Panangiparang ti Naimbag a Damag—Buyogen ti Pannakaawat
1 Ni apostol Pablo impaganetgetna ti pannakasapul ti pannakaawat iti panangiparang ti naimbag a damag kadagiti tattao a nagduduma ti pammatida. Iti kaaldawantayo, sumagmamano a tattao kunaenda a relihiusoda, bayat a dagiti dadduma awan interesda iti naespirituan ken saanda nga apresiaren dagiti espiritual a bambanag. Bilang agibumbunannag ti naimbag a damag, kasapulan a pagbalinentayo ti mensahe ti Pagarian a makaay-ayo kadagiti “tattao ti amin a kita” babaen ti panangusar ti pannakaawat iti ministeriotayo.—1 Cor. 9:19-23.
PANANGTARUS ITI BUMALAY
2 Ti panangusar ti pannakaawat idiay ministeriotayo ramanenna ti abilidad a mangibagay ti presentasiontayo kadagiti interes ti bumalay. Daytoy kasapulanna ti nasayaat a panagsagana babaen ti pannakaammo a nalaing kadagiti adu a nagduduma a suheto a naisalaysayen kadagiti publikasiontayo.
PANANGIBAGAY KADAGITI PRESENTASIONYO
3 No iti iseserrekmo iti balay ket makitam dagiti ay-ayam wenno ub-ubbing, mabalin a luktam ti agdama a Topiko a Pagsasaritaan babaen ti panagkunam: “Makisarsaritakami kadagiti nagannak ditoy lugaryo maipapan kadagiti pagalagadan nga ipapaayda kadagiti annakda. Adu a nagannak maaburidoda maipapan iti kinakurang ti moral a giya para kadagiti ubbing kadagiti pageskuelaan. Napaliiwmo kadin ti maysa kadagitoy a problema?” Denggem ti sungbat ti bumalay. No ti sungbat ipakpakitana a ti bumalay ket adda relihiuso a punto-de-vistana, mabalin nga ituloymo: “Makapainteres a ti Biblia ipakitana a kasapulantayo ken dagiti annaktayo ti umawat ti masirib a direksion. Kitaenyo no ania ti naibaga ditoy Proverbio 14:12.” Kalpasan a nabasam ti kasuratan, mabalin a kunaem: “Iti saan pay a nabayag nakabasaak ti maysa a banag a nangipaganetget no kasano kapraktikal ti balakad ti Biblia para kadatayo.” Ilukatmo Ti Biblia—Saot’ Dios wenno iti Tao? idiay panid 174 basaem ti maudi a parapo iti kapitulo. Itukonmo ti libro iti ₱16.00.
4 No ti sungbat ti bumalay ket ipakitana a saanna nga ipatpateg ti balakad ti Biblia, maipakitam ti pannakaawat babaen ti panangritubarmo ti presentasionmo a kunaem: “Mabalin kadi a maammuak no apay a nagtengam dayta a konklusionmo?” Kalpasan a nangngegmo ti sungbat, mabalin nga ituloymo: “Matarusak no apay a kasta ti panagriknam. Kinapudnona, di pay a nabayag adda nabasak ditoy a publikasion a siguradok a makapainteres kenka.” Ilukatmo idiay panid 6 ken basaem ti parapo 3 ken 4. Kasta met, basaem ti umuna a sentensia idiay parapo 5 ti panid 7. Saludsodem iti bumalay no kayatna a maammuan no ania ti bigbigbigen dagiti dadduma a tattao bilang pammaneknek iti kinaumiso ti Biblia.
5 Kabayatan nga agsagsaganatayo ken mangipakpakitatayo ti pannakaawat iti serbisio ni Jehova, mabalintayo a makuna a kas ken ni apostol Pablo, “Nagbalinak nga isuamin kadagiti amin a klase dagiti tattao, tapno kadagiti isuamin a pamay-an maisalakanko dagiti dadduma.”—1 Cor. 9:22; Prov. 19:8.