Biag nga Agnanayon—Ti Kalattayo
1 Rinibo a tattao ti nasuruan ni Jesus ken nakasaksi kadagiti tanda nga inaramidna. Anian a pribilehio iti sinagrapda! Iti maysa nga okasion pinakanna dagiti 5,000 a lallaki, saan a naibilang dagiti babbai ken ubbing, babaen iti nawadwad nga abasto iti tinapay ken ikan. Bayat a pinanunot ni Jesus iti pisikal a kasapulan dagiti tattao, nangnangruna a naseknan iti espiritual a kasapulanda. Gapuna, iti sumuno nga aldaw kinunana kadagiti umariwekwek: “Agtrabahokayo, saan a maipaay iti taraon a mapukaw, ngem maipaay iti taraon a mataginayon a maipaay iti biag nga agnanayon.”—Juan 6:27.
2 Kas pudno a Kristiano, kayattayo a suroten iti balakad ni Jesus ken agtrabahotayo a maipaay iti manayon nga espiritual a gunggona. Kaipapanan daytoy nga ilugartayo dagiti material a panggedan idiay paglugaranda ken aramiden a ti kangrunaan a kalat isu ti panagaramid iti pagayatan ti Dios. No kasta, tuladentayo ni Jesus nga ikagumaan a tulongan dagiti sabsabali a mangipateg iti espiritual a bambanag, a ti agnanayon a biag isut’ kalatda.
AKTIBIDAD ITI ENERO KEN PEBRERO
3 Bayat iti Enero ken Pebrero itukontayo dagiti daan a publikasion, agpannuray no ania dagiti adda iti nagduduma a rehion. Kadagidiay lugar nga usarenda iti Ingles, Iloko wenno Tagalog mabalinda nga itukon daytoy Wordlwide Security a libro iti ₱14.00. Dagidiay mangusar iti Cebuano itukonda ti uray True Peace and Security wenno Happiness a libro iti ₱14.00. Dagiti kongregasion a Hiligaynon, Pangasinan ken Samar-Leyte itukonda ti Good News to Make You Happy a libro, iti espesial a gatad a ₱2.50. Dagiti Bicol a kongregasion ti mangitukon iti Truth a libro iti espesial a nababa a gatad a ₱7.00. Kiddawenmi kadagiti amin a suportaranda daytoy espesial a kampania. No addaankayo iti aniaman a newsprint a libro iti pagidulinanyo, mabalin a maitukon dagitoy iti ₱2.50 iti publiko bayat dagitoy dua a bulan.
4 Tapno epektibotayo a mangiranud iti naimbag a damag iti sabsabali, masapul a nakasaganatayo a naimbag. Kabisadotayo kadin iti baro a Topiko a Pagsasaritaan, ken addaantayon iti masinnunuo a puntos a dakamaten manipud iti literatura? Babaen ti panangaramid iti linawas a naituding a panagbasa iti Biblia ken panangusig iti teksto ti kada aldaw, rumang-ay ti espiritualidadtayo, ket adu dagiti naimbag a bambanag a maisao iti ministeriotayo.—Maidilig iti Jeremias 20:9.
5 Adtoy dagiti naisingasing a puntos manipud iti nagduduma a libro a nalabit a kayatyo nga usaren babaen ti panangsurotyo iti Topiko a Pagsasaritaan: Iti Worldwide Security a libro, usarenyo ti ilustrasion idiay pinanid 172 ken 173; iti True Peace and Security a libro, usarenyo ti tsart idiay pinanid 78 ken 79; iti Happiness a libro, ti Kapitulo 15 ket addaan iti naimbag a puntos, manipud panid 140 aginggat’ panid 150; iti Good News to Make You Happy a libro, dakamatenyo ti tsart iti pinanid 148 ken 149; iti Truth a libro, usarenyo dagiti puntos idiay pinanid 94 ken 95.
6 No saan a mangala ti literatura iti bumalay, mabalintayo ti mangibati iti tract wenno handbill a mangtukay ti interesna iti espiritual a bambanag. Wenno mangpataudtayo iti saludsod manipud ti Biblia a pagpanunotan iti bumalay a mabalin a pagsaritaan inton sumarungkartayo manen kenkuana. Mabalin a pumilikayo iti maysa manipud kadagiti adu a salsaludsod a nailawlawag idiay Panakirinnason a libro a maipaay iti daytoy a panggep.
7 Wen, ti kalattayo isu ti matalek a serbisio ken Jehova a maipaay iti biag nga agnanayon iti masanguanan. Iparangarangtayo koma ti panangipateg iti espiritual a bambanag babaen iti aktibidadtayo bayat a pabilgentayo dagiti dadduma iti ayat ken naimbag nga ar-aramid.—Heb. 10:24.