Panangiparang ti Naimbag a Damag—Babaen Dagiti Panagadal ti Biblia
1 Iti daytoy napalabas a tawen ti serbisio ditoy Pilipinas, nasurok a 76,000 a panagadal iti Biblia ti naikondukta iti kada bulan. Nalabit a nakurang bassit a kagudua dagiti agibumbunannag iti daytoy a pagilian ti nakiraman iti daytoy a naragsak nga aktibidad. Siempre, kaipapananna daytoy a ti sabali a kagudua daytoy ket saanda a nakipaset iti dayta. Kasano nga ad-adu pay koma kadatayo ti makiraman iti naisangsangayan a pannakapnek a mangisuro iti dadduma maipapan ti kinapudno?
2 Agsipud ta ayatentayo ni Jehova ken iti kaaruba, kayattayo met nga iranud ti kinapudno iti dadduma. Ngem kasapulantayo ti tulong manipud ken Jehova. (1 Cor. 3:6, 7) Ngarud, saan kadi a nasayaat no umasidegtayo ken Jehova iti kararag ket dawaten kenkuana a tulongannatayo a mangirugi iti maysa a panagadal ti Biblia? (1 Juan 5:14, 15) Kalpasanna masapul nga agtignaytayo a maitunos iti kararagtayo ken makiramantayo a naan-anay iti tay-ak ti ministerio, nga itukon iti panagadal ti Biblia iti uray sadino a pangipaayan ti gundaway.
NAWADWAD A GUNDAWAY
3 Iti kallabes a sumagmamano a tawtawen, minilion a libro, polieto, ken broshur dagiti naipaima kadagiti tattao idiay teritoria. Ti Agbiag nga Agnanayon, Pudno a Talna, ken Kinapudno a libro isudat’ masarakan iti pagtaengan dagiti rinibo a tattao a saan a Saksi ni Jehova. Idatag daytoy iti nalawa a tay-ak ti gundaway a mangirugi kadagiti panagadal iti Biblia.
4 No ti bumalay ket kunaenna a kabisadonan iti trabahotayo wenno addaanen iti literaturatayo, kunaentayo a maragsakantayo iti dayta. (Kitaenyo ti Panakirinnason, panid 20.) No addaanen iti publikasion, kiddawentayo nga iruarna tapno itudotayo kenkuana dagiti benneg a makagunggona kenkuana ken iti pamiliana. No positibo iti panangipangagna, itukontayo iti panagadal ti Biblia.
5 Mabalintayo met nga iyusuat ken ammuen no ti bumalay ket addan literaturada. Kalpasan iti naingayyeman nga introduksion, kunaentayo a gapu iti masansan nga ipapan kadakuada, adun kadagiti kaaruba ti addaanen iti pagbasaantayo. Mabalin ngarud nga amaden iti bumalay no addaandan iti dayta. No addan, kiddawen kadakuada no mabalin a makita ket itukon ti panangipakita kadakuada no kasano a maadal dayta. Ti maysa nga ababa a demostrasion ti agresulta iti maysa a panagadal ti Biblia. No awanan pay iti literaturatayo, mabalintayo nga ipresenta iti agdama a tukon wenno kiddawen kenkuana a diretsa no ti pamiliana ket kayatna iti libre a panagadal ti Biblia iti pagtaenganda.
USAREN TI PANNAKAAWAT
6 Idinto ta kupado dagiti tattao, nainsiriban iti panagbalin a mannakaawat ken ditay koma aglabes nga agpaut iti panangabrasada kadatayo. Nalabit a kadagiti umuna a panagadal ti malimitaran laeng iti 15 a minutos. No ti bumalay ket ammona a saan a mataktak iti nawadwad a tiempona, manamnama a situtulok nga umawat kadatayo iti regular a sarungkartayo. Apaman a maipasdek iti panagadal ken napatanor iti interes ti bumalay, mabalin a maiyatiddogton iti tiempo ti panagadal.
7 Addada pay laeng dagiti marakarnero a tattao idiay tay-ak nga agkasapulan iti tulong, ken adu kadakuada ti addaanen iti pagbasaantayo. Awan duadua a dadduma kadakuada ti agladingit ken agsinnaay kadagiti makarimon a bambanag a maar-aramid ditoy daga. (Ezek. 9:4) Maysa a pribilehio kadatayo ti saan laeng nga agiwaras iti literatura ngem ikagumaan met a danonen iti puspuso dagiti nasingpet a tattao a buyogen ti kinapudno babaen iti panagadal ti Biblia.—Mat. 28:19, 20.