Naimpusuankayo Koma iti Tay-ak ti Ministerio
Paset 4: Organisado a Mangitungpal iti Ministeriotayo a Sieepektibo
1 Ti amin a kararua a ministerio iti publiko kasapulanna ti naimbag a personal nga organisasion. Inwayat ni Jesus ken dagiti disipulona ti naisangsangayan a padron a maipaay iti ministerial a trabahotayo kadagitoy nga aldaw. (Luc. 10:1, 2; 2 Tim. 4:5) Ngem kasanokayo nga agbalin a mas organisado ken masagrapyo iti kaasping a naimbag a resulta ita?
2 Iyiskediolyo ti Tiempo a Maipaay iti Tay-ak ti Ministerio: Tapno maorganisar iti ministeriotayo a sieepektibo, masapul a mangitudingtayo ti tiempo a maipaay iti nagduduma a bennegna. (Efe. 5:15, 16) Nasarakan dagiti adu nga agibumbunannag a makatulong ti panangikeddeng iti maysa a kalat no mano nga oras ti maideboto iti ministerio ti kada bulan. Masansan a kasapulanna daytoy ti panangurnos kadagiti bambanagda a makiraman iti tay-ak ti serbisio iti kada lawas. Masapul a tulongan dagiti Kristiano a nagannak dagiti annakda a mangiyiskediol ti tiempoda iti regular a pannakipasetda iti nagduduma a benneg ti ministerio iti tay-ak.—Deut. 6:7; Prov. 22:6.
3 Ikeddengyo Dagiti Nairanta a Kalat: Dagiti napudno a kalat ti makatulong a mangitungpal iti ministerioyo. No maragpatyo dagiti kayatyo, masagrapyo ti rag-o iti naibanagyo. (Prov. 13:12) Namalakad ni apostol Pablo: “Iti aniaman a kaso, no ania ti nagtengan a nagrang-ayantayon, itultuloytayo ti magna a siuurnos iti isu met laeng a wagas.” (Fil. 3:16) Wen, ti serbisioyo iti tay-ak isut’ masapul a mangted ti ebidensia iti siuurnos a wagas.
4 Kas ehemplo, adda kadi umanay nga abastoyo a tract ken handbill? Adda aya umdas nga abasto iti agdama a magasina? Ar-aramatenyo met laeng a naimbag iti house-to-house record?
5 Sakbay ti pannakiraman iti ministerio, itiempoyo a repasuen ti agdama a Topiko a Pagsasaritaan. Ilasinyo dagiti mapagsaritaan a puntos manipud publikasion a maitukon, ken nakasaganakayo koma a mangusar kadakuada a sieepektibo a mangpabara iti interes. Kasta met, nakasaganakayo koma a mangusar iti Panakirinnason Manipud Kadagiti Kasuratan. Uray iti nagbaetan dagiti sarungkar, mabalinyo nga aramiden ti nadaras a panagreperensia kadagiti adu a singasingna.
6 Ikagumaan nga iringpas iti ministeriotayo babaen ti pannangted iti kasayaatan a posible a panangsaksi, “ti bunga dagiti bibig.” (Heb. 13:15; maidilig iti Oseas 14:2.) Tapno maaramid daytoy, iyiskedioltayo ti tiempo a maipaay iti regular a pannakipaset idiay tay-ak ti serbisio ken ipasdek dagiti nainrasonan a kalat a makabael kadatayo a mangiringpas iti ministeriotayo a maipaay ti dayaw ni Jehova.