Maaddaan iti Tured a Sumarungkar
1 Kaay-ayoyo kadi ti agsarungkar? Kaay-ayo dagiti adu nga agibumbunannag. Mabalin a maamakkayo iti damo, aglalo no sublianyo dagiti bumalay a saan unay nga interesado idi damo a nakasaritayo ida. Ngem no ‘agurnongkayo iti kinatured babaen ti Diostayo a mangisao iti naimbag a damag’ kadagiti sarungkaranyo, mabalin a masdaawkayo ta nakalaklaka ken makaparagsak gayam daytoy a trabaho. (1 Tes. 2:2) Kasano a kasta?
2 Kinapudnona, adda dakkel a nagdumaan ti panagsarungkar ken ti damo nga ipapan. Iti panagsarungkar, am-ammoyon ti sarungkaranyo, saan a maysa a diyo am-ammo, ket kadawyanna a nalaklaka ti makipatang iti am-ammoyo ngem iti diyo am-ammo. No maipapan kadagiti nabaknang a gunggona nga itden ti pannakiraman iti daytoy a trabaho, mabalin nga agresulta dagiti panagsarungkar kadagiti nabunga a panagadal iti Biblia.
3 No mamalaybalaytayo, maulit-ulit a madanontayo dagiti tao a saan nga interesado iti napalabas nga isasarungkartayo kadakuada. Apay ngarud nga agkarasarungkartayo? Ammotayo nga agbaliwbaliw ti kasasaad dagiti tao ket ti maysa a tao a kasla saan nga interesado wenno bumusbusor pay ketdi iti napalabas nga isasarungkar mabalin nga interesadon iti sumaruno nga ipapantayo. Bayat a sipapanunot iti dayta, agsaganatayo para iti isasarungkartayo ken ikararagtayo ti pamendision ni Jehova tapno ipangagda ti ibagatayo.
4 No, iti panagbalaybalaytayo, siaayat a kasabaantayo dagiti tao a saan a pulos nga interesado idi, saan kadi a rebbeng nga ad-adda koma a siaayat a sarungkarantayo ti siasinoman a nangipakita iti interes iti mensahe ti Pagarian?—Aramid 10:34, 35.
5 Adu kadatayo ti adda iti kinapudno ita gapu ta inan-anusannatayo a sinarungkaran ti maysa nga agibumbunannag. No maysaka kadagitoy, mabalinmo nga isaludsod iti bagim: ‘Ania a kababalin ti impakitak idi damo iti dayta nga agibumbunannag? Inawatko kadi a dagus ti mensahe ti Pagarian idi damo a nangngegko? Mabalin ngata a kasla saanak idi nga interesado?’ Rebbeng ketdi a maragsakantayo ta ti agibumbunannag nga immay imbilangnatayo a maikari a masarungkaran ket ‘nangurnong iti tured babaen iti Dios[na],’ sinubliannatayo, ken insurona kadatayo ti kinapudno. (1 Tes. 2:2) Dagidiay ngay interesado idi damo ngem idi agangay kasla likliklikandatayon? Nasken ti positibo a kababalin, kas ipakita ti sumaganad a kapadasan.
6 Bayat a mangaskasabada iti lansangan iti bigbigat, nasabet ti dua nga agibumbunannag ti maysa nga agkabannuag a babai a mangidurduron iti stroller ti anakna. Nangala ti babai iti magasin ket inawisna dagiti kakabsat nga umay idiay balayna iti sumaganad a Domingo. Dimtengda iti naikeddeng nga oras, ngem imbaga kadakuada ti bumalay nga awan tiempona a makisarita. Nupay kasta, inkarina nga addanto iti sumaganad a lawas. Agduadua dagiti kakabsat no tungpalenna ti tulagan, ngem ur-urayen ida ti babai idi nagsublida. Nairugi ti panagadal, ket nakaskasdaaw ti panagprogreso ti babai. Di nagbayag, regular a makigimgimongen ken makiramraman iti serbisio iti tay-ak. Bautisado itan.
