Urnos iti Panagadal ti Libro iti Kongregasion
Paset 5: Bisita ti Manangaywan iti Serbisio:
1 Ti manangaywan iti serbisio isut’ maysa a managibanghelio ken mannursuro. Akmenna ti maysa a panulbek a papel iti pannakatulong ti kongregasion a mangtungpal iti responsabilidadna a mangasaba ken mangisuro ti naimbag a damag idiay naituding a teritoriana.—Mar. 13:10.
2 Maipamaysa ti manangaywan iti serbisio ti panangpabara iti ad-adu nga aktibidad idiay tay-ak ti ministerio. Maibanag daytoy a nangruna babaen iti Panagadal ti Libro iti Kongregasion. Gagangay, ti manangaywan iti serbisio isut’ nadutokan a mangidaulo iti panagadal ti libro, ngem maminsan iti kada bulan ti katulonganna isut’ aglugar iti pagakmanna bayat a bumisita iti maysa a grupo.—km 12/81 p. 1, 3.
3 Panagsagana iti Bisita: Sakbay daytoy a bisita, masapul nga usisaen ti manangaywan iti serbisio dagiti Congregation’s Publisher Record cards dagiti naikameng iti grupo. Iyurnosna a makasao iti konduktor tapno repasuenda ti aktibidad dagiti agibumbunannag a naitimpuyog iti grupo. Mapalagipan ti konduktor iti panagadal a ti panagadalda ket agpaut laeng iti 45 minutos tapno mailugaran ti 15 minutos a palawag iti serbisio babaen ti manangaywan iti serbisio.
4 Daytoy a palawag ti mangitandudo iti lalo pay a panangipateg ti ministerio. No kasapulan dagiti agibumbunannag ti tulong iti nagduduma a benneg ti ministerio, ti manangaywan iti serbisio isut’ mangitukon ti praktikal a singasing a maipaay iti panagrang-ay. Masapul a positibo ken makaparegta dagiti balikasna tapno saan a makapabain wenno makaupay iti siasinoman dagiti negatibo a komento. Ti palawagna isut’ mangparegta kadagiti amin a rumang-ay.
5 Ikagumaan ti manangaywan iti serbisio ti makipagtrabaho kadagiti adu iti serbisio agingga ti mabalin. Bayat a makikuyog kadagiti agibumbunannag iti panagbalaybalay, mabalinna nga itukon ti makatulong a singasing no kasano a maparang-ay dagiti panangiparangda. Masapul a maaramid daytoy saan a babaen iti nadillaw a wagas ngem babaen ti napudno a tarigagay a makatulong. Maitukonna met ti kumuyog kadagiti agibumbunannag iti panagsarungkar ken panagadalda ti Biblia. No adda agminar iti grupo nga agkasapulan ti personal a badang, mabalinna a sarungkaran ida bayat iti lawas tapno tulonganna ida. Daytoy nabara, personal nga asikaso ti makatignay manen iti dadduma a nagbahada ti serbisioda iti tay-ak.
6 Taripnong ti Serbisio: Dagiti taripnong sakbay ti serbisio iti tay-ak bayat dayta a lawas isut’ idaulo ti manangaywan iti serbisio. Masapul nga irugida iti umiso a tiempo uray no adda pay laeng sumagmamano. Ti taripnong isut’ saan nga sumubra iti 10 agingga iti 15 a minutos. Sakbay a mapalubosan iti grupo, masapulen nga ammo ti tunggal maysa no sadinoda ken no siasino iti kakuyogda. (1 Cor. 14:33, 40) Paregtaen ti manangaywan iti serbisio ti tunggal maysa a rummuardan iti tay-ak ti serbisio nga awan taktak.
7 Ti regular a sarungkar iti manangaywan ti serbisio kadagiti grupo iti panagadal ti libro isut’ maysa a napudno a bendision iti kongregasion. Babaen ti tunggal maysa kadatayo a makitunos kenkuana no isut’ agbisita, ti ministeriotayo isut’ naurnos ken epektibo. Mainayon pay, magun-odna met iti rag-o manipud ti trabahona.—Heb. 13:17.