Apocalipsis—Dagiti Naluktan a Misterio
1 Ti libro nga Apocalipsis isut’ nabayagen a misterio. Ngem ti impormasion idiay Apocalipsis saan a nairanta a mataginayon a palimed iti agnanayon. Paset daytoy iti Sao ti Dios a masapul a maawatantayo. (2 Tim. 3:16, 17) Makaparagsak, kas ti panangusar ni Jehova ken Juan a mangikomunikar kadagitoy a sirmata iti padana a Kristiano, usarenna met ita “ti matalek nga adipen” a manglukat iti kaipapanan daytoy a makapakintayeg a padto.—Mat. 24:45-47; Apoc. 1:1-3.
2 Ti Tukon iti Marso: Ti libro nga Apocalipsis—Ti Grande a Tampokna Asidegen! isut’ naindaklan a nanglawag kadagiti tattao ti Dios. Ngem apay a makapainteres daytoy kadagiti tattao idiay teritoriayo? Agsipud ta saklawenna daytoy iti pasamak a dumteng kadagitoy maudi nga al-aldaw. Saan kadi a dagiti managpanunot a tattao ket interesadoda iti masakbayan kas ipalnaad ti Dios? Malaksid ti panangiladawanna iti panangukom ti Dios, itukonna met iti karkari ti nakaskasdaaw a bendision iti masanguanan.—Apoc. 21:1-5.
3 Ti aya Apocalipsis a libro ket nauneg unay a maipaay iti pannakaawat ti publiko? Nalawag a nasarakan dagiti dadduma a saan unay a narikut. Kuna ti maysa a lalaki: “Daytoy a pakaammo ket nabileg. Ngem makapainteres. Magustuak.” Maysa a ministro ti nagkuna: “Diak pay nakaammo ken nakabasa ti aniaman a mas makaparagsak ken napudno ngem iti daytoy a libro!” Ti sabali a tao a nakabasa iti libro bayat ti kurang laeng a maysa a lawas naikomentona: “Itan ti matak ket nalawagan iti kinapudno. Kayatkon a baliwan ti intero a panagbiagko.” Sibabatad, adu ti nakasarak iti ragsak bayat a binasada ti libro iti Biblia nga Apocalipsis a buyogen ti pannakaawat iti umuna a daras ket rinugiandan nga alagaden dagiti sasaona.
4 Irekomendayo ti Apocalipsis a Libro iti Sabsabali: Bayat ti Marso, itukonyo iti Apocalipsis a libro a sirarayray kadagiti dadduma. Ibagayo kadagidiay agmayat a bumasa a markaanda dagiti paset ti libro a saanda a maawatan, ket inton agsublikayo, ilawlawagyo dagitoy a puntos kadakuada. Mangted daytoy ti mainayon a basaran iti panagsarungkaryo.
5 Mainayon iti panagbalaybalay a ministerio, adu dagiti nagballigi a nangitukon ti Apocalipsis a libro iti impormal kadagiti kabagian, kaam-ammo, ken kanegosio. Ilawlawagyo no kasano a nagunggonaankayo a mismo manipud kadagiti natarnaw nga ilustrasion, katulongan a tsart, ken dadduma a pangisuro a katulongan iti libro. Daytoy ti mabalin a mangparegta kadagiti dadduma a sumukimat iti libro nga Apocalipsis.
6 Anian a pribilehio ti makaammo iti masanguanan a paspasamak kas naipaduyakyak idiay libro nga Apocalipsis! Kas nakaitalkan dayta a pannakaammo, sigagagartayo koma a mangipakaammo iti kababagas ti Sao ti Dios kadagidiay a dumngeg. Bayat nga aramidentayo dayta, namnamaentayo nga adu pay dagiti makitimpuyog kadatayo a mangaramid iti pagayatan ti Namarsuatayo.—Apoc. 4:11.