Pakaammuan Dagiti Amin nga Asidegen iti Sangalubongan a Talged
1 Iti mabiiten, ti “Prinsipe ti Kappia” ket ipasdeknan iti pudno a talna ken talged iti sangalubongan. Ti pammatitayo iti daytoy a kari ti Biblia isut’ mangtignay kadatayo a mangiranud iti dayta kadagiti dadduma. (Isa. 9:6, 7; Mik. 4:3, 4) Bayat iti bulan ti Pebrero, itukontayo dagiti daan a publikasion a kas naiyanunsio iti napalabas. Dagiti kongregasion nga awanan kadagitoy a libro iti mismo a pagsasaoda ti mabalin a mangitukon iti libro a Worldwide Security Under the “Prince of Peace.”
2 Iti panid 4 daytoy a ruar Ti Ministeriotayo iti Pagarian, indatagmi dagiti sumagmamano nga introduksion a nalabit a kayatyo nga usaren iti ministerio bayat ti Pebrero. Adda tallo a transision wenno panagallatiw a makatulong kadakayo a mangitukon iti Wordlwide Security a libro a naisingasing kadagiti sumaruno a parapo. Dagitoy ti mabalin a maitutop iti aniaman a libro a maitukonyo.
3 Transision Num. 1: Kalpasan ti introduksionyo, ukagenyo ti panid 13 ken kunaenyo: “Ti Isaias 9:6, 7 ket nakotar manipud ti Biblia iti daytoy a parapo. Palubosandak a mangibasa kadakayo.” Kalpasanna saludsoden: “Siasino daytoy ‘Prinsipe ti Kappia’?” Palubosan a sumungbat, sa ituloy: “Daytoy a libro ti silalawag a mangipabigbig iti daytoy a ‘Prinsipe ti Kappia’ ken ilawlawagna no kasano nga iyegna ti sangalubongan a talged ditoy daga iti daytoy tiempotayo. Kayatyo kadi nga ammuen pay ti ad-adu maipapan iti daytoy?”
4 Transision Num. 2: Kalpasan a mabasa ti Isaias 9:6, 7, ukagen iti panid 4 sa isaludsod iti bumalay: “Ania a natalna a kasasaad ti makitayo iti daytoy nga ilustrasion?” Palubosan a sumungbat, kalpasanna itultuloyyo a kunaen: “Adda talna kadagiti tattao ken kadagiti animal. Pagarupen dagiti dadduma a dagiti natauan a gobierno ket maiyegda dayta a talna. Ngem ti pudno a talna ken talged kas naipadto iti Biblia isut’ masapul a gapuanan ti Dios, saan nga aramid ti tao. Umanamongkayo kadi?” Palubosan a sumungbat, kalpasanna basaen iti parapo 4 idiay panid 5 ken mailawlawag a daytoy a libro ket sungbatanna dagiti adu a saludsod maipapan iti Pagarian ken ti talna ditoy daga.
5 Transision Num. 3: Kadagiti lugar a dagiti tattao ket masansan a bumallaetda ken saanda a paleppasen ti presentasion, mabalinyo a dakamaten daytoy nga idudupag: “Mabalin ti agsaludsod kadakayo?” No ti bumalay ket umanamong, itultuloyyo: “Kinuna ni Jesus a dagiti pasurotna ket agaramidda ti disipulo iti amin a nasnasion. Ti saludsod isu daytoy: Kasapulan kadi a makomberte ti intero a lubong sakbay nga agturay kas ‘Prinsipe ti Kappia’? Ania ti opinionyo?” Palubosan a sumungbat, kalpasanna kunaenyo: “Ti sungbat iti Biblia maipapan dayta a saludsod isut’ masarakan ditoy panid 21.” Kalpasanna basaen iti parapo 2 idiay panid 21.
6 Nalabit a nakapilikayo iti maysa nga introduksion a kayatyo nga aramaten a kaasping daydiay adda iti panid 4 daytoy Ti Ministeriotayo iti Pagarian. Kalpasan a marepaso dagiti transision wenno panagallatiw iti daytoy nga artikulo, masarakanyo nga adda maysa a pagragsakanyo nga usaren. Sanayenyo dagiti introduksion ken panagallatiwyo sakbay a rummuarkayo iti tay-ak ti serbisio. Ti panagsagana ken personal a pammatiyo isut’ mangnayon iti kinarayrayyo a mangitukon iti Worldwide Security a libro.