No Kasanokayo a Magunggonaan iti Grupo ti Panangasaba
1. Ania dagiti pagsayaatan ti urnos a Panagadal iti Libro ti Kongregasion a matagiragsaktay met laeng iti grupotayo iti panangasaba?
1 Kailiwyo kadi ti sumagmamano nga aspeto ti Panagadal iti Libro ti Kongregasion? Babassit dagiti grupo ken mas relaks dagiti kakabsat. Gapuna, nalaklaka ti makapaggiginnayyem a tumulong kadatayo a bumileg iti naespirituan. (Prov. 18:24) Ammo ti manangaywan iti panagadal iti libro ti kasasaad ti tunggal maysa kadatayo isu a makaipaay iti personal a pammaregta. (Prov. 27:23; 1 Ped. 5:2, 3) Kastoy met laeng ti pagsayaatan nga itden ti grupotayo iti panangasaba.
2. Kasanotayo a makapagdisnudo a makigayyem kadagiti kagrupotayo iti panangasaba a tumulong kadatayo a bumileg iti naespirituan?
2 Agdisnudokayo: Gagangay a ti kadakkel dagiti grupo iti panangasaba ket kas met laeng kadagiti grupo iti panagadal iti libro. Makapagsisinningedtayo no ‘agdadanggaytayo’ iti ministerio. (Fil. 1:27) Mano iti kagrupoyo ti nakaduayon? Mabalinyo kadi ti ‘agpalawa’ iti daytoy a banag? (2 Cor. 6:13) Maysa pay, mabalintayo ti agawis sagpaminsan iti kagrupotayo a makiraman iti panagdaydayaw ti pamiliatayo wenno makipangan kadatayo. Kadagiti dadduma a kongregasion, agsisinnublat dagiti grupo iti panangasaba a mangpakan iti naawis nga agpalawag. Iti lawas a batangda ti agpakan, agkakadua a mangan ti grupo ken agpipinnaregtada makapan man wenno saan ti ispiker.
3. Ania dagiti oportunidad a mabalintayo ti umawat iti panangipastor iti grupotayo iti panangasaba?
3 Uray no mamindua laengen iti makalawas nga agtataripnong ti kongregasion, dina kayat a sawen a maksayan met ti pannakaipastor dagiti arban. Adda manangaywan a naituding iti tunggal grupo a mangipaay iti personal a pammaregta ken panangsanay iti ministerio. No saannakayo pay a nakadua ti manangaywan iti grupoyo, mabalinyo a kiddawen a kaduaennakayo iti ministerio. Malaksid iti dayta, ti manangaywan iti serbisio ket makikadua iti nagduduma a grupo iti maysa a ngudo ti lawas iti kada bulan. Kadagiti babassit a kongregasion a manmano laeng dagiti grupo iti panangasaba, mabalinna nga iyurnos a sarungkaran ti tunggal grupo iti mamindua iti kada tawen. Ur-urnosenyo met laeng kadi ti eskediulyo tapno makiramankayo iti ministerio no kaduaenna ti grupoyo?
4. (a) Kasano a maorganisar dagiti taripnong sakbay ti panangasaba? (b) Apay nga ikabilangantayo no mabalintayo nga ipausar ti pagtaengantayo para kadagiti taripnong sakbay ti panangasaba?
4 Masansan a nasaysayaat no adda bukod a pagtataripnongan ti tunggal grupo iti panangasabada iti ngudo ti lawas. No agduduma ti pagtataripnongan sakbay ti panangasaba ken agpapada ti oras ti panagtataripnong, nalaklaka nga agbiahe dagiti agibumbunannag a mapan iti pagtataripnongan ken nalabit iti teritoria. Alisto a maorganisar dagiti agibumbunannag ken makapanda a dagus iti teritoria. Nalaklaka pay para iti manangaywan iti grupo nga aywanan dagiti kagrupona. Nupay kasta, adda dagiti kasasaad a nasaysayaat no agtipon ti dua wenno ad-adu pay a grupo. No agtataripnong ti intero a kongregasion sakbay ti panangasaba iti umuna a Sabado iti bulan wenno kalpasan ti Panagadal iti Pagwanawanan, masansan a makagunggona no agkakatugaw dagiti agkakagrupo ken maikkan ti manangaywan iti grupo iti sumagmamano a minuto tapno pagkakaduaenna dagiti kagrupona sakbay ti pangserra a kararag.—Kitaenyo ti kahon a “Mabalinyo Kadi nga Ipausar ti Pagtaenganyo?”
5. Nupay awanen ti Panagadal iti Libro ti Kongregasion, ania ti masiguradotayo?
5 Uray no awanen ti Panagadal iti Libro ti Kongregasion, agtultuloy nga ipapaay ni Jehova ti amin a kasapulantayo a mangaramid iti pagayatanna. (Heb. 13:20, 21) Saantayo nga agkurang iti aniaman no addatayo iti aywan ni Jehova. (Sal. 23:1) Adu a bendision ti itden ti grupotayo iti panangasaba. No agdisnudotayo nga ‘agmula a siwawadwad aganitayto met a siwawadwad.’—2 Cor. 9:6.
[Kahon iti panid 6]
Mabalinyo Kadi nga Ipausar ti Pagtaenganyo?
Adda dagiti kongregasion nga agtitipon dagiti grupo iti panangasaba iti ngudo ti lawas gapu ta awan ti balay a mabalinda a pagtataripnongan. Dagiti taripnong sakbay ti panangasaba ket karaman iti urnos ti kongregasion, isu a maysa a pribilehio no maangay dayta iti pagtaengantayo. Mabalinyo kadi nga ipausar ti pagtaenganyo? Saankayo a mabain uray no simple laeng ti balayyo. Ikabilangan dagiti panglakayen ti lokasion ti balayyo ken ti dadduma pay a banag nga inkabilanganda idi nangpilida kadagiti pakaangayan ti panagadal iti libro. No kayatyo nga ipausar ti pagtaenganyo, ibagayo dayta iti manangaywan iti grupoyo.