Naimpusuankayo Koma iti Tay-ak ti Ministerio
Paset 3: Ipaayyo iti Pagrang-ayan Dagiti Dadduma
1 Ti relasion iti nagbaetan ni natataengan a kabsat a Pablo ken ni debotado nga agtutubo a lalaki a Timoteo isut’ naisitar a kas naimbag nga ehemplo iti panagsanay a maipaay iti ministerio. (1 Cor. 4:17) Naiwardas ni Timoteo babaen ken Pablo nga ipaayna met iti sabsabali ti isu met laeng a pannakaammo ken pannakasanay nga inawatna. (2 Tim. 2:1, 2) Naimbag a banag no surotentayo ti isu met laeng a pamay-an iti kongregasion kadagitoy nga aldaw.
2 Sanayen iti Sabsabali: Ti kasapulan a panangsanay isut’ nabatad no mabigbigtayo a ditoy Pilipinas ita ket adda nasursurok ngem 13,000 nga agibumbunannag ngem iti napalabas a tallo a tawen. Awan duadua a kaaduan kadagitoy ti magunggonaan manipud iti pananginsayo nga ipaay dagidiay nasanayen nga agibumbunannag. Maysa a kabsat a babai ti masansan a mangusar iti maysa wenno dua nga oras iti kada bulan idiay tay-ak ti serbisio a mangadal iti epektibo a panagsao kadagiti ruangan no maited ti tulong babaen iti nalalaing nga agibumbunannag. Daydi dati a panagkedkedna a makiraman iti ministerio isut’ naparukmanan, ket nagbalinen a naregta nga agibumbunannag iti naimbag a damag. Itan kas nasanayen a payunir, mataliawna ti napalabasna ken makunana: “Ti laeng kasapulan isut’ pannakaisuro no ania ti sawek, kalpasanna nagbalinen a makaay-ayo kaniak iti ministerio.”
3 No maysakayo a panglakayen, ministerial nga adipen, maysa a payunir, wenno nasanayen nga agibumbunannag, kasanoyo a maipaay iti panagrang-ay dagiti dadduma? Ti umuna nga addang isut’ panangibaga iti konduktor iti Panagadal ti Libro iti Kongregasion a kayatyo ti tumulong iti sabali nga agibumbunannag.
4 Organisado ken Nakasaganakayo: Makatulong ti kaadda iti depinido a tulagan nga agkuyog iti trabaho. Daytoy kaduayo ti mabalin a nerbioso wenno agar-arikap iti sawenna no damo, ngem tagipatgenna nga adda kakuyogna iti trabaho a mangarayat kenkuana no dumteng dayta a kasapulan. (Ecl. 4:9) No mabalin, pilien iti teritoria a manamnama nga adu dagiti tattao a situtulok a makisao maipapan iti tema ti Biblia. Bumadang daytoy iti agdadamo a makiraman iti saritaan nga isut’ pakagun-odanna iti panagtalek.
5 Tapno agtultuloy iti naprogreso a panagsanay, makagunggona a pagsaritaan no kasano ti panagsarungkar iti interes a nasarakan. Ramanenna dayta ti panangiwayat iti pundasion idiay umuna a dupag babaen ti panangibati iti bumalay ti maysa a saludsod a masungbatan inton masarungkaran. Siguruenyo a tulongan daydiay agsursuro nga agibumbunannag nga agsagana, kalpasanna kaduaanyo nga agsarungkar. No mairugi ti panagadal ngem agkitakit pay laeng daytoy baro nga agibumbunananag gapu iti abilidadna, nalabit a kayat daydiay nasanayen nga agibumbunannag nga isu pay laeng ti mangidaulo iti sumagmamano a panagadal agingga a kabaelanen daytoy agdadamo a sublaten.
6 Gapu iti napardas a panagkamang dagiti tattao iti organisasion, ti nasirib a panangipaay iti nainget nga edukasion idiay tay-ak ti ministerio isut’ nabatad unay a makita. Kasapulan ti tulong nga agtaud kadagidiay a nakapatanoren iti laingda a mangasaba. No adda matulonganyo, iti saan a mabayag agbalinto metten a “makabael a mangisuro iti dadduma.”—2 Tim. 2:2.