Urnos iti Panagadal ti Libro iti Kongregasion
Paset 1: Responsabilidad iti Konduktor ti Panagadal
1 Iti Panagadal ti Libro iti Kongregasion ket alaenna ti nasken a papel iti espiritual a panagrang-ay dagiti tattao ni Jehova. Kadagiti masanguanan a bulbulan, sukimatentayo dagiti nagduduma nga aspekto daytoy nga urnos ken usigen no kasanotayo a magunggonaan. Iti daytoy a ruar isentrotayo no kasano a ti konduktor iti panagadal ket maaramidna ti panagadal a makaparegta ken makapabileg iti pammati.
2 Tapno epektibo iti panangisuro, masapul nga agsagana a naimbag ti konduktor. Saanna laeng nga ammo ti sungbat iti kada saludsod ngem maawatanna met no apay nga umiso ti sungbat. Ikagumaanna a tulongan dagiti amin a tumabtabuno iti panagadal nga ammoda ti rason kadagiti sungbat. (1 Ped. 3:15) Daytoy ti mangpauneg iti panangipategda a maipaay ti material.
KALAT ITI PANANGIDAULO TI PANAGADAL
3 Maysa a kalat ti konduktor isut’ panangpabileg iti pammati dagiti amin a tumabuno ken tignayenna ida a mangaramid iti pagayatan ti Dios a naan-anay. (Sal. 110:3; 2 Tes. 1:3-5) Tapno maibanag daytoy, masapul nga agsarimadeng kadagiti rumbeng a lugar tapno ‘ipaganetgetna’ dagiti puntos a mamabileg iti talek ken Jehova, ti Saona, ken ti organisasionna. (Gal. 6:6) Mabalin a mausar dagiti saludsod a manggutugot kadagitoy a detalye kas ipalubos ti tiempo.
4 Ti sabali a kalat isut’ panangtulong kadagiti amin a mangusar iti material iti praktikal a wagas. Kasanoda a maaramat idiay tay-ak ti ministerio? Iti panangparegta kadagiti kakabsat agraman dagiti agdadamo? Iti panangpapigsa kadagiti pamiliada? Bayat nga isagana dagiti konduktor ti kada leksion, masapul nga ikagumaanda a tinungen iti praktikal nga usar ti kada punto iti maadal.
5 Adda masinnunuo nga impormasion a mabalin a mausar a tumulong kadagiti di mamati a kabagian, kaeskuela, wenno katrabaho. Dagiti dadduma a material ti mabalin a makabadang kadagiti nabingay a sangapamiliaan. Mabalin a matulongan ti konduktor dagitoy a mangaramid iti praktikal nga aplikasion iti material. Imatonanna ti panagadal a makapainteres, a saan ket a basta saludsod ken sungbat laeng a panangwanas.—Maidilig iti 1 Corinto 14:9, 19.
IPAKITA TI PERSONAL NGA INTERES
6 Babaen iti panangipakita ti interes iti tunggal maysa, maparegta ti konduktor iti naan-anay a pannakiraman. Dagiti managbabain ti mabalin a matudingan a nasakbay a mangbasa iti kasuratan, wenno maikkanda kadagiti saludsod a nasakbay tapno makasaganada iti sungbat. Ikagumaan dagiti amin ti sumungbat iti bukodda a sasao. Babaen ti panagimdeng a naimbag kadagiti komento, makita ti konduktor no kasapulan dagiti dadduma iti personal a tulong.
7 Ti Panagadal ti Libro iti Kongregasion isut’ mangted kadatayo iti oportunidad nga agtataripnong iti bassit a grupo ken umawat iti ad-adu nga asikaso. Saan koma a matmatan daytoy a bassit laeng ti pategna no maidilig kadagiti dadduma a gimong. Ti konduktoryo iti panagadal ket usarenna daytoy a pangpabileg iti pammatiyo ken parang-ayenna ti panangipategyo kadagiti parabor ni Jehova.