Agalistoka a Mangitukon ti Estoria ti Biblia a Libro
1 Anian ti panagyamantayo kadagiti literatura ti Biblia a kanayon nga it-ited ni Jehova baeten ti organisasionna! Ipatpategtayo la unay daytoy nga espiritual a taraon, gapu ta no basaentayo daytoy a siaannad, ti apresasiontayo ken ni Jehova ken kadagiti panggepna ket dumakkel.
2 Dagiti personal a gunggona a maw-awattayo tignayendatayo nga iburay met kadagiti dadduma dagiti naimbag a bambanag a naadaltayo. (Mat. 24:14) Pagreggetantayo nga ipaima dagiti publikasion ti Sosiedad kadagiti amin a tattao a masabettayo. Daytoy ket tumulong met kadakuada a mangadal kadagiti kinapudno a linaon dagitoy a publikasion. No naan-anay ti panagsaganatayo ken alertotayo a mangipresenta ti madama a tukon ti literatura, mabalin a makatulongtayo kadagiti nasingpet-panagpuspusona a tattao nga agkamang ken ni Jehova ket makikaduada kadatayo iti serbisiona.
ITI BINALAY-BALAY
3 Kabayatan ti Disiembre itukontayo ti Estoria ti Biblia a libro iti kontribusion a ₱48.00. Maysa a baro a topiko a pagsasaritaan ti maisusuhere a mausar a kadua daytoy a tukon, a napauluan ti “Apay a Basaen ti Biblia?” Kalpasan nga ipakita iti bumalay dagiti magunggonana ken ti pamiliana iti regular a panagbasa ti Biblia, ti libro mabalin a maipresenta kas maysa a simple a wagas a pangadal ti tema ti Biblia ken nangnangruna para ti panangisuro kadagiti ubbing.
4 No dagiti tattao ket talaga nga adu ti trabahoda mabalin a tarigagayantayo a diretso nga itukon ti libro kas naisuhere idiay pinanid 19 ken 20 iti Panakirinnason a libro. Kalpasanna makaaramidtayo kadagiti urnos a sumubli iti mas kumbiniente a tiempo. Daytoy ti mangipakitat’ konsiderasion iti kasasaad ti bumalay.
5 Ania ti maaramidan no ti maysa a tao ket addaanen ti libro nga Estoria ti Biblia? Apay a dikay iyaplikar ti prinsipio ti 1 Corinto 3:6-9? Ti bukel ket naimulan. Usarem ti gundaway a mangsibug iti bukel babaen ti panangitedmo ti kanayonan a pammaneknek. Wenno makunam: “Maragsakanak ta adda kenkan ti kopia daytoy a libro. Awan duadua a naragsakanka a nangbasbasa iti dayta. No mabalin, kayatko nga ipakita kenka no kasano a makaalaka pay ti ad-adu a gunggona manipud iti libro. Mabiit laeng.” Kalpasanna idemostra no kasano nga adalen ti Biblia babaen iti tulong ti publikasion. Laglagipem, ti kangrunaan a kalattayo isu ti “panangaramid kadagiti ad-adalan.”—Mat. 28:19.
IMPORMAL A PANANGASABA
6 Kasapulan nga agalistotayo met a mangitukon ti libro nga Estoria ti Biblia kadagiti bisita, kakabagian, katrabahuan, kaeskuela, tattao a masabettayo no mapantayo makitienda, ken kadagidiay masabettayo kadagiti lansangan no addatayo iti tay-ak ti pangasabaan. Agplano a nasakbay, nga adda kenka ti libro tapno sisasaganaka a mangitukon no rumsua dagita nga okasion. Adu dagiti pagimbagan a magun-odan babaen ti impormal a panangasaba.—1 Ped. 3:15.
7 Ti organisasion ni Jehova impaayannatayo iti nagsayaat a literatura nga usarentayo. Ti siaalibtak a panangabrasa kadagiti gundaway a mangitukon iti dayta tulongannatayo a mangitandudo iti nagan ni Jehova.—Sal. 34:3.