Ar-aramatenyo Kadi a Siuumiso ti Sao ti Dios?
1 Ni Jesu-Kristo ti katan-okan pay laeng a mannursuro a nagbiag ditoy daga. Nasagidna ti puso dagiti tattao, natukayna ti riknada, ken natignayna ida nga agaramid iti naimbag. (Mat. 7:28, 29) Kanayon nga inusarna ti Sao ti Dios a kas pangibasaran iti sursurona. (Luc. 24:44, 45) Nangituyang ni Jesus iti nagsayaat a pagtuladan dagiti pasurotna babaen ti panangaramatna a siuumiso iti Sao ti Dios.—2 Tim. 2:15.
2 Maysa met ni apostol Pablo a nagpaiduma nga ulidan iti epektibo a panangaramat iti Sao ti Dios. Saanna laeng a binasa ti Kasuratan kadagiti sabsabali; inlawlawag ken inrasonanna dagiti binasana, a pinaneknekanna manipud iti Sao ti Dios a ni Jesus ti Kristo. (Ara. 17:2-4) Kasta met, “nalaing iti Kasuratan” ni adalan nga Apolos, ket inaramatna ida a siuumiso a nangidatag iti kinapudno.—Ara. 18:24, 28.
3 Agbalinkayo a Mannursuro iti Sao ti Dios: Dagiti moderno-aldaw a manangiwaragawag iti Pagarian nasayaat ti resulta ti panangisuroda kadagiti tattao babaen ti panangaramat ken pannakirinnason manipud iti Biblia. Iti maysa a gundaway, nabalinan ti maysa a kabsat nga inusar ti Ezequiel 18:4 ken dagiti mainaig a teksto a nakirinnason iti maysa a pastor ken iti tallo a pasurotna maipapan iti pagtungpalan dagiti nadangkes ken nalinteg. Kas resultana, rinugian ti dadduma kadagiti miembro ti iglesiana ti nagadal, ket idi agangay maysa kadakuada ti nangawat iti kinapudno. Iti sabali a gundaway, nakiddaw ti maysa a kabsat a babai a mangilawlawag iti bumusbusor nga asawa a lalaki ti maysa nga interesado a tao no apay a saan a rambakan dagiti Saksi ni Jehova ti Krismas ken dagiti kasangay. Bayat a direkta a binasana dagiti Nainkasuratan a sungbat manipud iti libro a Panakirinnason, inyebkas ti lalaki ti iyaanamongna. Naragsakan unay ni baketna, a kinunana: “Umaykaminto kadagiti gimongyo.” Ket immannugot ni lakayna!
4 Usarenyo ti Tulong a Magun-odan: Matulongannatayo Ti Ministeriotayo iti Pagarian ken ti programa iti Gimong ti Serbisio a mangaramat iti Sao ti Dios. Adu nga agibumbunannag ti nangyebkas iti apresasionda iti nagduduma a presentasion a naipablaak ken naidemostra a pakagunggonaantayo. Naglaon ti Panakirinnason Manipud Kadagiti Kasuratan iti adu a singasing no kasano a mailawlawag a siuumiso ti nasurok a 70 a kangrunaan a topiko manipud iti Sao ti Dios. Mangipaay ti Pannakaammo a Mangiturong iti Biag nga Agnanayon iti ababa a sumaria dagiti amin a pamunganayan a sursuro ti Biblia a kasapulan a maawatan dagiti agdadamo. Ipakita kadatayo ti Adalen 24 ken 25 iti Giya ti Teokratiko nga Eskuelaan ti Panagministro no kasano a dagiti nalaing a mannursuro umiso ti panangiruangan, panangibasa, ken panangyaplikarda kadagiti kasuratan. Usarentay koma a naimbag amin dagitoy a katulongan a sidadaan a magun-odtayo.
5 No aramatentayo a siuumiso ti Sao ti Dios, matakuatantayo a daytoy ket “nabiag ken adda bilegna . . . ket kabaelanna a lasinen dagiti panunot ken dagiti panagem ti puso” dagidiay kasabaantayo. (Heb. 4:12) Ti balligi a masagraptayo iti dayta tignayennatayo nga ad-adda a mangisao a situtured iti kinapudno!—Ara. 4:31.