Panangiparang ti Naimbag a Damag—Iti Masansan a Matrabaho a Teritoria
1 Ti panangasaba kadagiti masansan a matrabaho a teritoria isut’ maysa a karit. Kasanoyo a maiparang ti mensahe a presko ken makaapelo? Ania ti masapul nga aramiden kadagidiay nangikeddengen a saanda nga interesado? Ania ti masaotayo kadagiday agkuna nga agkaraapantayo kadakuada?
AGPOSITIBOKAYO
2 Dagiti teritoria a kanayon a mawanas isuda ti masansan nga agbunga iti nasaysayaat a resulta ngem kadagidiay sagpaminsan laeng a papanan. Ti umuna ngarud a parmeken isu ti kinanegatibo maipapan iti kanayon nga ipapan kadagiti ruangan. Masapul a maikkan dagiti tattao ti oportunidad a dumngeg iti damag. Maysa a biddut no kunaen nga inukomen ni Jehova kas saan a maikari dagidiay saan a mangipangag nupay masansan a masarungkaranda.
3 Ti panangipakita iti empateya isut’ nasken kadagiti masansan a matrabaho a teritoria. No adda masinnunuo a mensahe a mangapektar kadagiti tattao iti lokal a sangakaarubaan mabalin a mamataud daytoy iti positibo a panangipangag dagiti dadduma nga iti napalabas ket saanda a dumngeg. Naridamkayo kadi kadagiti agdama a mapaspasamak, ken nakasaganakayo aya a mangipakita no kasano a ti Biblia ket tumulong iti tattao a mangparukma kadagiti problema a maipasango kadakuada?
PAGDUDUMAEN ITI IDUDUPAG
4 Pagdudumaen ti idudupagyo iti teritoria a kanayon a matrabaho. No dadduma agusarkayo ti tract iti introduksionyo. Iti sabali nga okasion maysa kadagiti 40 nga introduksion idiay pinanid 9-15 iti Panakirinnason a libro ti mabalinyo a dakamaten a pangsango iti aniaman a lokal a pakaseknan. Nalabit a kayatyo pay nga ipalagip daydi naudi nga ibibisitayo, iti kasta mabalin a maunaanyo ida iti daytoy a kas maysa a pangontra. No adda naikomento ti bumalay idi napan a bisitayo mabalin nga isu ti pangirugian iti saritaan.
5 Matmatanyo koma dagiti tattao a kas ken Jehova, a maseknantayo kadagidiay nagkuna kadatayo a saanda nga interesado. Paulit-ulit a nagapelo ni Jehova kadagiti tattaona idi ugma uray pay iti sidong ti dida panangikankano. (2 Cron. 36:15; Jer. 7:13) Adu idi dagiti nagkuna a saanda nga interesado ngem itan ket nagbalindan a kakabsattayo. Uray pay dagiti napait ti ibubusorda ket napagballigian ti kinapudno. Kasta unay ti panagyamanda dagitoy agsipud ta adda siaanus a nagtultuloy a simmarungkar kadakuada babaen iti naimbag a damag.
IDULINYO TI NAIMBAG A REKORD
6 Nasken unay ti mangidulin iti nasayaat a house-to-house record. Ti isasarungkar kadagidiay saan a madanon iti taengda isut’ mangsigurado a naan-anay a nadappatan ti teritoria ken paaduenna iti oras ti nagbaetan iti panagsarungkartayo. Adda dadduma a makisinnukatda iti rekord dagiti saan a nadanon iti ngalay ti lawas a panagtrabaho kadagidiay agtrabaho iti ngudo ti lawas. Daytoy ti mamagduma ti tiempo dagiti bumalay a masarungkaran ket madanon dagidiay pumanaw iti balayda kadagiti al-aldaw ti lawas.
7 Ammo ni Jehova no kaano nga umdasen a naaramid iti napinget a panangdanon kadagiti amin a dumngeg. Agtalektayo a ti trabaho ket mairingpas iti las-ud ti impalubosna a kapaut ti tiempo.—Ezek. 9:11.