Asinot’ Mangiturongto ti Sangatauan iti Talna?
GAPU kadi ta di kabaelan dagiti tao nga iyeg ti talna kaipapanannan a ditayton pulos makitat’ talna? Saan. No kasano a ni Satanas, a nabilbileg ngem kadatayo, isut’ kangrunaan a tuben iti talna ditoy daga, kasta met nga adda Daydiay nabilbileg pay ngem ni Satanas nga isuntot’ mangiturong kamaudiananna ti sangatauan iti talna. Ti Biblia, a nangdakamat ken Satanas, dakamatenna met Daydiay. Kunana: “Ti naarian a panangituray maiparabawto iti abagana. Ket ti naganna maawaganto iti Nakaskasdaaw a Mamagbaga, Mannakabalin a Dios, Agnanayon nga Ama, Prinsipe ti Kappia.” (Isaias 9:6, 7) Asino daytoy a Prinsipe ti Kappia? Awan sabali no di ni Jesu-Kristo, ket maiyegnantot’ talna yantangay mas kualipikado ngem kadatayo. Kasano?
Nabilbileg Ngem Natauan a Kualipikasion
Umuna, ni Jesus saan a mortal, nga iturayan ni patay. Pudno, nagbiag idi a kas tao ken natay a kas daton. Ngem isut’ napagungar iti imortal a nailangitan a biag, ket kastoy ti kasasaadna nga agbalin a Prinsipe ti Kappia. Daytat’ makagapu a kuna ti padto: “Awanto ti panungpalan ti pagarianna.” (Lucas 1:32, 33) Maisungani ken Aśoka nga emperador ti Oriente, awantot’ ngudo ti panagbiag ni Jesus tapno masiguradona a ti naimbag a gapuananna ket di dadaelen dagiti nakapkapuy a sunona.
Sa, ni Jesus saan a namulitan iti basol. Ti turayna naibasar iti nadiosan a sirib ken nalinteg a prinsipio. Impadto ni propeta Isaias: “Ti espiritu ni Jehova agtaengto iti rabawna, ti espiritu ti kinasirib ken pannakaawat, ti espiritu ti pammatigmaan ken kinamaingel, ti espiritu ti pannakaammo ken ti panagbuteng ken ni Jehova . . . Saanto a mangukom a kas iti makita dagiti matana, ket saan met a mamabalaw sigun la ti mangngeg dagiti lapayagna. Ket ukomennanto dagiti nanumo a buyogen ti kinalinteg.” (Isaias 11:2-4) Maisupadi kadagiti nagkauna a taga Europa, ni Jesus dinanto pagsaknapen ti talna idiay taengna sana gubaten dagiti baniaga a daga. Iti sidongna, sapasapto ti talna.
Sa, ni Jesus adda pannakabalinna a mangyeg iti talna. Kuna ti padto: “Ti espiritu ni Jehova . . . ti espiritu ti pammatigmaan ken kinamaingel,” adda kenkuana. Daytoy nga espiritu inusarna iti pannakaparsua ti uniberso agraman amin a datdatlag nga aramid ti kinalinteg a nailanad iti Biblia. Uray ni Satanas, a dakkel a bumusbusor, awan igamna a sibaballigi a mangkontra iti puersa ti espiritut’ Dios.
Dagiti Addang nga Agturong iti Talna
Kasanonto nga iturong ni Jesus ti sangatauan iti talna? Maklaatkay siguro a makadamag nga inrugina daytan. Sigun iti propetiko a librot’ Apocalipsis, ni Jesus naipakita nga aw-awatenna iti Dios ti kinaari iti nailangitan a Pagarian. (Apocalipsis 11:15) No siinget nga usigentay dagiti padtot’ Biblia satayto idilig dagita kadagiti maang-angay iti siglotayo, maawatantayo a ti pannakaitronon Jesus kas Ari napasamak idiay langit idi 1914. (Mateo 24:3-42) Daydi ti maysa a kangrunaan nga addang tapno maiyeg ti talna ditoy daga.