7 Ipasdekyo ti Pundasion iti Damo a Pannakisarita: Masansan a maipasdek ti pundasion iti damo a pannakisarita para iti naballigi a panagsarungkar. Denggenyo a naimbag dagiti komento ti bumalay. Ania ti ibagbagana kadakayo? Relihioso kadi? Maseknan kadi kadagiti sosial nga isyu? Interesado kadi iti siensia? historia? iti aglawlaw? Iti ngudo ti saritaan, mabalinyo ti mangpataud kadagiti mamagpanunot a saludsod, ket ikariyo a pagsaritaanyonto ti sungbat ti Biblia inton agsublikayo.
8 Kas pagarigan, no interesado ti bumalay iti kari ti Biblia maipapan iti paraiso a daga, mabalin a maitutop a pagsaritaan pay dayta a topiko. Sakbay a pumanawkayo, mabalinyo nga isaludsod: “Kasanotayo a masigurado a tungpalen ti Dios daytoy a kari?” Sayo inayon: “Nalabit dumaw-asakto inton adda amin a miembro ti pamiliayo, ket ipakitak kadakayo ti sungbat ti Biblia iti daytoy a saludsod.”
9 No saan nga interesado ti bumalay iti uray ania a topiko, mabalinyo nga isaludsod ti maysa kadagidiay naitampok kadagiti presentasion iti makinlikud a panid ti Ministeriotayo iti Pagarian ket usarenyo dayta a kas pangibatayan iti sumaganad a panagsaritayo.
10 Mangaramidkayo iti Umiso a Rekord: Umiso ken kompleto koma ti house-to-house record-yo. Isuratyo a dagus ti nagan ken direksion ti bumalay sakbay a panawanyo ti balay. Dikay pugpugtuan ti numero ti balay wenno ti nagan ti kalye—siguraduenyo nga umiso ti impormasion. Isuratyo no ania ti katataona. Isuratyo ti topiko a nagsaritaanyo, dagiti kasuratan a binasayo, aniaman a literatura nga imbatiyo, ken ti saludsod a sungbatanyo inton agsublikayo. Iramanyo ti aldaw ken oras ti damo nga ipapanyo ken no kaano ti imbagayo a panagsubliyo. Ita ta kompleton ti rekordyo, diyo pukpukawen! Ikabilyo iti natalged a lugar tapno addanto madadaan a pagreperensiaanyo. Pampanunotenyo ti indibidual ken no ania ti aramidenyo iti sumaruno a panagsarungkaryo.
11 Ammuenyo no Ania ti Panggepyo: Umuna, babaen ti panagbalin a napasnek ken mannakigayyem, aramidenyo ti kabaelanyo tapno saan nga alusiisen ti bumalay. Ipakitayo nga interesadokayo kenkuana kas maysa a tao, ngem saan a napasig unay. Kalpasanna, ipalagipyo kenkuana daydi saludsodyo iti napalabas nga isasarungkaryo. Imdenganyo a naimbag ti kapanunotanna, ken sipapasnek nga apresiarenyo ti komentona. Kalpasanna, ipakitayo no apay a praktikal ti panangmatmat ti Biblia. No mabalin, iturongyo iti mainaig a punto iti libro a Pannakaammo a Mangiturong iti Biag nga Agnanayon. Laglagipenyo a naimbag a ti kangrunaan a panggepyo a sumarungkar isu ti panangikagumaan a mangirugi iti panagadal iti Biblia.
12 Ti direkta a pamay-an a naaramat iti libro a Pannakaammo ginutugotna ti adu kadatayo a ‘mangurnong iti tured’ kadagiti panagadal iti Biblia tapno paregtaen dagiti iyad-adalan a makigimong ken makitimpuyog iti organisasion ni Jehova. Iti napalpalabas, iyur-uraytayo idi dagiti indibidual nga agadal pay nga umuna sakbay nga awisentayo ida a makitimpuyog kadatayo. Ita, adu dagiti mayad-adalan a tumabtabunon kadagiti gimong apaman a mangrugida nga agadal, ket naparpartak nga amang ti panagprogresoda.
13 Di pormal a kinasabaan ti maysa a pagassawaan ti katrabahuanda. Idi naginteres iti kinapudno, inawisda nga agadal iti Biblia babaen ti libro a Pannakaammo. Imbagada met kenkuana a rumbeng a tumabuno kadagiti gimong, a pakasungbatan ti adu kadagiti saludsodna. Saan laeng a madadaan ti lalaki a nangawat iti awisda nga agadal no di pay ket nagadal iti mamindua iti makalawas ken regular a makigimgimongen idiay Kingdom Hall.
