Gimong ti Serbisio iti Hunio
Lawas ti Hunio 8-14
10 min: Lokal nga anunsio ken dagiti napili manipud iti Dagiti Pakaammo idiay Ti Ministeriotayo iti Pagarian. Maparegta dagiti agibumbunannag a rummuar iti serbisio bayat ti ngudo iti lawas. Repasuen dagiti mapagsaritaan a puntos manipud kaudian a ruar dagiti magasina a mausar ti panagmagasina iti Hunio 12.
20 min: “Ti Katan-okan a Tao a Nagbiag Pay Laeng.” Saludsod ken sungbat a panangkobre iti artikulo. No makobrian ti parapo 3 ken 4, maiyurnos iti ababa a demostrasion a mangipakita no kasano a mairugi ti saritaan iti bumalay sa maitukon ti libro. Maigunamgunam iti importansia ti panangkabisado iti publikasion.
15 min: “Ti Panglukat a Sasao ket Naiduma ti Maaramidanna.” Malawagan ti artikulo a kadua dagiti timmabuno. Pinadasda kadin dagiti introduksion a naisingasing iti kallabes a Ti Ministeriotayo iti Pagarian, a kaaduan kadagitoy ti naadaw manipud iti Panakirinnason a libro? Ania nga introduksion ti nasarakanda a kasayaatan iti lokal a teritoria? Kaano nga agsagana ken agsanay dagiti agibumbunannag iti introduksionda a maipaay idiay tay-ak ti serbisio? Maadda ti dua wenno tallo nga abbaba a demostrasion kadagiti introduksion nga epektibo iti lokal.
Kanta 32 ken pangserra a kararag.
Lawas ti Hunio 15-21
10 min: Lokal nga anunsio, agraman report iti kuenta ken subalit ti donasion. Komendaran ti kongregasion iti pinansial a suportar nga agpaay ti kongregasion ken iti sangalubongan a trabaho ti Sosiedad.
20 min:“Agaramidkayo iti Epektibo a Panagsarungkar.” Mapagsaritaan a kadua iti dumdumngeg dagiti panulbek a puntos ti artikulo, a nalabit a mairaman iti ababa a kallabes a kapadasan a ti panagsarungkar ket nagbanag iti pannakatignay ti mainayon pay nga interes. Usaren dagiti maudi nga innem aginggat’ walo a minutos a mangidemostra no kasano a ti konduktor iti Panagadal ti Libro iti Kongregasion ket matulonganna ti dua wenno tallo nga agibumbunannag nga agsagana a sumarungkar iti interesado a tattao a nasarakanda idiay lokal a teritoria. No koma ta mabalin, usaren iti aktual a panagsarungkar nga isut’ aramiden ti agibumbunannag iti kalpasanna.
15 min: Saluadanyo ti Bagiyo Manipud iti Apostasia. Diskusion iti nagbaetan ti maysa a panglakayen ken agibumbunannag a nakatugawda iti maysa a lamisaan. Ilawlawag iti agibumbunannag a nakasarak ti maysa a tao idiay serbisio nga agbasbasa iti apostata a literatura. Ibaga ti agibumbunannag iti panglakayen a mariknana a ti bumalay ket napudno iti panagimtuodna. Nagkitakit ti agibumbunannag iti tukon ti bumalay nga apostata a publikasion ngem ikagumaanna a sungbatan iti saludsod ti bumalay. Komendaran ti panglakayen daytoy agibumbunannag a maipaay iti nasayaat a kababalin ken tignayna. Imbes a pagsaritaan no ania iti insurat ken kuna dagiti apostata, nasayaat no maisentro ti Nainkasuratan a panangmatmat kadagiti bambanag kas naiwayat iti Panakirinnason a libro. Awisen ti panglakayen iti agibumbunannag a luktanna ti librona a Panakirinnason, ket repasuenda a dua iti pinanid 38-41. Masapul a ti diskusion ket nabara ken makaparegta bayat nga usigenda iti depinasion ti apostasia, iti kada natarnaw a subtema, ken napili a panulbek a teksto kas ipalubos ti tiempo. Maingudo ti diskusion babaen iti positibo a komento kadagiti amin a makapabileg ken makaparegta a material a mabalin a maadal. Mairanud iti bumalay ti makapabileg a mensahe. No isu ket sinsero, makitana iti nagdumaan ti positibo a panangawat iti kinapudno ken ti negatibo, nakritika a wagas dagiti apostata. Babaen ti panagkedked kadagiti apostata a kapanunotan ken material, maiparangarangtayo iti kinasungdo ken Jehova ken ti makita nga organisasionna.
Kanta 65 ken pangserra a kararag.
Lawas ti Hunio 22-28
5 min: Lokal nga anunsio.
20 min: “Iparegta ti Panangragpat Kadagiti Espiritual a Kalat.” Diskusion dagiti dumdumngeg nga imatonan ti maysa a panglakayen. Kalpasan a mausig ti parapo 6, mainterbio iti mapagulidanan nga agibumbunannag nga addaan ti agtutubo a nangipangag iti pammaregta a nangragpat kadagiti espiritual a kalat. Kasano a naparegta? No mausig iti parapo 7, maitudo dagiti praktikal a gunggona nga agtaud ti panangrepaso dagiti nagannak ken annak iti kapitulo 22, 38, ken 39 iti Saludsod Dagiti Agtutubo a libro.
20 min: “Panangibangon iti Kristiano a Personalidad Kadagiti Annaktayo.” Diskusion ti dua a kakabsat iti artikulo manipud Hulio 1, 1991, a Pagwanawanan, pinanid 24-7. Mailawlawag iti panagkasapulan ti kinapasnek iti biang dagiti nagannak. Maiyaplikar ti material iti lokal a kasapulan ti kongregasion.
Kanta 213 ken pangserra a kararag.
Lawas ti Hun. 29-Hul. 5
10 min: Lokal nga anunsio ken Teokratiko a Damdamag. Dagiti kapadasan manipud kampania iti Katan-okan a Tao a libro (dagitoy ti mailinea a nasakbay babaen iti interbio kadagiti agibumbunannag ken payunir).
15 min: Panangaramat iti Creation a libro iti Hulio. Palawag nga adda demostrasionna. Malawagan dagiti mapagsaritaan a puntos manipud iti libro a maaramat no itukon ti Creation a libro iti Hulio. Nalabit a ti material iti kapitulo 16 ken 17 a “Why Would God Permit Suffering?” ken “Can You Trust the Bible?” ti makaawis kadagiti bumalay. Paidemostra iti makabael nga agibumbunannag ti tukon, a mausar dagiti kasuratan a kas iti Hebreo 3:4 ken Apocalipsis 4:11 a pangsumra iti teoria ti ebolusion ken pabilgen iti pammati a ti Dios isut’ Nangaramid iti tao. Ti material iti libro a Panakirinnason iti sidong ti “Panamarsua” ket mabalin met nga usaren no ipalubos iti tiempo.
20 min: “Inaldaw a Naespirituan a Taraon—Nasken iti Kristiano a Pamilia.” Saludsod ken sungbat a diskusion iti material.
Kanta 108 ken pangserra a kararag.