Panangitukon iti Panangbiruk ti Sangatauan iti Dios
1 Adu ita dagiti makarikna a ti relihion ket pribada laeng a banag. Gapuna, maysa a karit ti makisao iti kaaruba maipapan daytoy a suheto. Ngem adda kadatayon iti libro a Panangbiruk ti Sangatauan iti Dios, a tumulong kadatayo a mangdanon kadagiti tattao iti nagduduma a relihioso a nalikudan. Itukontayo daytoy iti tay-ak bayat ti Nobiembre.
2 Ania ti sawenyo a pangriing iti interes ti bumalay a bumasa iti daytoy a libro? Dagiti sumaruno a singasing ti tumulong kadatayo a mangipakita kadagiti kaarubatayo iti kasapulan a “panangbiruk ken Jehova.”—Isa. 55:6.
3 Apay a Sukimaten no Ania iti Sawentayo?: Idinto ta adu ti mapneken iti relihionda ken saanda nga interesado a mangsukat iti dayta, kasapulan nga irukod ti introduksiontayo a tumulong iti bumalay a mangsukimat no ania ti sawentayo a buyogen iti silulukat a panunot.
4 Kalpasan ti matutop a kablaaw, mabalinyo a kunaen:
◼ “Iti pannakisaomi kadagiti kaarubatayo, nasarakanmi nga adu dagiti tattao ti mapneken iti relihionda ket saandan a kayat a baliwan. Ngem no itiempo dagiti tattao a sukimaten iti pammati dagiti sabsabali, saan kadi a mangiturong daytoy ti nasaysayaat a panagkinnaawatan ken maksayan iti guranggura ditoy lubong? [Palubosan a sumungbat.] Siputanyo no ania iti kunaen ti Biblia maipapan kadagidiay agayat iti Dios ken no kasano ti riknada iti sabsabali.” Kalpasan a mabasa ti Aramid 17:26, 27, iturong ti asikaso iti parapo 15 ken 16 idiay panid 10 ti libro a Panangbiruk ti Sangatauan iti Dios.
5 Adu ti nakasarak a ti panagturong iti maysa a kapitulo ti libro a mangilawlawag iti relihion daydiay bumalay ket awisenna ti asikasona. Kitaenyo no kasano a maaramid daytoy.
6 Kalpasan a maiyammo ti bagiyo, mabalinyo a kunaen:
◼ “Iti kaadu dagiti relihion ita, pinadasyo kadin nga inusig no kasano a masiguro a ti relihiontayo ket anamongan iti Dios?” Kalpasan ti komento iti bumalay, iturong ti asikasona iti kahon a masarakan idiay panid 377 iti libro a Panangbiruk ti Sangatauan iti Dios, a mangipakita kadagiti sangapulo a wagas a panangilasin iti pudno a relihion, nga ipamatmat a nangruna ti punto numero 7. Saludsodan iti bumalay no kumanunong a ti mangalagad iti pudno a relihion ket kasta ti mariknada maipapan iti sabsabali a rasa ken nasionalidad. Kitaen dagiti naisitar a kasuratan.
7 Sabsabali a Benneg a Makatulong: Ti indese iti suheto idiay likud ti libro ket mabalin met nga usaren. Kas ehemplo, no kunaen dagiti adu a pareho amin a relihion, kitaenyo iti paulo a “Relihion” ken ti subtema nga “‘patas amin a relihion’: 12.” Dagiti lima a “Salsaludsod a Masapul a Sungbatan” idiay pinanid 17-18 ket mabalin a nangruna a paginteresan dagidiay agsaludsod no ti Biblia ket isursurona iti ikaskasaba ti kaaduan a relihion.
8 Babaen iti panangusar ti epektibo nga iyaallatiw iti libro, mabalin a matulongan dagiti tattao a makasaotayo a mangbiruk iti pudno a Dios, ni Jehova.