14 Usarenyo ti Broshur nga Ania ti Kalikaguman ti Dios Kadatayo?: Kadagiti “Dagiti Mensahero ti Nadiosan a Talna” a Kombension Distrito, inawattayo ti broshur nga Ania ti Kalikaguman ti Dios Kadatayo? Makatulong daytoy a broshur iti panangirugi iti panagadal iti Biblia kadagiti managbuteng-Dios a tattao aniaman ti nagaw-atda nga adal. Naglaon dayta iti adu a leksion, a mangsaklaw kadagiti pagdadamuan a sursuro ti Biblia. Epektibo unay a kagawaan daytoy a publikasion iti panangiburay iti pannakaammo ti Dios. Nakalawlawag ken nakasimsimple ti panangilawlawagna iti kinapudno a mausar ti gistay tunggal maysa kadatayo a mangisuro iti sabsabali kadagiti kalikaguman ti Dios. Nalabit nga adu nga agibumbunannag ti maaddaan iti pribilehio a mangikondukta iti panagadal iti Biblia iti daytoy a broshur.
15 Dagiti mangipagarup nga awan panawenda nga agadal iti libro a Pannakaammo mabalin a kayatda nga adalen iti apagbiit ti broshur a Kalikaguman. Magustuandanto la ketdi ti masursuroda! Iti dua wenno tallo laeng a panid, masarakanda ti sungbat dagiti saludsod nga adun a siglo nga inut-utob dagiti tao: Asino ti Dios? Siasino ti Diablo? Ania ti panggep ti Dios iti daga? Ania ti Pagarian ti Dios? Kasanoyo a masarakan ti pudno a relihion? Nupay simple ti panangidatag ti broshur iti kinapudno, nabileg unay ti mensahena. Saklawenna dagiti kangrunaan a punto nga irepaso dagiti panglakayen kadagiti kandidato ti bautismo ken mabalin nga agserbi a pangiruangan iti naun-uneg a panagadal iti libro a Pannakaammo.
16 No iti panagsarungkaryo ket itukonyo ti panagadal, mabalinyo a kunaen laeng ti kastoy: “Ammoyo kadi nga iti sumagmamano laeng a minuto, maammuanyo ti sungbat ti napateg a saludsodyo iti Biblia?” Kalpasanna, mangidatagkayo iti saludsod nga agparang iti pangrugian ti maysa kadagiti leksion iti broshur. Kas pagarigan, no lakay wenno baket ti sarungkaranyo, mabalinyo a kunaen: “Ammotayo a pinaimbag idi ni Jesus dagiti tattao. Ngem iti masanguanan anianto ti aramiden ni Jesus kadagiti masakit? kadagiti lallakay? kadagiti natay?” Masarakan dagiti sungbat iti leksion 5. Mabalin nga aginteres ti relihioso a tao iti saludsod nga: “Ipangag kadi ti Dios ti amin a kararag?” Masungbatan dayta iti leksion 7. Kayat a maammuan dagiti miembro ti pamilia: “Ania ti kalikaguman ti Dios kadagiti nagannak ken kadagiti annak?” Maammuanda bayat nga adalenda ti leksion 8. Dagiti dadduma pay a saludsod ket: “Madangran aya ti natay dagiti sibibiag?” a nailawlawag iti leksion 11; “Apay a nakaad-adu dagiti relihion nga agkunkuna a Kristiano?” a nasalaysay iti leksion 13; ken “Ania ti masapul nga aramidenyo tapno agbalinkayo a gayyem ti Dios?” a nasaklaw iti leksion 16.
17 Tulonganyo Dagidiay Sabali ti Pagsasaoda: Dagiti ngay bumalay a sabali ti pagsasaoda? Aginggat’ mabalin, maisuroda koma iti pagsasao a kannawidanda. (1 Cor. 14:9) No adda kabangibang a kongregasion wenno grupo a kasta ti pagsasaona, mabalin nga ipatulod dagiti naganda kadagiti panglakayen sadiay. No awan dagiti kabangibang a kongregasion wenno grupo ken awan dagiti lokal nga agibumbunannag a makaammo iti pagsasao ti bumalay, mabalin a padasen ti agibumbunannag nga iyadalan ti bumalay, nga usarenna ti broshur a Kalikaguman iti dua a pagsasao.
