Raemen No Ania ti “Pinagsinnangol ti Dios”

1, 2. Ania ti ibilbilin ti Hebreo 13:4 nga aramidentayo?

MARAGRAGSAKANKA kadi a mangidaydayaw ken Jehova? Sigurado a wen ti sungbatmo! Isu ket maikari a daydayawem ken ikarkarina a padayawannaka met. (1 Sam. 2:30; Prov. 3:9; Apoc. 4:11) Kayatna met a raemem ti dadduma, kas kadagiti opisial ti gobierno. (Roma 12:10; 13:7) Ngem adda personal a banag a nangnangruna a pangipakitaam iti panagraem—isu ti panagasawa.

² Insurat ni apostol Pablo: “Ti panagasawa nadayaw koma iti tengnga dagiti isuamin, ket ti pagiddaan ti agassawa awan koma ti tulawna.” (Heb. 13:4) Saan laeng a basta imbaga dayta ni Pablo. Ibilbilin, wenno iparparegta, dayta a teksto kadagiti Kristiano nga ibilangda a napateg ti panagasawa. Kasta kadi ti panangmatmatmo iti panagasawa, nangnangruna iti panagasawayo no naasawaanka?

3. Ania a napateg a balakad maipapan iti panagasawa ti imbaga ni Jesus? (Kitaen ti ladawan iti rugi ti artikulo.)

³ No raraemem ti panagasawa, sursurotem ti nagsayaat nga ulidan. Rinaem ni Jesus ti panagasawa. Idi nagsaludsod kenkuana dagiti Fariseo maipapan iti diborsio, dinakamatna ti imbaga ti Dios maipapan iti umuna a panagasawa: “Gapu itoy ti maysa a lalaki panawannanto ti amana ken inana, ket dagiti dua maymaysadanton a lasag.” Innayonna: “Ti pinagsinnangol ti Dios saan koma a pagsinaen ti tao.”​—Basaen ti Marcos 10:2-12; Gen. 2:24.

4. Ania ti impasdek ni Jehova a panggep ti panagasawa?

⁴ Immanamong ni Jesus a ti panagasawa ket nagtaud iti Dios ken impaganetgetna a masapul a permanente dayta. Saan nga imbaga ti Dios kada Adan ken Eva a mabalinda a waswasen ti panagasawada babaen ti diborsio. Ti panggep ti panagasawa a naaramid idiay Eden ket monogamia, ti manayon a panagtipon ‘ti dua’ a tao.

DAGITI TEMPORARIO A PANAGBALBALIW ITI PANAGASAWA

5. Ania ti epekto ti ipapatay iti panagasawa?

⁵ Nupay kasta, ammom nga adda dagiti nagbalbaliw idi nagbasol ni Adan. Ti maysa ket ipapatay, a mangapektar iti panagasawa. Makitatayo dayta iti insurat ni apostol Pablo idi inlawlawagna nga awanen dagiti Kristiano iti sidong ti Mosaiko a Linteg. Imbagana a ti ipapatay ti mangwaswas iti panagasawa ken mabalin a makiasawa manen ti nabalo nga asawa.​—Roma 7:1-3.

6. Kasano nga ipakita ti Mosaiko a Linteg ti panangmatmat ti Dios iti panagasawa?

⁶ Ti Linteg nga inted ti Dios iti nasion ti Israel ket nangted kadagiti detalye maipapan iti panagasawa. Impalubosna ti poligamia, a gagangayen a maar-aramid sakbay pay nga inted ti Dios ti Linteg iti Israel. Ngem adda linteg mainaig iti poligamia tapno maliklikan ti panagabuso. Kas pagarigan, no nakiasawa ti maysa nga Israelita iti maysa nga adipen sa nangala iti maikadua nga asawa idi agangay, masapul nga ipaayna latta ti taraon, kawes, ken karbengan ti umuna nga asawana. Imbilin ti Dios kenkuana a protektaran ken aywananna. (Ex. 21:9, 10) Awantayon iti sidong ti Linteg, ngem makitatayo iti dayta nga interesado ni Jehova iti panagasawa. Saan kadi a tumulong dayta kenka a mangipateg iti panagasawa?

7, 8. (a) Sigun iti Deuteronomio 24:1, ania ti kuna ti Linteg maipapan iti diborsio? (b) Ania ti panangmatmat ni Jehova iti diborsio?

