken kabaelam ti agmatalek. Impaayannaka ni Jehova iti dignidad babaen ti sagutna a wayawaya nga agpili. Wen, mabalinmo a pilien nga ayaten ni Jehova, umimdeng kenkuana, ken agtalinaed a nasungdo kenkuana. No kasta ti piliem, bendisionan ni Jehova dagiti panagreggetmo.
Ti babai a nadakamat iti rugrugi daytoy nga artikulo ket naliwliwa gapu iti kinapudno a nawayatayo a mangpili no kayattayo nga ayaten ken pagserbian ni Jehova. Kinunana: “Adda dagiti gundaway a nalipatak a ti kapatgan ket ti panagayatko ken Jehova. Ngem pudno nga ay-ayatek ni Jehova. Gapuna, kabaelak ti agmatalek.” Kabaelam met ti agmatalek babaen ti tulong ni Jehova.
[Footnote]
a Kitaem ti artikulo nga “Umadanika iti Dios—Ania ti Kalikaguman Kadatayo ni Jehova?” iti Oktubre 1, 2009 a ruar ti Pagwanawanan.