Panangiparang a Mangtignay ti Interes
1 Kanayon koma nga ipakita ti nabara, personal nga interes kadagiti tattao a masabettayo iti tay-ak ti ministerio. Ti panangsaludsod iti kapanunotanda ipakitana ti panagraemtayo iti panangmatmatda. Ti pataudentayo a saludsod isut’ nalabit a mangtignay iti panagpanunot ken panagkayatda a mangadal ti ad-adu pay.
2 Bayat ti Hunio itukontayo iti libro a Life—How Did It Get Here? By Evolution or by Creation? Repasuen daytoy a publikasion a personal ken pilien dagiti masinnunuo a puntos a mailawlawag. No lawagan dagiti puntos manipud Creation a libro, luktan ken ipaimayo iti bumalay. Iturongyo kadagiti masnup a suheto ken ilustrasion.
3 Kalpasan a maiyammoyo ti bagiyo, mabalinyo a kunaen:
◼ “Iti daytoy moderno a lubong, nainrasonan kadi a patien nga adda Dios a namarsua kadatayo ken iti daytoy napintas a daga a pagbibiagantayo? [Palubosan a sumungbat.] No kitaen dagiti nakaskasdaaw a bambanag ditoy daga ken iti uniberso, masdaawtayo maipapan ti urnos ken disenioda. Saan aya a pammatalged daytoy ti kaadda iti maysa a Namarsua? Siputanyo iti rason ti Biblia maipapan iti daytoy a banag. [Basaen ti Hebreo 3:4.] Tunggal patakder adda diseniador ken nangibangon kenkuana. [Iruar ti Creation a libro ken iturong iti ilustrasion idiay panid 114.]” Kalpasanna maiturong iti panid 122 ken basaen ti sasao iti baba ti ladawan iti maysa a relo. Ti ilustrasion ken kasuratan a nakotar iti panid 127 ti mabalin met a mausar. Dagiti kanayonan a puntos ti masarakan idiay Panakirinnason a libro, pinanid 313-317.
4 Wenno mabalinyo a kunaen:
◼ “Ania ti pagarupenyo a kasapulan tapno masarakan iti pudno a talna ken ragsak? [Palubosan a sumungbat.] Kunaen ti Biblia a masapul a bigbigen iti Dios a kas Namarsua iti langit ken daga.” Basaen ti Apocalipsis 14:7, kalpasanna luktan ti Creation a libro iti pinanid 140 ken 141, parapo 24 ken 25. No ti bumalay mangipakita iti interes, iturong idiay kapitulo 19 ken ilawlawag no kasano a ti naindagaan a paraiso ket pumudnonto.
5 No ti bumalay ket iyebkasna iti panagduadua maipapan ti kaadda iti Namarsua, mabalinyo a kunaen:
◼ “Adu a tattao ti kumanunong kadakayo, maigapu nangruna iti amin a sagsagabaen ditoy lubong. No adda Dios, apay a palubosanna iti panagsagaba? Adda kadi mapanunotyo a nainrasonan a panangilawlawag iti daytoy?” Agpannuray iti sungbatna, mabalinyo nga itultuloy babaen ti panangusaryo iti kapitulo 16 ti Creation a libro. Dagiti mainayon a makatulong a sungbat ti masarakan iti Panakirinnason a libro, pinanid 295-296. No dadduma maiparbeng nga ibatian ti tract nga No Apay a Mapagtalkanyo ti Biblia.
6 Ti rantatayo isut’ panangpadas a mangipasdek iti panagadal ti Biblia. Anian a ragsaktayo a naaddaan iti daytoy a nagpintas nga ilustrado a libro a mangilawlawag ti kinapudno maipapan iti panamarsua ken mangidayaw ti Naindaklan a Namarsuatayo! Usarentayo koma a naimbag daytoy bayat iti bulan ti Hunio.