⁷ Ania ti kuna ti Linteg maipapan iti diborsio? Napateg latta iti Dios ti panagasawa, ngem no adda umiso a rason, ipalubosna ti diborsio. (Basaen ti Deuteronomio 24:1.) Mabalin nga idiborsio ti maysa nga Israelita ti asawana no “nakasarak iti maysa a banag a di natakneng iti biangna.” Saan nga inlawlawag ti Linteg ti kayat a sawen ti “di natakneng.” Sigurado a nakababain wenno serioso a banag dayta, saan la a bassit a banag. (Deut. 23:14) Makapaladingit ta idi kaaldawan ni Jesus, adu a Judio ti nangidiborsio iti asawana “iti tunggal kita ti pangibatayan.” (Mat. 19:3) Ditay la ketdi kayat a tuladen ti kababalinda.

⁸ Impakaammo ni propeta Malakias ti panangmatmat ti Dios iti diborsio. Napasamak dayta idi gagangay nga al-allilawen ti lallaki ti ‘asawa iti kinaagtutubona’ tapno idiborsiona ken mabalin a tapno mangasawa iti ub-ubing ken pagano a babai. No maipapan iti panangmatmat ti Dios, insurat ni Malakias: “Kagurak ti panagdiborsio.” (Mal. 2:14-16, nwt-E) Maitunos dayta iti kuna ti Sao ti Dios maipapan iti umuna a panagasawa: “Masapul a makitipon [ti asawa a lalaki] iti asawana ket masapul nga agbalinda a maymaysa a lasag.” (Gen. 2:24) Sinuportaran ni Jesus ti panangmatmat ti Amana iti panagasawa idi imbagana: “Ti pinagsinnangol ti Dios saan koma a pagsinaen ti tao.”​—Mat. 19:6.

TI KAKAISUNA A PAKAIBATAYAN TI DIBORSIO

9. Ania ti kayat a sawen ti imbaga ni Jesus iti Marcos 10:11, 12?

⁹ Mabalin a maisaludsod ti maysa, ‘Adda kadi pangibatayan dagiti Kristiano a makidiborsio ken makiasawa manen?’ Imbaga ni Jesus ti panangmatmatna iti diborsio: “Siasinoman a mangidiborsio iti asawana a babai ket mangasawa iti sabali makaaramid iti pannakikamalala maibusor kenkuana, ket no ti babai, kalpasan ti panangidiborsiona iti asawana, makiasawa iti sabali, makaaramid iti pannakikamalala.” (Mar. 10:11, 12; Luc. 16:18) Nalawag ngarud a raraemen ni Jesus ti panagasawa ken kayatna a kasta ti aramiden ti sabsabali. Ti lalaki wenno babai a mangidiborsio iti matalek nga asawana gapu iti narabaw a rason sa makiasawa iti sabali ket nakikamalalan. Umiso dayta ta ti diborsio saanna a waswasen ti panagasawa. Iti imatang ti Dios, ti dua ket “maymaysa a lasag” latta. Kanayonanna, imbaga ni Jesus a no ti lalaki idiborsiona ti inosente nga asawana, mabalin a makabasolto ti babai iti pannakikamalala. Kasano? Idi, mabalin a mapilitan ti maysa a naidiborsio a babai a makiasawa manen tapno adda mangipaay iti pinansial a kasapulanna. No aramidenna dayta, makabasol iti pannakikamalala.

10. Ania ti kakaisuna a rason a mabalin a makidiborsio ken makiasawa manen ti maysa a Kristiano?

¹⁰ Imbaga ni Jesus ti pakaibatayan ti pannakawaswas ti panagasawa: “Kunak kadakayo a ti siasinoman a mangidiborsio iti asawana a babai, malaksid no maibatay iti pannakiabig [Griego, por·neiʹa], ket mangasawa iti sabali makaaramid iti pannakikamalala.” (Mat. 19:9) Inulitna dayta a punto iti Sermon iti Bantay. (Mat. 5:31, 32) Iti agpada a situasion, dinakamat ni Jesus ti “pannakikamalala.” Dayta a termino saklawenna ti nagduduma a kita ti seksual a basol a maaramid ti saan nga agassawa: pannakikamalala, prostitusion, panagdenna ti saan nga agassawa, homoseksualidad, ken pannakidenna iti animal. Kas pagarigan, no nakikamalala ti naasawaan a lalaki, mabalin nga ikeddeng ti asawana no idiborsiona wenno saan. No idiborsiona, mawaswas ti panagasawada iti imatang ti Dios.

