Panangiparang ti Naimbag a Damag—Panangiparang ti Naimbag a Damag—Babaen ti Panangusar Kadagiti Publikasion a Nainsiriban
1 Ti programa iti espesial nga aldaw ti asamblea nga agpaay iti 1991 a tawen ti serbisio dinakamatna iti maysa a diskusion a “Ti Ministeriotayo—Saan nga Ordinario, ngem Nasantuan.” Naigunamgunamna a ti trabahotayo ket sagrado a saan koma a laglag-anen. Idinto ta dagiti naimaldit a literatura ket kagawaan iti ministeriotayo, masapul nga ipakita ti panagraem babaen iti panangusar a nainsiriban kadagiti publikasiontayo.
2 Bayat ti 1990 a tawen iti serbisio, namartuat ti Sosiedad iti 678 a milion a magasina ken nasurok a 51 milion a Biblia ken naabongan a libro a mausar iti sangalubongan a tay-ak. Idatagna daytoy iti nawadwad a gastos manipud kadagiti naidedikar a pagtaudan, agraman tiempo, pigsa, ken kuarta. Ania iti nagduduma a wagas a maiyanninag ti napusuan a panangipateg iti literaturatayo bayat nga maipakaammo ti mensdahe iti Pagarian kadagiti nasingpet ti panagpuspusoda a tattao?
3 Personal ken Pamilia a Panagadal: Iti Roma 2:21 nakuna ni apostol Pablo: “Sika, nupay kasta, a mangisuro iti sabali, saanmo aya nga isuro ta bagim met laeng?” No itiempotayo ti agbasa, agadal, ken agutob a sikakararag kadagiti naibasar iti Biblia a literaturatayo, maidemostratayo no kasano ti kawadwad iti panangipateg kadagiti naintiempuan a parabor ni Jehova a naespirituan a taraon babaen ti klase mayordomona. (Luc. 12:42) Ti pannakibansag iti nailatak a kinapudno isut’ tumulong kadatayo a mangpasudi ti nangato a panangmatmat kadagiti amin nga intalek ni Jehova iti saluadtayo. Kasta met dagiti annak, masapul nga umiso ti pannakasanayda a mangipateg ken mangtaripato iti literaturada, a saanda a markaan wenno mulitan ti langana. Mainayon pay, dagiti literatura ti masalimetmetan a nadalus ken nadalimanet a mausar iti tay-ak.
4 Liklikan ti Kinagastar: Tapno pudno a makagunggona, masapul a maipaima dagiti literatura kadagiti agsapsapul ti kinapudno, kayatna a sawen, dagidiay napudno iti interesda maipapan ti damag ken trabahotayo. (Mat. 10:11) Masapul ngarud a liklikan iti kinagastar ti literatura, a saantay a palubosan dagiti magasina, libro, ken dadduma a pagbasaan a mabunton iti pagtaengan.
5 Idinto ta dagiti magasina ket napetsaanda, adda limitado a kapaut ti tiempo a mangitukon kadakuada kas agdama a ruar. Gapuna nga ipamuspusan iti biangtayo a kasapulan a maipaima dagitoy a magasina kadagiti interesado a tattao. No masarakan a dagiti magasinatayo ket agtinnag latta a maurnong, nalabit a maihusto iti iskedioltayo a mangusar ti ad-adu a tiempo iti panagmagasina a trabaho. No aramiden daytoy, ipakpakita a mapagtalkantayo a mayordomo iti di magatadan nga asi ti Dios.—1 Cor. 4:2; 1 Ped. 4:10, 11; maidilig iti Lucas 16:1, 10.
6 Ni Jehova “impaaywanna” kadagiti dedikado a tattaona iti nadagsen a responsabilidad ken trabaho, agraman “pagsanikuaanna” iti matalek a “mayordomo” nga addaan autoridadna. (2 Tim. 1:12; Luc. 12:42-44, 48b; 1 Tim. 6:20) Babaen ti napasnek a panangipateg iti pribilehio a serbisio ti Dios, maitultuloytayo iti masirib a panangusar kadagiti publikasiontayo a mangiparang ti naimbag a damag iti dadduma.