Panangiparang ti Naimbag a Damag—A Buyogen iti Pannakaawat
1 Maysa a naipaltiing a proberbio kunaenna: “Siasinoman a saluadanna iti pannakaawat makasarakto ti naimbag.” (Prov. 19:8) Ti kinasirib dagitoy a sasao isut’ masansan a mapatalgedan a pudno iti panangasaba a trabahotayo. Kas ehemplo, babaen ti panangusar iti pannakaawat ken taktika, adu nga agibumbunannag ti nakasumra kadagiti pangontra a nagtinnag iti gundaway a maipaay iti kanayonan a pammaneknek. Kasano a maaramid daytoy?
PANANGSANGO KADAGITI PANGONTRA
2 Masansan a masabettayo dagiti tattao nga agkuna, “Adut’ trabahok.” Pudno kadi a daydiay bumalay ket adu ti trabahona, wenno kunana laeng dayta agsipud ta saanna a kayat ti mairaman iti atiddog a diskusion? Kasapulan ti pannakaawat. No agparang a saan unay a kupado, padasentayo a parukmaen daytoy pambarna. Mabalintayo a kunaen, “No kasta saanak ngarud nga agbayag.” Kalpasanna, mabalintayo a sumariaen no ania daydiay rantatayo koma nga ilawlawag, a sipapanunottayo iti katulagan a mabiittayo laeng. Kas resulta ti konsiderasiontayo ken makaawis iti interes a komento, mabalin a daydiay tao ket ipariknana a kayatna nga agtultuloy ti diskusion iti dayta a kanito.
3 Kasano ngay no daydiay nadanon ket pudno a kupado. No napilit wenno manangtaktaktayo, makaibatitayo iti saan a napaboran nga impresion. No ti bumalay ket sumabat iti ruangan nga awitna dagiti kagawaan ti panagluto ken masay-optayo daydiay taraon a lutlutuenna, nabatad a pudno a kupado. Gapuna a ti pannakaawat ken naimbag a pananghusga isut’ kasapulan. Saan a nakonsiderar ti mangipapilit a makisao iti dayta a tiempo. Nasaysayaat no ti bumalay ket maikkan laengen iti tract ken maisingasing a subliantayo iti saan a mabayag. Mangibati daytoy iti napaboran a rikna, ket mabalin a maysa a naimbag a pammaneknek ti maited iti sumaruno nga ipapan ti maysa a Saksi.
PANAGTIGNAY ITI KAPANUNOTAN TI MAYSA A TAO
4 Adda okasion a makasabattayo kadagiti nagubsang a tattao no mapantayo kadakuada. Ania ti aramidentayo iti daytoy a pasamak? Imbalakad ti Proverbio 17:27: “Ti tao a mannakaawat ket nalamiis ti espirituna.” Anian a nagsayaat a balakad! Ti nabannayat a timek a mangiyebkas iti pannakaseknan ti masansan nga mamagkalma iti kasta a tao. Mainayon pay, no nainsiriban a mapagsaotayo a mangibaga no ania iti banag a pakaseknanna, nalabit a maksayan ti kinaingarna. Uray pay gupdenna ti saritaan, posible a ti naemma a panagsungbattayo ket makaibati iti nasaysayaat a sukog ti panunotna maipapan iti trabaho dagiti Saksi ni Jehova. Naimbag dayta a naaramidan. Siempre, no ti bumalay ket marurod ken makaunget, kasayaatan a banag no agpakadakayo a sitatalna ket nalabit a padasenyo manen a kasabaan iti masanguanan.
5 Kabayatanna, adda met dagiti tattao a mannakisuppiat, ngem nalabit a napudno. Kadagitoy a sirkumstansia, maysa a pakasuotan iti panaganus no agtultuloytayo a makisao kadakuada. Ngem no mannakaawattayo, saan a madadagus a kunaen a ti bumalay ket saan nga interesado gapu laeng ta sibibileg nga insikkirna ti naiduma a panangmatmatna. Mabalin a maipaayantayo kadagiti nataktikaan a saludsod tapno mairuarna dagiti rason no apay a kasta ti panamatina ket kalpasanna maipakita kenkuana no ania met ti makuna iti Biblia maipapan dayta a tema. (Prov. 20:5) Maibatay iti tignayna, maikeddengtayo no adda pagimbaganna a maitultuloy ti saritaan.
6 Ti mannakaawat nga agibumbunannag mabigbigna a ti tiempo ken kasasaad ket masansan a baliwanna iti kapanunotan ti bumalay maipapan iti damag ti Pagarian. Ti tignayna isut’ mabalin a maiduma inton sumaruno a sarungkar kenkuana. Annadan koma iti panagkuna a negatibo manen ti panangawatna gapu iti kababalin daytoy a tao iti napalabas a pannakasarak kenkuana iti ruanganda.
7 Ti panangeddeng no itultuloy ti makisao ket saan a nalaka. Nupay kasta, babaen ti panangpatanor iti arte wenno laing a mangisuro, agbalintayo nga epektibo a mangiparang iti naimbag a damag a buyogen ti pannakaawat, bayat nga ipudertayo ken Jehova a bendisionanna iti regtatayo.—1 Cor. 3:6; Tito 1:9.