11. Apay a mabalin nga ikeddeng ti maysa a Kristiano ti saan a makidiborsio uray no adda Nainkasuratan a pangibatayanna?

¹¹ Saan nga imbaga ni Jesus a ti pannakikamalala (por·neiʹa) ti maysa nga asawa ket masapul nga agtungpal iti diborsio. Kas pagarigan, mabalin a pilien ti asawa a babai ti makitipon latta ken lakayna uray no nakaaramid iti immoral ni lakayna. Mabalin nga ay-ayatenna latta; nakasagana a mangpakawan ken makitinnulong ken lakayna tapno mapatibker ti panagasawada. No nakidiborsio ti asawa a babai ngem saan a nakiasawa manen, mabalin a maipasango kadagiti problema. Kasanon ti seksual a kasapulanna? No ngay naliday? Adda kadi annakna nga ikabkabilanganna? Narigrigat kadi a padakkelen dagiti annakna iti kinapudno no makidiborsio? (1 Cor. 7:14) Nalawag ngarud a no makidiborsio ti inosente nga asawa, adu a serioso a problema ti pakaipasanguanna.

12, 13. (a) Ania ti napasamak iti panagasawa ni Oseas? (b) Apay nga inawat manen ni Oseas ni Gomer, ken ania ti masursurotayo iti dayta maipapan iti panagasawa ita?

¹² Makaliwliwa ti kapadasan ni propeta Oseas. Imbaga ti Dios ken Oseas a mangala iti asawa (ni Gomer), nga agbalinto nga “asawa ti pannakiabig ken [maaddaan] iti annak ti pannakiabig.” “Nagsikog [ni Gomer] ket idi agangay nangipasngay [ken Oseas] iti anak a lalaki.” (Os. 1:2, 3) Idi agangay, naaddaan ni Gomer iti anak a babai ken lalaki, a mabalin a bunga ti pannakikamalalana. Uray no maulit-ulit a nakikamalala ni Gomer, saan nga insina ni Oseas. Kalpasanna, pinanawanna ni Oseas ket nagbalin nga adipen. Ngem sinaka ni Oseas. (Os. 3:1, 2) Inusar ni Jehova ni Oseas a mangipakita no kasano a maulit-ulit a pinakawanna ti Israel iti pannakikamalalana iti naespirituan. Ania ti masursurotayo iti daytoy?

¹³ No nakikamalala ti asawa ti maysa a Kristiano, masapul nga agdesision ti inosente a Kristiano. Imbaga ni Jesus nga adda pangibatayan ti inosente nga asawa a makidiborsio ken makiasawa manen. Iti sabali a bangir, mabalinna a pilien ti mangpakawan. Saan a kamali dayta. Inawat manen ni Oseas ni Gomer. Idi nagsublin ni Gomer ken ni Oseas, saanen a mabalin a makirelasion iti sabali a lalaki. Saan a nakidenna ni Oseas ken ni Gomer iti sumagmamano a tiempo. (Os. 3:3) Ngem idi agangay, mabalin a nakidenna manen ni Oseas kenkuana kas panangipakita iti situtulok a panangawat manen ti Dios iti ilina. (Os. 1:11; 3:3-5) Ania ti masursurotayo iti dayta maipapan iti panagasawa ita? No ikeddeng ti inosente nga asawa ti saan a makisina, ipakita dayta ti panangpakawanna. (1 Cor. 7:3, 5) Kayatna a sawen, awanen ti pakaibatayan ti panagdiborsioda. Kalpasanna, masapul nga agtinnulongda kas agassawa a mangipakita iti panangmatmat ti Dios iti panagasawa.

RAEMEN TI PANAGASAWA URAY ADDA PROBLEMA

14. Sigun iti 1 Corinto 7:10, 11, ania ti mabalin a mapasamak iti panagasawa?

¹⁴ Masapul nga ikagumaan ti amin a Kristiano a raemen ti panagasawa, kas iti ar-aramiden ni Jesus ken ni Jehova. Ngem mabalin a marigatan ti dadduma a mangaramid iti dayta gapu ta imperpekto dagiti tattao. (Roma 7:18-23) Gapuna, saantay a masdaaw no adda dagiti Kristiano idi umuna a siglo a nariribuk ti panagasawada. Insurat ni Pablo a “ti babai saan a sumina iti asawana”; ngem adda dagiti gundaway a napasamak dayta.​—Basaen ti 1 Corinto 7:10, 11.

15, 16. (a) Ania koma ti rumbeng nga aramiden ti agassawa uray no adda problema iti panagasawada, ken apay? (b) Kasano nga agaplikar dayta no saan a manamati ti maysa nga asawa?

