Naimpusuankayo Koma iti Tay-ak ti Ministerio
Paset 5: Ti Nabaknang a Gunggona iti Naimpusuan a Serbisio
1 Ipaay ni Jehova ti adu a nabaknang a bendision kadagiti naimpusuan nga adipenna. (Sal. 116:12) Kasanotayo a masagrap iti naan-anay a rukod dagiti bendision manipud ken Jehova iti ministeriotayo? Ania ti masapul nga aramidentayo tapno masigurado iti anamong ken paborna?
2 Masapul ti Personal a Kinapinget: Maipapan iti ministerio, insurat ni Pablo: “Tunggal tao umawatto ti bukodna a gunggona kas maiyannurot iti nagbannoganna.” (1 Cor. 3:8) Masapul ngarud ti naan-anay a pannakiraman iti ministerio agingga ti kabaelantayo. Naaddaan idi ni apostol Pablo ti personal a gunggona a timmulong iti adu a tattao, uray ti intero a kongregasion, a nakaammo iti Dios. Anian a ragsak ti nariknana a nakaimatang iti natibker a pammatida! (1 Tes. 2:19, 20) Nalabit a saanyo a matulad ti nawadwad a maaramidan iti ministerio a kas idi ken Pablo. Kaskasdi, saan aya a maysa a nabaknang a bendision ti makatulong iti maysa a tao a makapagtakder a natibker iti dana ti biag? Anian a pamkuatan daytoy nga agtrabaho a sipipinget iti ministerio ti balaybalay a sarunuen iti panagsarungkar ken panagadal ti Biblia!
3 Kanayonan a Gunggona: Maysa a nagpateg a gunggona iti naimpusuan a serbisio isu daydiay, kas katrabaho, ti maysa a tao isut’ maiyasideg ken Jehova ken ni Kristo Jesus. (Mat. 11:29, 30; 1 Cor. 3:9) Anian a rag-o iti marikna no ti espiritu iti Dios ket tulongannakayo iti ministerio! (Mat. 10:20; Juan 14:26) Mainayon pay, ti napinget a panagtrabaho a sidadanggay iti kongregasion isut’ mangpabileg iti singgalut ti ayat ken panagkaykaysa.
4 Ditay mapagnumaran iti naan-anay a gunggona manipud ken Jehova malaksid no anayentayo a suportaran ti organisasion nga ar-aramatenna a mangitungpal iti pagayatanna kadagiti maudi nga al-aldaw. (Maidilig iti 2 Ar-ari 10:15.) No naimpusuan iti panangsurot ti panangidalan iti kalasugan ti Dios ken aktibotayo iti ar-aramid ti kongregasion, masaluadantayo iti naespirituan manipud kadagiti nasikap a kagawaan ni Satanas.
5 Daytoy a nagkalima ti seryena nga artikulo maipapan iti kinaimpusuantayo iti tay-ak ti ministerio isut’ nangilawlawag iti dagup dagiti makagapu a nasaklaw. Malagipyo kadi no kasano ti panangpatanor iti panangipateg ken Jehova, nga isut’ manggutugot kadatayo a naimpusuan? (Agosto) Apay a ti panagsagana ket nasken a mangpabileg iti kinarayray iti tay-ak ti ministerio? Kasano ti panagsaganatayo? (Setiembre) Kasano a dagiti nasanay nga agibumbunannag ket makatulongda a naimpusuan iti sabsabali? (Oktubre) Kasano a ti nasayaat a personal nga organisasion ket makatulong kadatayo a naimpusuan iti ministeriotayo? (Nobiembre) Sursurotenyon aya dagitoy a singasing?
6 Masiguroyo a bayat a sipipinget nga agregtakayo iti agdama a trabaho, maimutektekan ni Jehova daytoy bayat nga “awatenyonto ti maitutop a gunggona a tawid,” ti agnanayon a biag.—Col. 3:23, 24.