18 Rinugian ti maysa nga Ingles-pagsasaona nga agibumbunannag nga iyadalan ti maysa a lalaki a Vietnamese ti pagsasaona ken ni baketna, a Thai ti pagsasaona. Dagiti publikasion ken Biblia iti Ingles, Vietnamese, ken Thai ti nausar iti panagadalda. Nupay narigat idi damo, insurat ti agibumbunannag: “Napartak ti naespirituan a panagprogreso dagiti agassawa. Nabigbigda a masapul a makigimongdan a kadua ti dua nga annakda, ket rinabii a basaenda a sangapamiliaan ti Biblia. Addaan ti innem ti tawenna a balasitangda iti bukodna nga iyad-adalan iti Biblia.”
19 No iyad-adalanyo dagiti tao a sabali ti pagsasaoda, in-inayadenyo ti agsao, lawagenyo ti agbalikas, ken dagiti simple a sao ken balikas ti usarenyo. Nupay kasta, laglagipenyo a dagiti tao a sabali ti pagsasaona matratoda koma a buyogen ti dignidad. Saanda koma a matrato a kasla maladaga.
20 Usarenyo a naimbag dagiti napintas nga ilustrasion iti broshur a Kalikaguman. Awisenyo a basaenna dagiti kasuratan iti bukodna a Biblia. No mabalin nga angayen ti panagadal iti tiempo nga adda miembro ti pamilia a mangipatarus, awan duadua a makagunggona dayta.
21 Diyo Itantan ti Agsarungkar: Kasano kabayag nga aguraykayo sakbay nga agsublikayo? Dagiti dadduma nga agibumbunannag agsublida kalpasan ti maysa wenno dua nga aldaw manipud iti damo nga ipapanda. Dagiti dadduma agsublida iti isu met laeng nga aldaw! Nasapa unay kadi dayta? Kaaduanna, kasla saan nga agkedked dagiti bumalay. Masansan a ti agibumbunannag a sumarsarungkar ti kasapulan a maaddaan iti positibo a kababalin, ken iti bassit a tured. Usigenyo dagiti sumaganad a kapadasan.
22 Maysa nga aldaw, madama a mamalaybalay ti maysa a 13 ti tawenna nga agibumbunannag idi makitana ti dua a babbai nga agkuykuyog a magmagna. Silalagip iti pammaregta a mangasaba kadagiti tattao iti sadinoman a pakasarakantayo kadakuada, inasitganna dagiti babbai iti lansangan. Naginteresda iti mensahe ti Pagarian ket agpada a nangalada iti libro a Pannakaammo. Innala ti agtutubo a kabsat ti direksionda, nagsubli kalpasan ti dua nga aldaw, ket inrugina nga inyadalan iti Biblia ti tunggal maysa kadakuada.
23 Ugali ti maysa a kabsat a babai ti agsubli iti sumaruno a lawas. Ngem kalpasan ti maysa wenno dua nga aldaw manipud iti damo nga ipapanna, dumagas tapno ikkanna ti bumalay iti magasin maipapan iti topiko a nagsaritaanda. Kunana iti bumalay: “Nabasak daytoy nga artikulo ket iti panagkunak kayatyo a basaen. Diak makapagbayag a makisarita ita, ngem agsubliak inton malem ti Mierkoles kas nagtulagantayo. Mabalin pay kadi kadakayo dayta a tiempo?”
24 No interesado ti maysa a tao iti kinapudno, masiguradotayo nga addanto bumusor kenkuana. Ti nasapa a panagsublitayo kalpasan ti damo nga ipapan pakirdenna a mangsango iti aniaman nga ibubusor dagiti kabagian, nadekket a gagayyem, ken dadduma pay.
