Ania ti Sawenyo no Agsublikayo?
1 Tapno epektibotayo iti ministerio kasapulan ti panagsagana no agsublitayo kadagidiay nangipakita ti interes, a mabalintayo a maparayray ti interesda ken maitultuloy iti saritaan. Kasanotayo a maaramid daytoy?
2 Idinto ta dagiti pudno a Kristiano ket sinsero ti interesda iti dadduma, mabalin nga iturongyo nga umuna iti maysa a banag a naammuanyo maipapan ti bumalay idi napalabas a bisitayo.
Iti tao nga impasimudaagna ti pannakaseknan maipapan iti krimen, mabalinyo a kunaen:
◼ “Idi napalabas a panagsaotayo nakunayo a mariribukankayo iti kumarkaro a krimen. Pagarupenyo kadi a ti panangtangdan iti ad-adu pay a polisia isut’ mangsolbar iti problema?”
No ti tao ket inyebkasna iti sikorna maipapan ti kallabes a paspasamak ditoy lubong, mabalinyo a kunaen:
◼ “Iti napalabas a panagsaotayo nadakamatyo iti maysa a makapainteres a punto maipapan ti kaawan iti talna ditoy lubong. Pagarupenyo aya a dagiti nailubongan a pangulo ket maiyegda iti baro a lubong nga urnos?”
Iti maysa a tao a madisturbo iti kinaagum dagiti dadduma a tattao, mabalinyo a kunaen:
◼ Iti napalabas a panagsaritatayo nangtedkayo iti ekselente a punto maipapan ti kinaagum a makita kadagiti kaaduan a tattao. Ania ti pagarupyo a panangmatmat iti Dios kadagiti naagum a tattao? [Palubosan a sumungbat.] Kastoy iti makuna ti Biblia iti Efeso 5:5.”
3 Dagiti sabsabali nga ebkas a mairaman a mausar nga epektibo:
◼ “Maragsakanak unay iti daydi napalabas a panagsaotayo, gapuna a nagsukimatak iti daytoy ababa a kapanunotan a mangipakita no kasano a nabigbig ni Jehova iti sagsagabaen dagiti awanan ti pagtaengan. Kitaenyo ditoy Isaias 65:21-23.”
◼ “Magustuak daydiay komentoyo a ti sangatauan ket kasapulanna iti nasaysayaat a gobierno.”
◼ “Nagsayaat daytoy saludsodyo no amin a relihion ket maragpatda iti anamong ti Dios.”
Dagiti kakastoy nga introduksion ti mangipakita nga patgentayo iti napalabas a pannakisao ket interesadotayo a makisao manen kadagiti bumalay.
4 Sakbay nga agsarungkarkayo, panunotenyo nga umuna no ania ti sawenyo. Irukodyo ti presentasionyo iti kada tao.
5 No ti tao a bisitaentayo ket kupado, kaskasdi nga epektibotayo babaen ti panagkuna:
◼ “Ammok nga kurang ti tiempoyo, ngem adda banag a mabalinyo a pagpanunotan bayat a mairingpas ti trabahoyo. [Basaen ti Mateo 5:3.]
Wenno mabalinyo a kunaen:
◼ “Insuratko dagitoy tallo a kasuratan nga agpaay kadakayo. Idinto ta awan ti tiempotayo nga agsao, ibatik daytoy kadakayo, ket inton agsubliak, kayatko ti makisao kadakayo iti daytoy uray lima a minutos laeng.”
6 Dagiti Negatibo nga Idudupag a Liklikan: Dagiti saludsod a mangiturong iti negatibo a sungbat wenno mangpasugnad iti bumalay ket masansan a di makapataud iti naimbag a resulta. Ramanenna dagitoy: “Nabasayo kadin daydiay material nga imbatik kadakayo?” “Adda kadi saludsodyo?” “Malagipdak pay?” “Simmarungkarak ta kayatko nga ammuen no interesadokayo pay laeng a makisao maipapan iti panggep ti Dios ditoy daga.”
7 Nagagartayo a sumubli kadagiti tattao a nangipakita ti interes iti napalabas no nakasaganatayo iti nasakbay a tiempo tapno maited ti tulong kadakuada nga adda pudno a kaeskanna.