Ngem, no agpayso dayta, apay a bimtak ti Gubat Sangalubongan I idi 1914? Ket apay a ti siglotayo nakarkaro a gubat ti napasaranna ngem kadagiti naglabas a historia? Ngamin ti immuna a tignay ti nailangitan nga Ari isut’ naan-anay a panangidistierona ken Satanas manipud langit ket inggarangugongna ditoy arubayan ti daga. Ti resultana? Kunat’ padto: “Asikayo pay daga ken baybay, ta ti Diablo immulog kadakayo, nga addaan dakkel a pungtot, nga ammona a bassiten ti tiempona.” (Apocalipsis 12:7-12) Dagiti nakaro a gubat itoy siglotayo nainaigda iti pungtot ni Satanas. Ngem paliiwenyo: Ti pungtot ni Satanas ket agpaay iti ‘bassit laeng a tiempo.’ Dinto agbayag malpasen dayta a krisis!
Ngem, sakbay a malpas dayta, adda dagiti nasken a panagsagana ti Prinsipe ti Kappia para iti talna. Umuna, masapul a maammuan pay ti sangatauan ti panggep ti Dios a mangyeg iti talna baeten ken Kristo. Maikanatad iti dayta, impadton Jesus nga itoy tiempotayo “daytoy naimbag a damag ti pagarian maikaskasabanto iti amin a napagnaedan a daga a pammaneknek kadagiti amin a nasion.” (Mateo 24:14) Kas kaitungpalan daytoy, ti naimbag a damag ikaskasaba itatta dagiti Saksi ni Jehova iti amin a suli ti daga.
Kalpasanna, dagidiay nalinteg maedukaranda met kadagiti dalan ti talna. Inkari ti Biblia: “Amin dagiti annakmo tattaodanto nga insuro ni Jehova, ket dakkelto ti talna dagiti annakmo.” (Isaias 54:13) Minilion dagidiay nalinteg nga umaw-awat itan iti daytoy nga edukasion.
Ti Sumaruno nga Addang
Dandani umayen ti tiempo para iti sabali pay a mangeddeng nga addang ti panagkakappia. Ania dayta? Daydiay a ti naganna ket kabesado dagiti adu ngem mammanot’ makaammo iti talaga a gandatna. Awagan ti Biblia dayta a kas “gubat ti dakkel nga aldaw ti Dios a Mannakabalin amin,” wenno Armagedon. (Apocalipsis 16:14, 16) Adut’ agkuna a ti Armagedon ket gubat a nuklear a mangduprakto iti sibilisasion. Maisungani ketdi, dayta isut’ direktamente a tignay ni Jesus, a Prinsipe ti Kappia, tapno mairingpasna dagiti banag a nesesita iti talna.
Umuna, ti Armagedon ikkatennanto amin a natauan a tuben iti talna. Kuna ti padto idiay Salmo 37:10: “Ta bassit pay a darikmat, ket daydiay nadangkes maawanton; ket mingmingamto a sigaganetget ti ayanna, ket awanton.” Wen, ni Jesus ikkatennanto “daydiay nadangkes”—dagiti mamaggugubat, kriminal, terorista, agraman amin nga agkitakit a mangakseptar iti dakkel a Prinsipe ti Kappia—ditoy daga. Awanton ti kalinteganda pay nga agtultuloy nga agbiag itoy a planeta.—Apocalipsis 19:19-21.
Maikadua, inton Armagedon daytoy a padto ni Daniel matungpalto: “Kadagiti aldaw dagita nga ari ti Dios ti langit mamangonto ti maysa a pagarian a nikaanoman dinto madadael. Ket ti pagarian a mismo saanto a maited iti sabali nga ili. Burakennanto ken ibusennanto amin dagitoy a pagarian, ket isunto a mismo ti agtalinaed agingga kadagiti panawen a di nakedngan.” (Daniel 2:44) Mawaswaston dagiti nasional a dibision a kadarato a nangitagad iti gubat. Kamaudianna, addanto ti sangalubongan a gobierno iti sidong ti ari a mabalintay a talken!
