Agbalinkayo a Nalaing iti Ministerioyo
1 Pinaregtanatayo ni apostol Pablo a mangpalaing iti ministeriotayo. Insuratna: “Aramidem ti amin a kabaelam a mangidatag iti bagim a naanamongan ti Dios, kas maysa a trabahador nga awan ti ibainna, nga aramatem iti sao ti kinapudno iti umiso.”—2 Tim. 2:15.
2 Ti kinalaing iti ministerio isut’ magun-odan. Gapuna, masapul nga ‘aramiden ti amin a kabaelantayo’ no kayattayo ti agbalin a nalaing a ministro. Ngem ania ti tumulong kadatayo?
MAKAADALKAYO MANIPUD SAO TI DIOS
3 No mas kabisadotayo no ania iti isursuro ti Biblia, mas epektibo met iti ‘panangaramat iti sao ti kinapudno iti umiso.’ Gapuna a nasken ti panangitiempo iti personal a panagadal.—1 Tim. 4:15, 16.
4 Kasapulantayo met “ti subra ngem iti gagangay nga asikaso” kadagiti instruksion a maawat manipud kadagiti gimong ti kongregasion. (Heb. 2:1) Dagiti ekselente a mapagsasaritaan a puntos a maipaay iti ministerio ti mailawlawag kadagiti palawag iti publiko wenno iti Panagadal ti Libro iti Kongregasion. Ti Teokratiko a Pagadalan iti Ministerio isut’ mangted kadatayo iti nabalor a pannakasanay tapno agbalintayo a nalaing a maestro, bayat a ti Gimong iti Serbisio ket mangipaay met iti singasing ken demostrasion a bumadang kadatayo nga agbalin a mas propisiente a ministro.
IYAPLIKARYO DAGITI SINGASING
5 Imbaga ni Pablo iti kongregasion ti Filipos nga alagadenda no ania iti naadalda manipud kenkuana. (Fil. 4:9) Kasapulan met nga aramidentayo dagiti bambanag a maadaltayo babaen iti organisasion ni Jehova. Kas ehemplo, idiay Hulio 15, 1988 a Watchtower, pinanid 15-20, naadaltayo dagiti wagas no kasanotayo a mapataud a “baro” a teritoria dagiti lugar a masansan a matrabaho. Mainayon iti panangigunamgunam iti panagkasapulan iti presko, makaapelo nga iyaasideg, imparegta iti artikulo kadatayo ti panangiruam kadagiti bumalay a namnamaenda iti regular a panagsarungkartayo. Naited ti balakad maipapan iti kinaan-anay a panangsarak kadagiti nagduduma nga agnanaed iti isu met laeng a balay. Babaen ti panangiyaplikar kadagitoy a singasing, maparang-ay iti laingtayo iti ministerio.
6 Kanayon kadi nga usarentayo iti Panakirinnason a libro iti ministerio? Dagiti naisingasing nga introduksion ken iti benneg dagiti sungbat kadagiti pangontra isudat’ mangpatadem wenno mangasa iti laingtayo. Mainayon pay, ti panagasaas iti Topiko a Pagsasaritaan ken ti panangipresenta iti tukon ket makaipaayda met iti balligi ti ministerio.
7 No kayatyo pay dagiti mainayon a singasing, umasidegkayo iti manangaywan ti serbisio wenno iti konduktor ti panagadal iti libro tapno agpatulongkayo kadakuada. Kabaelantayo amin a parang-ayen iti laingtayo a kas ministro, nga “aramaten iti sao ti kinapudno iti umiso,” a daytoy ti mangyeg iti dayaw ken Jehova a Diostayo.—Juan 15:8.