Agmasiribkayo—Iyaplikaryo dagiti Bambanag a Maadalyo
1 Maysa a kalat iti gistay amin a tao ti agbiag a naragsak, iti natalna a panagbiag. Rinibo a libro ken artikulo iti mangted ti balakad no kasano a naballigi iti panagasawa, no kasano ti panangpatanor iti annak, no kasano ti panagballigi iti pinansial, no kasano a magun-odan ken masalimetmetan iti naimbag a salun-at, ken dagiti nawadwad pay a sabali a suheto a naisinggalut iti panangtulong kadagiti tattao a mangragpat iti kinaragsak. Agpapan pay dagiti dadduma a praktikal a sirib ket masarakan kadagiti nailubongan a publikasion, kaskasdi a dagiti tattao ditoy lubong ket saanda a naragsak ken natalna. Apay a kasta?
2 Ti sungbat isut’ masarakan iti Biblia idiay Proverbio 1:7, a nagkuna: “Ti panagbuteng ken Jehova isut’ punganay iti pannakaammo. Ngem dagiti maag laisenda iti sirib ken disiplina.” Saan a manamnama iti maysa a tao ti talna ken ragsak no saanna a bigbigen ken raemen iti Gubuayan ti umiso a pannakaammo ken sirib, ni Jehova.
3 Ti lubong ket pimmanglaw iti naespirituan—agsagsagaba iti bisin. Iti pagdaksanna, daytoy a naladingit a kasasaad dagiti bambanag ket gapuanan met laeng iti tao, idinto ta ti espiritual a taraon ket mabalin met a magun-odan iti amin a paset daytoy daga, ket libre a maala dayta. (Prov. 1:20, 21; Apoc. 22:17) Agsipud ta dagiti tattao ditoy lubong ket nagtukkiadda iti sirib manipud ken Jehova, agtultuloyda a maidaramudom iti espiritual a kinasipnget. (Prov. 1:22-32) Iti sabali a bangir, kas tattao ni Jehova, bayat a raemen iti linteg ken surotentayo iti bilbilinna, mataraonantayo a naimbag iti naespirituan ken naragsaktayo. (Isa. 65:13, 14) Kasta met, ti ayat nga isut’ naruay iti organisasion ti Dios isut’ mangipabigbig kadatayo a kas pudno a disipulo ni Kristo. (Juan 13:35) Wen, ti sangalubongan a panagkakabsat dagiti Saksi ni Jehova isut’ mangted iti nabiag a pammatalged nga al-alagadentayo iti sursuro ti Biblia a kas nainsiriban a kurso a suroten.
4 Kaskasdi, dadduma kadagiti naitimpuyog iti organisasion ni Jehova ti saan a makasagrap iti ragsak a masapul koma a maadda kadakuada. Nalabit a dangranda pay iti ragsak dagiti dadduma iti aglawlawda babaen iti sao ken aramidda. Apay a kastoy ti mapasamak? Maigapu laeng iti saanda a panangiyaplikar iti sirib ti Dios kadagiti bibiagda. Mabalin a tumabunoda kadagiti gimong, kadagiti asamblea ti sirkito, ken kadagiti kombension ti distrito. Nalabit a naabanteda iti kunaen dagiti publikasion ti Sosiedad, ngem iti istilo ti panagbiagda ken iti kababalinda a makilangen iti sabsabali, agraman dagiti padada a Kristiano, ket saanda nga isilnag iti aplikasion ti kinapudno a naadalda. Ania ti masapul a maaramid? Dagitoy a tattao ti masapul a mangipamaysa iti “panagmula a maipaay iti espiritu” tapno makaparnuayda iti pudno a ragsak iti mismo a bibiagda ken makaipaayda met iti ragsak dagiti adda ti aglawlawda.—Gal. 6:7, 8.
NO ANIA TI IYAPLIKAR
5 No ti maysa kadatayo ket agpammayan, saan nga agannad, ken paallilaw ken Satanas, ti lubong, wenno iti imperpekto a lasagtayo, mapukawtayo iti rag-o iti nasinged a relasiontayo ken Jehova. Itan, a nakarkaro ngem iti napalabas, masapul nga alertotayo a mangiyaplikar kadagiti bambanag a maadaltayo kadagiti gimong ti kongregasion ken kadagiti asamblea agraman dagiti amin a sabsabali a parabor iti organisasion. Daytoy lubong a pagbibiagantayo isut’ maysa a napeggad a lugar a kanayon nga adda panagbalbaliwna. Masapul a naridamtayo a mangalagad iti pammagbaga ni Jehova a siaayat nga ipapaayna babaen iti “matalek ken naannad nga adipen,” a bigbigen daytoy a kas taraon iti umiso a tiempo.—Mat. 24:45-47.
