Kasapulan ti Sangatauan a Biruken iti Dios
1 Bayat daytoy maika-20 a siglo, adda nakaro unay a panagakar iti populasion kas resulta dagiti gubat, panangirurumen, ken rigat iti ekonomia wenno panagbiag. Daytoy ti nangyeg kadagiti nagduduma a relihioso a grupo a nagkaykaysa. Gapuna a saan a karkarna iti panangasaba a trabahotayo a masabet dagiti tattao a naggapu iti nagduduma a relihioso a nalikudan.
2 Tapno maawatantayo iti dadduma a relihion ken ti historiada, addan kadatayo iti libro a Ti Panangbiruk ti Sangatauan iti Dios. Sungbatanna dagiti adu a saludsod maipapan iti pammati dagiti kangrunaan a relihion ditoy lubong. Usarentayo daytoy iti ministeriotayo bayat ti Nobiembre. Ania ti mailawlawagtayo a pangparegta kadagiti napudno a tattao a mangadal pay iti ad-adu maipapan ti Dios?
3 Maysa a kangrunaan a saludsod a sungbatan daytoy a libro isut’: Ti aya tao ket addaan iti imortal a kararua nga agtultuloy nga agbiag kalpasan ti ipapatay? Gistay amin a relihion ket isursuroda daytoy nga ideya. Dagitoy dagiti dadduma pay a saludsod a pinataud daytoy a libro: Adda kadi impierno a pakatutuokan dagiti kararua? Ania ti namnama dagiti natay? Adda kadi maymaysa a Dios wenno adu a didios? Mabalin a maiyawis ti asikaso kadagiti saludsod idiay pinanid 17-18 daytoy a libro.
4 Kasapulan ti intero a sangatauan a biruken iti Dios itan nangruna ta asidegen ti Armagedon. Anian a pribilehio ti adda kadatayo a mangtignay iti dadduma a mangsapul ken Jehova bayat a masarakan pay! (Isa. 55:6, 7) Ti libro a Ti Panangbiruk ti Sangatauan iti Dios mangted iti impormasion kadagiti tattao a nagduduma ti nalikudanda. Kas ehemplo, ti parapo 26 iti panid 297 ilawlawagna kadagiti Muslim a ti pudno a Kinakristiano ket saanna nga isursuro iti doktrina a Trinidad.
5 Addaantayo kadagiti rason a maipaay ti narayray a panangiparang iti daytoy a libro. No kabisadotayo dagiti linaonna, maisaraktayo kadagiti oportunidad a mangtignay ti interes dagiti napudno a tattao iti amin a relihion. Sapay koma ta adda regtatayo iti daytoy a serbisio.
6 Maysa a naparabor ken naasi a Dios ni Jehova. Anian a naggrasia iti awisna a mangadal maipapan kenkuana! Mabalin a nawadwad pay laeng dagidiay agbalin a managdayaw ken Jehova. Bayat ti Nobiembre, babaen iti tulong daytoy libro a Ti Panangbiruk ti Sangatauan iti Dios, matulongantayo pay dagiti adu iti Kakristianuan agraman dagidiay adda iti saan a Kristiano a nalikudan nga agdayawda met ken Jehova “babaen iti espiritu ken kinapudno.” (Juan 4:23, 24) Anusantayo koma a saraken dagidiay agbirbiruk iti kinapudno ket pabilgentayo ti relasionda iti Dios ti kinapudno. Isut’ mabalin a masarakan pay!