25 Sukayenyo ti Interes Dagidiay Masarakan Kadagiti Publiko a Lugar: Adu kadatayo ti maay-ayatan a mangasaba kadagiti lansangan, pagparadaan, lugan a para iti publiko, paggatangan, parke, ken dadduma pay. Malaksid iti panangipaima iti literatura, nasken a sukayentayo ti interes. Gapuna, ikagumaantay koma nga alaen ti nagan, direksion ken, no mabalin, ti numero ti telepono ti tunggal interesado a tao a masarakantayo. Saan a narigat nga alaen daytoy nga impormasion a kas iti mabalin nga ipagarupyo. Iti panagngudo ti saritaan, iruaryo ti kuadernoyo sayo isaludsod: “Adda kadi pamay-an a maituloytayo daytoy a saritaan iti sabali a gundaway?” Wenno kunayo: “Kayatko a mabasayo ti maysa nga artikulo a masiguradok a paginteresanyo. Mabalinko kadi nga itulod idiay balayyo wenno iti opisinayo?” Insaludsod laeng ti maysa a kabsat: “Iti ania a numero ti telepono a mabalinkayo a makasarita?” Impadamagna nga iti tallo a bulan, kadagiti amin a tao a nakasaritana, tallo laeng ti nagkedked a nangted iti numero ti teleponoda.
26 Usarenyo ti Telepono a Mangbirok ken Mangpatanor iti Interes: Us-usaren ti maysa a payunir a babai ti telepono tapno makasaona dagiti tao nga agnanaed kadagiti pasdek a nainget ti pannakaguardiana. Kasta met laeng a wagas ti panagsarungkarna. Iti damo nga iyaawagna, kunana: “Ammok a saandak nga am-ammo. Mangar-aramidak iti naisangsangayan a panagregget a makisarita kadagiti tao iti lugaryo tapno mangiranud iti kapanunotan a naggapu iti Biblia. No adda wayayo, kayatko nga ibasa kadakayo ti kari a masarakan iti . . .” Kalpasan a mabasana ti kasuratan, kunana: “Saan kadi a nagsayaat no makitatayo ti iyaay dayta a tiempo? Naragsakanak a nangibasa iti daytoy kadakayo. No magustuanyo met dayta, kayatko ti umawagto manen ken ilawlawag ti sabali pay a kasuratan.”
27 Iti sumaruno nga iyaawagna iti telepono, ipalagipna iti bumalay ti napalabas a nagsaritaanda ket ibagana a kayatna a basaen iti Biblia dagiti kasasaad inton awanen ti kinadakes. Kalpasanna apagbiit a kasaritana ti bumalay maipapan iti Biblia. Iti kaadu dagiti nakasaritana iti telepono, 35 a tao ti nangawis kenkuana iti pagtaenganda ket pito a panagadal iti Biblia ti nairugi! Narigat kadi kadakayo no dadduma ti sumarungkar kadagiti interesado a tattao iti tiempo ti lam-ek gapu ta saan a mabalin a pagnaan dagiti kalsada, nayelo, wenno masakitkayo? No kasta, apay a diyo kasarita ida babaen ti telepono?
28 Surnadanyo ti Interes a Masarakan Kadagiti Pagnegosiuan: Saan laeng a panangitukon kadagiti magasin ti nairaman iti panangasaba kadagiti paglakuan. Adu dagiti aglaklako a sipapasnek nga interesado iti kinapudno, ket masapul a maparayray dayta nga interes. Iti dadduma a kasasaad, mabalin a posible ti makisarita maipapan iti Biblia wenno agadal pay ketdi iti mismo a pagnegosiuanda. Iti dadduma a kaso, mabalinyo a kasarita ti interesado a tao bayat ti panaginana iti tengnga ti aldaw wenno iti sabali a nawaya a gundaway.
29 Sinarungkaran ti maysa nga agdaldaliasat a manangaywan ti makinkukua iti bassit a groseria ket intukonna nga idemostra ti panagadal iti Biblia. Idi napagsaludsodan no kasano kapaut ti demostrasion, kinuna ti agdaldaliasat a manangaywan a 15 a minuto laeng. Iti kasta, nangisab-it ti tindero iti karatula iti ruangan: “Aglukat Kalpasan ti 20 a Minuto,” nangala iti dua a tugaw, ket pinagsaritaanda a dua ti umuna a lima a parapo iti libro a Pannakaammo. Nagustuan unay daytoy napasnek a lalaki ti naadalna ket timmabuno iti Miting Publiko ken iti Panagadal iti Pagwanawanan iti daydi met la a Domingo ket immanamong nga ituloyda ti agadal iti sumaruno a lawas.
