Panangiwaragawag ‘iti Sasao ti Padto’
1 Adu a tattao ti mayat a mangammo ti kaipapanan dagiti makariribuk a paspasamak kadagitoy nga aldaw. Magunggonaanda manipud ‘panagdengngeg iti sasao’ ti padto iti Apocalipsis. (Apoc. 1:3) Bayat ti Marso, addaantayo ti oportunidad a tumulong kadakuada babaen ti panangitukon iti Apocalipsis a libro. Ania ti maibagatayo?
2 Nalabit nga epektibo daytoy a yaasideg:
◼ “Ti gubat, bisin, ken sakit ti nangparigat iti sangatauan iti daytoy maika-20 a siglo. Apay a kastoy idinto ta ti tao ket rimmang-ay iti teknolohia? [Palubosan a sumungbat.] Adu ti masdaaw a makaadal a daytoy ket naipadto iti Biblia. Nalabit a nangngegyon maipapan ‘kadagiti uppat a kumakabalio iti Apocalipsis.’ Daytoy ti aktual a padto a matungtungpal kadagitoy nga aldaw. [Luktan ti Apocalipsis a libro iti kapitulo 16, ket ipakita dagiti ilustrasion iti pinanid 91-7.] Bayat a ti padto ket impadlesna iti tiempo ti dakkel a rigat, itukonna met ti namnama. [Basaen ti Apocalipsis 6:2 iti parapo 3.] Ti Nakasakay iti puraw a kabalio isu ni Jesu-Kristo. Babaen iti Pagarianna, inkarina a parukmaenna ti kinadakes ken yegna ti lubong iti kinaragsak ken talna.” Maitukon ti libro.
3 Nalabit a daytoy a saludsod ti mangirubbuat iti makapainteres a diskusion:
◼ “Ania ti mariknayo a kasapulan tapno maikkat dagiti dakes a kasasaad iti lubong? [Palubosan a sumungbat.] Kaaduan a tattao ti kumanunong a kasapulan ti madagdagus a panagbalbaliw tapno masalbar daytoy lubong. Ipakita ti Biblia nga ammo ti Dios no ania ti maaramid ket inkarina a solbarenna dagiti problematayo.” Iturong iti Apocalipsis a libro, panid 171, ken basaen ti Apocalipsis 11:15 iti parapo 1. Ibaw-ing kadagiti ilustrasion idiay pinanid 302 ken 308, ken itudo dagiti bendision iti sidong ti turay ti Pagarian babaen ken Kristo. Kalpasanna ilawlawag no kasanoda a magunggonaan a personal.
4 Mabalin a maragsakankayo a mangibaga iti kaasping daytoy:
◼ “Adu a tattao a nakabasan iti libro nga Apocalipsis iti Biblia ti nakasarak a narigatda a maawatan. Salaysayenna dagiti nagduduma a karkarna a persona ken paspasamak. Daytoy a libro, Apocalipsis—Ti Grande a Tampokna Asidegen!, ipaayna iti bersikulo por bersikulo a panangsalaysay iti intero a libro ti Apocalipsis ken ipakitana no kasano a maapektarantayo a personal iti kaitungpalanna.” Luktan ti libro iti panid 15, parapo 2, ket itudo ti Apocalipsis 1:1, iti napatak a [letra]. Ilawlawag a dagiti kastoy a kita ti komento ti maited iti kada bersikulo iti libro ti Apocalipsis. Maitukon ti libro.
5 No ti tao ket kupado wenno dikay masiguro no adda umdas nga interesna, mangibatikayo laeng iti maysa a magasin wenno tract. Inton agsublikayo ket mangipakita ti interes, tukonanyo iti libro.
6 Ti mensahe a linaon ti Apocalipsis ket apektaranna ti amin a sangatauan. Gapuna a kasapulan dagiti amin a timuden ti sasao ti padto. Sapay koma ta aramidentay amin a kabaelantayo a mangiwaragawag iti daytoy nasken a mensahe.