¹⁵ Saan nga inlawlawag ni Pablo ti makagapu iti panagsina ti agassawa. Ti problema ket saan a gapu ta nakaaramid ti asawa a lalaki iti immoralidad, a pangibatayan ti asawa a babai a makidiborsio ken makiasawa manen. Insurat ni Pablo a ti asawa a babai a makisina iti asawana ket “agtalinaed koma a di makiasawa wenno no saan makikappia manen iti asawana.” Agassawada latta iti imatang ti Dios. Imbalakad ni Pablo nga aniaman ti problema, no awan ti napasamak nga immoralidad, masapul nga agpinnakawanda. Mabalin nga agpatulongda kadagiti panglakayen iti kongregasion. Awan ti dasdasigan dagiti panglakayen, ngem mabalinda ti mangted kadagiti Nainkasuratan a balakad.

¹⁶ Mabalin nga ad-adu ti problema no ti maysa laeng nga asawa ti manamati, a mangikagkagumaan nga agbiag maitunos iti pagalagadan ti Dios. No tumaud ti kasta a problema, ti kadi panagsina ti nainkalintegan a solusion? Kas nadakamaten, ibaga ti Kasuratan a ti seksual nga immoralidad ti posible a pakaibatayan ti diborsio, ngem saan a nangted kadagiti espesipiko a pakaibatayan ti panagsina. Insurat ni Pablo: “Ti maysa a babai nga addaan iti di mamati nga asawa, ket kaskasdi isu umanamong a makipagnaed kenkuana, saanna koma a panawan ti asawana a lalaki.” (1 Cor. 7:12, 13) Agaplikar met dayta iti kaaldawantayo.

17, 18. Apay a saan a nakisina ti dadduma a Kristiano uray nariribuk ti panagasawada?

¹⁷ Ngem kinapudnona, adda dagiti gundaway nga agparang a ti “di mamati nga asawa” ket saanen nga “umanamong a makipagnaed” iti asawana. Mabalin a naranggas unay nga uray la mariknan ti asawana nga agpeggad ti salun-at wenno biagna. Nalabit saanna a kayat a suportaran ti asawana ken ti pamiliana wenno agpeggad ti espiritualidad ti asawana. Kadagiti kasta a kasasaad, adda dagiti Kristiano a nagdesision, nga aniaman ti ibaga ti di manamati nga asawada, saanen nga “umanamong a makipagnaed” ti asawada kadakuada ken kasapulanen a makisinada. Ngem adda dagiti Kristiano nga uray no kasta karigat ti kasasaad, saanda a nakisina; nagibturda ken inkagumaanda a pasayaaten ti bambanag. Apay?

¹⁸ Uray no agsina ti agassawa gapu kadagiti kasta a rason, agassawada latta. No agsinada, maipasango ti tunggal maysa kadakuada kadagiti problema a kas iti nadakamat itay. Nangted ni apostol Pablo iti sabali pay a rason a saan nga agsina ti agassawa. Insuratna: “Ti di mamati a lalaki masantipikar mainaig iti asawana, ket ti di mamati nga asawa a babai masantipikar mainaig iti kabsat; ta no saan a kasta, pudno nga agbalinto a di nadalus ti annakyo, ngem ita nasantuanda.” (1 Cor. 7:14) Adu a matalek a Kristiano ti saan a nakisina iti di manamati nga asawada uray iti nakarigrigat a kasasaad. Mapaneknekanda nga umiso ti kasta nga inaramidda ta nagbalin a manamati ti asawada.—Basaen ti 1 Corinto 7:16; 1 Ped. 3:1, 2.

19. Apay nga adu ti naballigi a pagassawaan iti kongregasion Kristiano?

¹⁹ Nangted ni Jesus kadagiti balakad maipapan iti diborsio, ken nangbalakad met ni apostol Pablo maipapan iti panagsina. Kayatda a raemen dagiti adipen ti Dios ti panagasawa. Iti intero a lubong ita, adu ti naballigi a pagassawaan iti kongregasion Kristiano. Mabalin nga adu ti naragsak nga agassawa iti kongregasionyo. Dagiti matalek nga asawa a lallaki ay-ayatenda ti asawada ken dagiti naayat nga asawa a babbai raraemenda ti asawada. Ipakita dayta a posible nga agbalin a nadayaw ti panagasawa. Maragsakantayo ta minilion ti mangpaneknek a pudno ti sasao ti Dios: “Iti daytoy a rason panawanto ti maysa a lalaki ti amana ken ti inana ket makitiponto iti asawana, ket dagiti dua agbalindanto a maymaysa a lasag.”—Efe. 5:31, 33.