Inton-ano ti yaay ti Armagedon? Saan nga ibaga ti Biblia. Ngem dagiti pasamak ditoy lubong a kaitungpalan ti padto ipasimudaagda nga asideg unayen. Sibabatad nga impakauna ti Biblia ti maysa a pasamak a sarunuenna unay. Kuna ni apostol Pablo: “Intono sasawenda: ‘Talna ken talged!’ isunto metten ti yaayna kadakuada ti kellaat a pannakadadael.” (1 Tesalonica 5:3) Kalpasanna, apaman a malpas ti kellaat a pannakadadael nga agtampok iti Armagedon, maikkatton dayta kangrunaan a tuben iti talna. Malpaston ti ‘bassit a tiempo’ ni Satanas, ket maisaadton iti situasion a dinan kabaelan a riribuken toy daga. (Apocalipsis 20:1-3) Anian a bang-ar!
Natalnan a Lubong
Iladawanyo ti situasionto sadiay. Impadto ti salmista: “Dagidiay mismo a naemma tagikuaendanto ti daga, ket talaga a maay-ayatandanto unay iti kinaruay ti talna.” (Salmo 37:11) Dagitoy a naemma itultuloydanto a tungpalen ti naimnas a padton Isaias: “Ket pandayendanto dagiti kampilanda a pagbalinen a dingding ti arado ket dagiti pikada pagbalinendanto a kompay. Ti nasion saannanto nga itag-ay ti kampilan a maibusor iti nasion, ket didanto met adalenen ti pannakigubat uray kaano.”—Isaias 2:4.
Itan, damo unay nanipud idiay Eden, nga amin a tao a sibibiag sagrapendanton ti pamendision ni Jehova a Dios, ket tungpalennanton ti karina: “Adtoy! Ti tabernakulo ti Dios adda iti sangatauan, ket isu makipagtaengto kadakuada, ket isudanto dagiti ilina. Ket ti Dios a mismo addanto kadakuada. Ket punasennanto amin a lua kadagiti matada, ket awanton ni patay, uray ti sasaibbek wenno sangsangit wenno rigat awanton. Dagiti immuna a banag napalabasdan.”—Apocalipsis 21:3, 4.
Natibker a Namnama!
Asino, ngarud, ti mangiturongto ti sangatauan iti talna? Ni Jesu-Kristo, ti nadutokan a Prinsipe ti Kappia. Praktikal kadi a pangnamnamaantayo daytoy itatta? Ay ket, no dagiti kari ti Biblia saan ida a mapagtalkan, awantot’ napudno a namnama iti talna. Agtultuloyto dagiti tao nga agpipinnatay nga awan makita a panagsardengda. Ngem ti Biblia mapagtalkan, ket ti Pagarian ti Dios iti sidong ni Kristo yegnanto ti talna. Paregtaendakayo nga umimdeng iti naimbag a damag ti Pagarian nga awit dagiti Saksi ni Jehova dita pagtaenganyo ket sukimatenyo a mismo daytoy. Ket, inton dumteng ti tiempo, sapay koma ta maysakayto kadagidiay naemma a mangtawid iti daga ken maay-ayatanto iti kinaruay ti talna.
Ti namnamat’ talna a nasalaysay ditoy nga artikulo naggapu iti Biblia. Itatta, a nagadun dagiti di mamati iti Biblia, nalabit kuestionaranyo no praktikal daytoy a namnama. Mamati unay dagiti Saksi ni Jehova a praktikal daytoy. Akseptarenda ti Biblia a kas naipaltiing a Saot’ Dios, ngarud naan-anay a mapagtalkan. Idi 1989 nangipablaakda iti libro a napauluan Ti Biblia—Saot’ Dios wenno iti Tao? a mangidatag iti adu a mangpaneknek itoy. Sumagmamano kadagiti impormasion dita a libro ti masalaysay kadagiti dua a sumaganad nga artikulo, ket awisendakay a mangbasa.
Ad-adu pay nga impormasion maipapan iti talna nga inkari ti Biblia agparangto iti artikulo a “Sangalubongan a Talna—Aniat’ Talaga a Kaipapananna?” a maipablaakto iti Abril 15, 1990, a ruar Ti Pagwanawanan.
[Blurb iti panid 8]
Ni laeng Jesus ti addaan kualipikasion a mangiturong ti sangatauan iti talna
[Blurb iti panid 9]
Itatta, ti naimbag a damag ti Pagarian maikaskasaban iti amin a suli ti daga