“Namin-adun a Nawanasmi ti Teritoriami!”
1 Nariknayo kadin a masansan a mawanas ti teritoriayo ket kasla awanen ti arig karnero a tattao a masarakan iti dayta? Nalabit pampanunotenyo: ‘Ammok lattan no ania ti reaksion dagiti tattao. Apay a sublian pay laeng dagidiay di interesado?’ Agpayso nga adu a teritoria ti masansan a mawanas. Ngem matmatantay koma dayta iti positibo a wagas, saan a negatibo. Apay? Imutektekanyo ti uppat a rason kadagiti sumaganad a parapo.
2 Nasungbatanen Dagiti Kararagtayo: Kinuna ni Jesus: “Kinapudnona, dakkel ti anien, ngem bassit dagiti trabahador. Gapuna ipakaasiyo iti Apo ti panagani a mangibaon kadagiti trabahador iti panaganina.” (Luc. 10:2) Iti adu a dekada, indawattayo ken Jehova ti ad-adu a tulong. Iti adu a lugar, addaantayon kadagiti kasapulan a kanayonan a trabahador, ket ad-adda a mawanwanastayon ti teritoria. Saantay kadi a maragsakan ta sinungbatanen ni Jehova dagiti kararagtayo?
3 Ti Kinapinget Agbunga iti Naimbag: Uray kadagiti teritoria a masansan a mawanas, ipangpangag dagiti tattao ti mensahe ti Pagarian ken maam-ammuanda ti kinapudno. Ditay koma ngarud sumardeng a mangasaba ket manginanamatayo a makasapultay pay kadagiti tattao a nasingpet ti panagpuspusoda. (Isa. 6:8-11) Kas iti inaramid dagidi immuna nga adalan ni Jesus, “mapankayo nga agtultuloy” kadagiti tattao iti teritoriayo, ket ikagumaananyo a parayrayen ti interesda iti Pagarian ti Dios.—Mat. 10:6, 7.
4 Idiay Portugal, kada lawas a mawanas ti teritoria ti adu a kongregasion, ngem makasarakda latta iti arig karnero a tattao. Kas pagarigan, positibo unay ti kababalin ti maysa a sister. Kunana: “Sakbay a mapanak mangasaba iti kada bigat, ikararagko ken Jehova a tulongannak a makasapul iti maysa nga interesado nga agadal iti Biblia.” Maysa nga aldaw, nangyurnos iti panagadal dagiti agtartrabaho iti maysa a beauty parlor. Ngem idi agangay, maysa laeng a babai ti dimteng nga agadal. Kinuna dayta a babai: “Saan nga interesado dagiti dadduma, ngem interesadoak.” Iti uneg ti makabulan, dua ti iyad-adalanen ti babai. Di nagbayag kalpasanna, nabautisaran, ket idi agangay, nagpayunir met!
5 Maar-aramiden ti Trabaho: Maikaskasaban ti naimbag a damag, kas iti impadto ni Jesus. (Mat. 24:14) Uray kadagiti lugar a dagiti tattao ‘saanda a kayat ti umimdeng [kadatayo],’ kaskasdi a mapakpakdaaranda babaen ti trabaho a panangasaba. Namnamaentayo a dinto mangipangag ti sumagmamano wenno busorenda pay ketdi ti kinapudno. Ngem masapul latta a mapakdaaran a naan-anay dagita a tattao maipapan iti um-umayen a panangukom ni Jehova.—Ezeq. 2:4, 5; 3:7, 8, 19.
6 Saantayo Pay a Nalpas: Saan a datayo ti mangikeddeng no kaanotay nga agsardeng a mangasaba. Ni Jehova ti makaammo no kaano a rumbeng nga agpatingga dayta. Ammona no adda pay tattao iti teritoriatayo a mabalin nga umimdeng iti naimbag a damag. Itatta, dadduma a tattao ti agkuna a saanda nga interesado, ngem dagiti dakkel a panagbalbaliw iti biagda, kas iti pannakapukaw ti pagsapulan, nakaro a sakit, ipapatay ti inay-ayat, ti mangtignay kadakuada nga umimdeng inton sumaganad. Gapu iti gura wenno gapu laeng ta okupadoda unay, adu a tattao ti pulos a di pay nakangngeg iti ikaskasabatayo. Dagiti maulit-ulit ken nainggayyeman nga isasarungkar mabalin a tignayenna ida a mangipangag.
7 Dagidiay dimmakkel kadagiti kallabes a tawen ken addaanen iti bukodda a pampamilia ket mas serioson ti panangmatmatda iti biag ken iyim-imtuodda dagiti saludsod a ti laeng Sao ti Dios ti makasungbat. Maysa nga agkabannuag nga ina ti nangawis iti dua a Saksi iti pagtaenganna ket kinunana: “Idi ubingak pay, diak pulos naawatan no apay a di ikankano ni nanangko dagiti Saksi sana ibaga kadakuada a saan nga interesado, idinto ta kayatda laeng ti makisarita maipapan iti Biblia. Inkeddengko ngarud idi nga inton dumakkelak, inton adda asawak ken bukodko a pagtaengan, pastrekekto dagiti Saksi ni Jehova ket pailawlawagko ti Biblia kadakuada.” Kasta ti inaramidna, ket naragsakan dagiti Saksi a simmarungkar kenkuana.
8 Kayatyo Kadi ti Agbalin a Mas Epektibo Pay? Saan a kanayon a dagiti tattao a kaskasabaantayo ti kasla mangparigat iti masansan a panangwanas iti teritoria. No dadduma, datayo ti ayan ti parikut. Negatibo kadi ti pampanunotentayo no mangrugitayo? Mabalin nga apektaranna ti kababalintayo ken nalabit ti tono ti boses ken langa ti rupatayo. Iparangarangyo ti positibo nga espiritu ken naragsak a rupa. Mangpadaskayo iti baro a wagas ti pannakisarita. Agusar iti nadumaduma a presentasion, ket ikagumaanyo a parang-ayen dayta. Nalabit baliwanyo ti panglukat a saludsodyo wenno mangiserrek iti sabali a teksto a pagsaritaanyo. Damagenyo kadagiti kakabsat no ania ti nausardan a naballigi no mangaskasabada iti teritoria. Makikaduakayo kadagiti nadumaduma nga agibumbunannag ken payunir no mangasabakayo, ket paliiwenyo no ania ti mamagbalin iti ministerioda nga epektibo.
9 An-anamongan ken bembendisionan ni Jehova ti trabaho a panangikasaba iti Pagarian, ket ti pannakiramantayo iti dayta paneknekanna nga ay-ayatentay ti Dios ken ti padatayo a tattao. (Mat. 22:37-39) Gapuna, itultuloytayo daytoy a trabaho agingga a mairingpas, ket ditay mabannog uray masansan a mawanas ti teritoriatayo.