6 Iti agdama a programa a maipaay iti aldaw ti espesial nga asamblea, nawadwad nga impormasion ti maipaay no kasanotayo nga agtakder a kas maysa nga arban. Naited dagiti praktikal a singasing no kasano a magubat dagiti makapakapoy nga impluensia, a kas kadagiti makaupay a sirkumstansia, ti nailubongan nga espiritu iti kinaindependensia, ken dagiti makasinga a bambanag a pagpalnedan ti oras. Al-alagadentayo kadi dagiti naimbag a pammagbaga nga agtalektayo a naan-anay ken Jehova ken iti danana, a bigbigen ken agpaituraytayo iti teokratiko nga autoridad, a napakumbaba ken natimbengtayo, a gatangen iti nagundawayan a tiempo a maipaay iti teokratiko nga ar-aramid? (Mik. 6:8; Efe. 5:15, 16; Heb. 6:10; 13:17) Agtitinnulong aya dagiti miembro ti pamilia a mangiyataday iti bagbagida iti Kristiano nga istilo ti panagbiag? Ti panagpili iti paglinglingayan, ti urbanidad, ken iti inaldaw a rutina iti ar-aramid ti masapul nga apektado babaen dagiti balakad a maawat manipud iti Kasuratan. Malaksid no adda napinget a regget a mangiyaplikar iti bambanag a maadal, bassit laeng wenno awan pay ketdi iti espiritual a progreso, ket ti talna iti panunot ken ragsak isut’ apektado unay.—Fil. 4:7-9; Sant. 1:22-25.
7 Ti napamaysa a pinget a maipaay iti personal ken napamiliaan a panagadal isut’ kasapulan. Ti Watch Tower Publications Index isut’ makaiwardas kadatayo iti detaliado nga impormasion maipapan iti aplikasion dagiti prinsipio ti Biblia. Daydiay Iyimtuod ti Agtutubo a libro isut’ maysa met nga ekselente a bumadang kadagiti nagannak a tumulong iti annakda a mangsaranget iti daytoy komplikado a sataniko a lubong. Babaen ti panagkonsulta iti daytoy a material, maalatayo dagiti panangmatmat ni Jehova kadagiti bambanag ken maidalantayo babaen kadagiti nalinteg a prinsipio. Ti saan a panangaramid iti daytoy isut’ umasping iti kaadda ti medisina a maipaay iti sakit ngem saan a tumaren dayta, nupay ammotayo nga isut’ mangpagin-awa iti sagubanittayo. Ti regular a personal ken napamiliaan a panagadal isudat’ mangpadakkel iti pammati ken mangpakired kadatayo nga agibtor. Iti tiempo ti pannakasuot, saanto a malaylay ti pammatitayo, nga isut’ mamagtallikud kadatayo.—Mat. 13:6; Luc. 8:13; Heb. 2:1.
8 Dagiti panglakayen ken ministerial nga adipen ti masapul a mangiyulidan iti panangaywan kadagiti sangakabalayanda. Ramanenna daytoy iti panangtulong kadagiti assawa a babbai ken annak a mangiyaplikar kadagiti bambanag a maadalda manipud iti Sao ti Dios ken iti organisasion tapno bumilegda iti naespirituan. Iti kastoy a wagas, ti intero a sangapamiliaan ket agbalin nga ehemplo iti Kristiano a panagbiag ken mangted iti pammaregta iti dadduma iti uneg ken ruar ti kongregasion.—Efe. 6:4; 1 Tim. 3:4, 12, 13.
NO SIASINO TI TUMULONG
9 Kadagidiay tumabtabuno iti Memorial ti kada tawen adu kadakuada iti agkasapulan ti pammaregta a mangiyaplikar iti maadalda ken makitimpuyogda a siaaktibo iti organisasion. Maipakita ti naayat a konsiderasion kadagiti estudiantetayo iti Biblia babaen ti panangisuro kadakuada no kasano a maiyaplikar dagiti prinsipio ti Biblia iti bibiagda ken no kasano a maalagad dagiti nalinteg a bilbilin ti Dios. Masapul nga idemostra ti pannakaseknan kadagidiay agprogreso nga agbalinen a kakabsat a lallaki ken babbai iti pammati.
10 Siasinoman a nagbalin nga iregular ken inaktibo ti masapul a matulongan a kumita iti panagkasapulan a makiraman a regular iti aktibidad a kadua ti organisasion. Masapul a magun-odda manen ti talna ken ragsak a sinagrapda iti napalabas idi nga agserserbida pay a naan-anay ken Jehova. (Juan 13:17) Babaen ti naanus a panangtulong kadakuada a mangpasged iti panangipategda ti kinapudno ken “idatonda iti Dios ti sakripisio iti panagdaydayaw,” mabalinda nga iyaplikar dagiti bambanag a maadalda ken agintekda iti dana ti biag.—Heb. 13:15; kitaenyo ti Our Kingdom Service, Agosto 1979, panid 3 ken Abril 1977, panid 3 iti Iloko.
11 Amin dagiti tattao iti Dios ti masapul a makidanggay a magna iti napardas ti panagtignayna nga organisasion ni Jehova. Ditay koma palubosan a maallukoytayo iti panagdungsa. Masapul a salimetmetan ti espiritualidadtayo, a makibansagtayo iti kaudian nga impormasion nga ipaay ti organisasion ti Dios ken sidadaantayo a mangalagad iti dayta. Kaipapananna daytoy ti panagregget ken panagsakripisio no dadduma. Ngem saan a kiddawen ni Jehova kadatayo daydiay banag a ditay kabaelan nga aramiden. Isu ti Namarsuatayo, ket ammona no ania iti kasayaatan kadatayo. Paneknekantayo ngarud iti bagbagitayo a masirib babaen ti panagtultuloy a paisuro ken Jehova ken iyaplikar dagiti bambanag a maadaltayo. Daytoy ti mangyeg iti dayaw kenkuana ken agresulta iti agnanayon a gunggona kadatayo.—Isa. 48:17; 54:13.