No Kasano a Sanayen a Mangasaba Dagiti Kabbaro
1. Ania ti riknam idi damom ti mangasaba?
1 Malagipmo kadi daydi damo a panangasabam iti binalaybalay? Nalabit a napalalo ti nerbiosmo. No kaduam ti mangyad-adal kenka wenno ti sabali nga agibumbunannag, maapresiarmo la ketdi ti tulongda. Ita ta adun ti kapadasam kas ministro, mabalinmo metten ti tumulong a mangsanay kadagiti kabbaro a mangasaba.
2. Ania ti masapul a sursuruen dagiti kabbaro nga agibumbunannag?
2 Masapul a sursuruen dagiti kabbaro nga agibumbunannag no kasano ti mangirugi iti saritaan, mangusar iti Biblia, agsarungkar, ken mangirugi ken mangikondukta kadagiti panagadal iti Biblia. Masapul a sursuruenda met dagiti nagduduma a pamay-an ti panangasaba, kas iti panangasaba iti lansangan ken kadagiti lugar ti negosio. Matulongam dagiti kabbaro a rumang-ay babaen ti ulidan ken kadagiti singasingmo.
3. Kasanotayo a matulongan dagiti sabsabali babaen ti ulidantayo?
3 Mangisuro Babaen ti Ulidan: Impakita ni Jesus kadagiti adalanna no kasano ti mangasaba. (Luc. 8:1; 1 Ped. 2:21) No makikaduaka iti kabbaro nga agibumbunannag a mangasaba, mangisaganaka iti simple a presentasion a kabaelanna a tuladen, a nalabit usarem ti pagtuladan a presentasion iti maysa kadagiti publikasiontayo. Kalpasanna, ibagam a sika pay laeng ti mangasaba iti umuna wenno agingga iti maikadua a balay tapno mangngeganna ti presentasionmo. Bayat a mapankayo iti sabali a balay, mabalin nga iyimtuodmo kenkuana no ania ti napaliiwna nga epektibo iti presentasionmo. Makatulong daytoy kenkuana tapno maapresiarna ti kinapateg ti pannakikadua kadagiti sabsabali iti ministerio ken tapno nalaklakana nga awaten ti aniaman a singasingmo kalpasan ti batangna a mangasaba.
4. Kasanotayo a matulongan ti kabbaro nga agibumbunannag kalpasan a naimdengantayo ti presentasionna?
4 Mangipaay Kadagiti Singasing: Impaayan met ni Jesus dagiti adalanna kadagiti instruksion no kasano ti mangasaba. (Mat. 10:5-14) Matulongam met dagiti kabbaro nga agibumbunannag iti umasping a pamay-an. No batangna ti agsao, dumngegka a naimbag. No nakapanawkayon, mangipaayka iti espesipiko ken naimpusuan a komendasion uray adda napaliiwmo a nasken a parang-ayenna iti panangasabana. Sakbay a mangisingasingka, mabalin a kayatmo pay a paliiwen nga umuna no nasaysayaatton ti panangasabana iti sumaruno a batangna nga agsao. Nalabit nga agnernerbios laeng ngamin. Laglagipem met a nagduduma ti kabaelan dagiti agibumbunannag, ken masansan a nadumaduma ti wagas ti panangasabatayo.—1 Cor. 12:4-7.
5. Ania ti mabalintayo nga ibaga no datayo ti agdisnudo a mangipaay iti singasing?
5 No dadduma, damagen ti kabbaro nga agibumbunannag no ania ti maisingasingmo. Ngem no saan, sikan ti agdisnudo a mangipaay iti singasing. Kasanom a maaramid dayta a sitataktika? Ti sumagmamano nga aduan iti kapadasan nga agibumbunannag ket kastoy laeng ti ibagbagada, “Adda koma ti isingasingko” wenno, “Ania pay ti mapanunotmo a nasaysayaat?” Ti sabali pay a mabalinmo nga ibaga ket, “Idi kabbaroak pay nga agibumbunannag, marigatanak a . . . , ngem nakatulong kaniak ti. . . . ” Makagunggona no sagpaminsan a repasuenyo a dua ti libro a Pannakirinnason. Tapno nalaklakana a matandaanan, mangipaayka kadagiti singasing mainaig iti maysa laeng a benneg iti presentasionna.
6. No maipapan iti ministerio, kasano a ti ‘landok patademenna ti landok’?
6 Ti Landok Patademenna ti Landok: Ni Timoteo, a maysa nga aduan iti kapadasan nga ebanghelisador, ket pinaregta ni Pablo nga itultuloyna nga igaed ti bagina iti panangisuro ken agtultuloy a rumang-ay. (1 Tim. 4:13, 15) Nupay mabalin a tawtawenen ti naglabas sipud idi damom ti mangasaba, itultuloymo latta a parang-ayen ti abilidadmo. Agsursuroka kadagiti agibumbunannag a kaduam a mangasaba, uray kadagidiay bassit pay ti kapadasanna iti ministerio, ken alertoka koma a tumulong a siaayat kadagiti sabsabali, nangruna kadagiti kabbaro, tapno agbalinda a nasigo a ministro iti naimbag a damag.—Prov. 27:17.