Pabilgen ti Pammati iti Sao ti Dios
1 No bilang adda panawen a kasapulan ti nabileg a pammati, isu itan. Adu a tattao awanandat’ pammati a pulos ken awan namnamada iti masanguanan. Dagiti narelihiusuan ken napolitikaan a pangulo naruamdan a mangpatpatanor kadagiti ulbod a namnama ket agsennaay unay ti adu a tattao. Pudno unay, kas iti impalawag ni apostol Pablo, “Ti pammati saan nga ik-ikutan dagiti amin a tattao.” (2 Tes. 3:2) Nupay kasta, ti pammati ket ik-ikutan dagiti Saksi ni Jehova. Adda ti naan-anay a talektayo a dagiti kari a masarakan iti Sao ti Dios ket matungpalda.
2 Ti nabileg a pammati igiddiatna dagiti Saksi ni Jehova iti dadduma a tattao. Tignayenna dagiti naimbag nga ar-aramid a makaited ti pagimbagan dagiti dadduma ken kadatayo met, bayat nga idaydayawtayo ti Dios. Ti kasta a pammati agresulta manipud iti panangipalubos iti Sao ti Dios a maaddaan puersa iti biagtayo. Ti moderno-nga-aldaw nga internasional nga panagkakabsat dagiti pudno a Kristiano ipakitana iti pateg ti panangpabileg iti pammati ti Biblia kas napaltiingan a Sao ti Dios.—2 Tim. 3:16.
APAY A TULONGAN DAGITI DADDUMA A MANGPABILEG TI PAMMATI
3 Gapu ta agpegpeggad dagiti biag, addaantayo ti napigsa a rason a tumulong kadagiti dadduma a mangpabileg ti pammatida. Gapu itoy a rason, kabayatan ti Nobiembre itukontayo Ti Biblia—Saot’ Dios wenno iti Tao? iti umuna a gundaway. Ti panggep daytoy a libro isut’ panangtulong kadagiti tattao a mangkita a ti Biblia Sao ti Dios. Ilawlawagna ken parmekenna dagiti adu a palso a pammabasol kontra iti Sao ti Dios. Itedna dagiti makapnek a sungbat kadagiti sumagmamano a salsaludsod, a kas iti: Ti Biblia aya ket saan a sientipiko? Konkontraenna kadi ti bagbagina met laeng? Sarsarita ken leyenda kadi laeng dayta? Dagiti milagro a nadakamat iti Biblia pudnoda kadi a napasamak? Napaneknekan kadin ti arkeolohia a historikal a di umiso ti Biblia? Kanayonan pay, daytoy a publikasion ipresentana dagiti adu a naimbag a prueba iti pannakapaltiing iti Biblia. Iyegna met ti atensiontayo kadagiti di agmintis a padto ti Biblia ken ti nakaskasdaaw a sangsangkamaysa a panagtutunosna.
4 Ti praktikal a sirib ti Biblia ken ti pannakabalinna a mangpaimbag kadagiti tattao ket paset laeng ti ebidensia a mangpaneknek a ti Biblia ket Sao ti Dios. Responsibilidadtayo ti tumulong kadagiti tattao a mangadal iti daytoy nga ebidensia. Tapno maaramid daytoy, umuna a suruantayo pay isuda a mamati kadagiti ibagbaga ti Biblia.
5 Mabalbalin a babaen iti panagadal ti Biblia iti pagtaengan a natulongantayo a mangpatibker ti pammati iti Sao ti Dios. No nagunggonaantayo manipud panangyadal ti sabali kadatayo, kayattayo ngarud ti sumubli a dagus kadagidiay nakaipaimaantayo iti literatura ket itukon kadakuada iti panagadal ti Biblia iti pagtaengan tapno matulonganda a mangpabileg ti pammatida.
TI BARO A LIBRO PABILGENNA TI PAMMATI
6 No sipupudno a palutpotenna ti ebidensia, awan ti napasnek a tao a saanna nga awaten a ti Biblia ket Sao ti Dios. Daytoy a baro a libro ipresentarna ti adu kadagita nga ebidensia iti maysa a nalaka-a-matarusan a wagas. Kayattayo a pabilgen dagiti dadduma nga awatenda ti Biblia kas Sao ti Dios ket agbiagda babaen kadagiti napaltiingan a balakadna. Dagidiay mangar-aramid iti kasta sirarag-o nga iyebkasda ti naimpusuan a kararag ti salmista: “O kitaem ti panagayatko kadagiti bilbilinmo. O Jehova, sigun iti kinamanagayatmo pagbiagennak. Ti pakadagupan ti saom isu ti kinapudno, ken tunggal maysa kadagiti nalinteg a hudisial a desisionmo agnanayon.”—Sal. 119:159, 160.
7 Bayat ti Nobiembre, maparegtatayo dagiti dadduma a mangbasa ken mangadal ti Sao ti Dios babaen ti panangitukon iti libro a Ti Biblia—Saot’ Dios wenno iti Tao? iti kontribusion a ₱16.00.