30 No itukonyo ti panagadal iti pagnegosiuan, mabalinyo a kunaen daytoy: “Mangusarkam laeng iti 15 a minuto a mangidemostra iti programami a panagadal iti Biblia. No kombeniente, maragsakanak a mangipakita kadakayo no kasano a maaramid dayta.” No kasta, agtalinaedkayo iti naikeddeng nga oras. No saankayo a makapagsarita iti mabayag iti pagnegosiuan, mabalin nga ad-adda a maitutop a sarungkaranyo ti tindero iti pagtaenganna.
31 Agsublikayo Uray No Awan Naipaima a Literatura: Maitutop a sarungkaran ti siasinoman a nangipakita iti interes, napaimaan man iti literatura wenno saan. Siempre, no nabatad a talaga a saan nga interesado ti bumalay iti mensahe ti Pagarian, nasaysayaat no mapankayo laengen iti sabali.
32 Bayat a mamalaybalay, nadanon ti maysa a kabsat ti maysa a babai a mannakigayyem unay ngem sitatangken a pinagkedkedanna dagiti magasin. Insurat ti agibumbunannag: “No mano nga aldaw a pinampanunotko ket kayatko a makasaritanto manen.” Kamaudiananna, nagkararag ti kabsat, pinaturedna ti nakemna, ket nagtuktok iti ruangan ti balay ti babai. Naragsakan idi pinastrek ti bumalay. Nairugi ti panagadal iti Biblia, ket naangay manen dayta iti sumuno nga aldaw. Idi agangay, dimteng ti bumalay iti kinapudno.
33 Agplanokayo a Nasaksakbay Tapno Adu ti Magapuanan: Mairekomenda nga adda koma tiempo a mausar iti panagsarungkar kada lawas. Adu ti magapuanan babaen ti nasayaat a panagplano. Iyurnosyo ti sumarungkar iti isu met laeng a lugar a pagbalaybalayanyo tapno saan a masayang ti adu nga oras iti panagbiahe.
34 Sigun kadagidiay naballigi a simmarungkar ken nangirugi kadagiti panagadal iti Biblia iti pagtaengan, nasken ti panangipakita iti napasnek a personal nga interes kadagiti tattao ken ti kanayon a panangpampanunot kadakuada uray kalpasan ti panagsarungkar. Nasken met ti maaddaan iti makaallukoy a topiko iti Biblia a pagsaritaan ken mangipasdek iti pundasion para iti panagsubli sakbay a pumanaw iti damo a pannakisarita. Maysa pay, napateg a sublian ida a dagus tapno parayrayen ti interes. Masapul a sipapanunottayo a kanayon iti kalattayo a mangirugi iti panagadal iti Biblia.
35 Kasapulan ti tured tapno naballigi ti trabahotayo a panagsarungkar. Kasano a magun-odan dayta? Sumungbat ni apostol Pablo babaen ti panagkunana a ‘mangurnongtayo iti tured’ a mangipakaammo iti naimbag a damag kadagiti sabsabali “babaen iti Diostayo.” (1 Tes. 2:2) No kayatyo ti rumang-ay iti daytoy a banag, agkararagkayo ken Jehova a dumawat iti tulong. Kalpasanna, maitunos kadagiti kararagyo, sublianyo dagiti amin nga interesado. Sigurado a bendisionan ni Jehova ti panagreggetyo!
[Kahon iti panid 3]
No Kasano a Makapagballigi iti Panagsarungkar
◼ Ipakitayo ti napasnek a personal nga interes kadagiti tattao.
◼ Mangpilikayo iti makaallukoy a topiko iti Biblia a pagsaritaan.
◼ Ipasdekyo ti pundasion iti kada isasarungkar.
◼ Kanayon a pampanunotenyo ti tao [a nakasaoyo] no nakapanawkayon.
◼ Agsublikayo kalpasan ti maysa wenno dua nga aldaw tapno surnadan ti interes.
◼ Kanayon a laglagipenyo ti kalatyo a mangirugi iti panagadal iti Biblia.
◼ Agkararagkayo a dumawat iti tulong tapno maaddaan iti tured a mangaramid iti daytoy a trabaho.