Siguruenyo ti Sumarungkar
1 Ti panagsarungkar isut’ maysa a nasken a paset iti panagaramid ti disipulo a trabaho. (Mat. 28:19, 20) Patgentayo a ti biag ket nairaman, gapuna nga ipamuspusan a makultibar iti immuna nga interes a naipakita.
2 Masapul a matmatan iti tunggal tao a nangipakita ti interes a kas maikari iti pannakasarungkar, nangala man ti literatura wenno saan. Adu dagiti situtuddio a makisao maipapan ti mensahe iti Biblia ngem agkedkedda a mangala ti literatura. No ngarud ta madlaw iti interes, masapul a sarungkaran ken ikagumaan a kultibaren dayta.
3 Panangsaruno iti Naipaima: Idinto ta dagiti naipaima a literatura ket lab-awanna ti kaadu iti panagsarungkar, dakkel ti namnama a mapasayaat pay daytoy. Maysa a payunir ti nakapaima iti maysa a libro ngem nadlawna a bassit laeng ti interes iti biang ti bumalay. Maysa a malem kalpasan a nasarungkaranna dagiti amin a sasarungkaranna, naikeddengna a bisitaen daytoy a tao. Nairugi iti panagadal ti Biblia.
4 Maysa a kabsat a lallaki iti nakapaima ti dua a magasina iti maysa a tao ngem linipatanna daytoy, ta pagarupenna a saan nga interesado. Sumagmamano nga aldaw kalpasanna, daytoy a tao ti nagsurat iti lokal a kongregasion a nagkiddaw iti bautismo. Maysa a misionera a kabsat ti nasaludsodan no ania dagiti rason a nakatulong iti 74 a tattao a nagbalin nga agibumbunannag. Kunana: “Nawadwad a tiempo ti panagmagasinami, ken sinarungkaranmi dagidiay tattao a nangala iti magasina agingga a naipasdekmi iti panagadal ti Biblia kadakuada.”
5 No dadduma makaibatitayo laeng ti tract iti umuna a bisita. Maysa a manangaywan ti sirkito, a nakikuyog iti maysa nga agibumbunannag, nangibati ti maysa a tract iti maysa a babai. Pinaregtana ti kabsat a babai a sumarungkar. Nagsubli iti saan a nabayag ket dagus a naipasdekna iti panagadal ti Biblia.
6 No Maipakita ti Interes: No ti bumalay ket saan a mangala iti literatura, saan a kanayon a kaipapananna dayta nga awan ti interesna. Maysa nga espesial payunir ti nakadlaw nga adda bassit interes iti babai a kanayon nga agkitakit a mangawat ti magasina. Impuera daytoy payunir dagiti magasina, ket ti babai situtulok a makisao iti sumagmamano a parapo ti maysa a polieto. Kalpasan ti sumagmamano pay a sarungkar, naaddaanen iti panagadal ti Biblia a mamindua iti maysa a lawas.
7 Bayat a regulartayo a sumarungkar iti amin nga aginteres, apitentayo ti bunga a mangyeg iti nabaknang a bendision kadatayo a mismo ‘ken dagidiay a dumngeg kadatayo.’—1 Tim. 4:16.