Inaldaw a Naespirituan a Taraon—Nasken iti Kristiano a Pamilia
1 “Masapul nga agbiag ti tao, saan a babaen laeng iti tinapay, ngem ti tunggal sao a rummuar iti ngiwat ni Jehova.” (Mat. 4:4) Anian ti kinapudno dagitoy a sasao! Tapno matulongantayo a kanayon a mataraonan ti Sao iti Dios, impablaak ti Sosiedad iti polieto a Panangsukimat kadagiti Kasuratan iti Inaldaw-aldaw. Kas Kristiano a pamilia, nangtudingkayo aya iti tiempo ti kada aldaw a mangusig iti teksto ti aldaw?
2 Masapul a Mapaguadan Dagiti Nagannak: Babaen ti kupado a rutina, nalaka laeng a maipad-eng iti pannakausig ti teksto, a panunoten a mabalin a maaramid dayta iti sabali a tiempo. Ngem no sipupuot dagiti nagannak iti espiritual a kasapulanda, maisarakda ti kada aldaw a mangaramid iti daytoy a sangsangkamaysa. (Mat. 5:3) Saanda laeng nga ibasa ti teksto kadagiti annakda ngem ilawlawagda met dagiti puntos manipud iti komento ti Pagwanawanan ken pagsaritaanda iti aplikasion ti impormasion ken pammagbaga. Pudno, mabalin a kasapulanna iti pinget a mangiruam, ngem dakkel ti magunggona. (Maidilig iti Aramid 17:11, 12.) Gapuna, nagannak, mangituyangkayo iti naimbag nga ehemplo.
3 Isapulyo ti Kombeniente a Tiempo: Kaano ti kasayaatan a tiempo a maipaay iti intero a pamilia a sangsangkatimpuyog a mangadal ti teksto? Adda pagimbaganna no mairugi ti kada aldaw babaen iti panangusig ti maysa a teksto iti Biblia. Idiay Bethel ken kadagiti balay dagiti misionero iti aglawlaw ti lubong, mairugi iti kada aldaw babaen ti panagdaydayaw iti agsapa, a ramanenna ti diskusion iti teksto ti aldaw. Tumulong daytoy kadagiti kakabsat iti nasayaat a rubbuat iti kada bigat, nga inaldaw a maisarming dagiti pammalagip ni Jehova.—Sal. 1:1, 2; Fil. 4:8.
4 Magunggonaan met dagiti Kristiano a pamilia manipud iti binigat a diskusion ti Biblia. Matulongan dagiti annak a makirupak kadagiti pagpeggadan ti espiritualidadda idiay pagadalan. No saan pay laeng a posible iti intero a pamilia a mangusig ti teksto a sangsangkamaysa, mangaramid dagiti nagannak iti maitalali nga urnos tapno saanda a masaaw ti espiritual a taraonda. Kas ehemplo, no ti ama ket masapul a mapan idiay trabahona sakbay a bumangon dagiti annakda iti agsapa, nalabit a ti ina isut’ mangilawlawag iti teksto kadagiti annakda. Dagiti dadduma a pamilia ti agsasarita maipapan iti teksto no rumabii agsipud ta isu ti kaaddada amin. Kada pamilia ti mangurnos iti iskediol a kasayaatan a maitutop ti kasasaadda.
5 Ti inaldaw a naespirituan a taraon isut’ nasken iti Kristiano a pamilia. Umuna nga ilugaryo ti pannakausig iti inaldaw a teksto. (Fil. 1:10) Ti panagteksto iti kada aldaw isut’ tumulong kadatayo a mangsalimetmet a siiirut kadagiti nalinteg a prinsipio ken linlinteg ni Jehova.