Saludsod

◼ Kasano ti panangimaton iti manangaywan ti serbisio iti trabaho dagiti ministerial nga adipen a mangtamtaming iti departamento ti literatura ken magasina?

Ti responsabilidad iti manangaywan ti serbisio ket saan laeng a limitado iti panagbisita kadagiti grupo ti panagadal iti libro a binulanbulan ken mangurnos iti regular a taripnong nga agpaay iti tay-ak ti serbisio. Daytoy a panglakayen ket nainteres met unay iti tunggal banag a makaapektar iti trabaho a panangasaba idiay teritoria ti kongregasion.

Siguruenna a ti kada bulan nga abasto iti kampania ti literatura ken magasina ket adda umdas ken nasayaat iti kasasaadda. Iti daytoy a panggep maimatonanna dagiti adu a responsabilidad dagiti natudingan a ministerial nga adipen a mangtaming iti literatura ken magasina.

Ipaay ti manangaywan iti serbisio ti naiduma nga asikaso kadagiti anunsio iti sumungad a kampania ti literatura bayat nga agminar dagitoy idiay Ti Ministeriotayo iti Pagarian. Isu ken daydiay kabsat a mangtaming iti literatura ti mangsiguro nga adda umdas a literatura a mausar, ngem masapul a naannadda a saan koma a sumubra. No ti maysa a publikasion ket mausar idiay tay-ak iti umuna a daras wenno maadalton ti saan a mabayag iti kongregasion, matinong daytoy sakbay a maipatulod ti pedido iti Sosiedad. No ti literatura ket naitukonen iti napalabas, ti report iti kongregasion idiay tay-ak ti serbisio iti napalabas a kampania ti mangibaga no adda pay laeng umdas nga abasto. Siempre, maited met ti konsiderasion iti bilang dagiti agibumbunannag nga agserbi kas auxiliary payunir bayat ti bulan agraman iti umad-adu a bilang dagiti agibumbunannag ken regular payunir manipud idi naudi a naitukon daytoy a literatura. Ti literatura isut’ maala sakbay ken kalpasan dagiti gimong ti kongregasion. Dagiti literatura ti maidulin a nasayaat iti nadalus, namaga a lugar tapno saanda a madadael.

Ti manangaywan iti serbisio ket makitunos met iti kabsat a mangtaming iti departamennto ti magasina. Sagpaminsan, ti manangaywan iti serbisio ken ti kabsat a mangimaton iti magasina ket pagdiligenda ti bilang dagiti magasina a napedido iti kada bulan idiay bilang ti magasina nga aktual a naipaima iti ministerio. Nalabit a kasapulan dagiti dadduma nga agibumbunannag a pabassitenda iti pedidoda a magasina no dagitoy ket kanayonen a maurnong idiay balayda. Saan koma a masayang dagiti magasina.

Babaen ti isu met laeng a prinsipio iti panunot, ti manangaywan iti serbisio ti masapul a mangsitar a personal iti kantidad ti maikampania a literatura nga ikiddaw iti kongregasion idiay Literature Order Form (S-14). Iyawatna daytoy a porma iti sekretario ti kongregasion, isu a siaannad a mangusisa kadagiti nailanad iti porma, nga imutektekanna a naimbag ti bilang dagiti espesial a kiddaw a pagbasaan a nailista.

Siempre, no dagiti nadutokan a kakabsat ket addaanda iti saludsod a maisinggalut ti panangusarda kadagiti porma ken panangidulin iti rekord, ti sekretario isut’ siraragsak a bumadang iti daytoy a banag maipapan ti trabahoda.