Isaad ti Pamuon iti Umuna a Sarungkaryo
1 Nalaklaka nga aramiden iti epektibo a panagsarungkar no maisaad ti pamuon iti umuna a sarungkar. Ti libro a Panakirinnason isut’ makatulong kadatayo a mangaramid iti dayta.
2 Ti sumaruno a presentasion isut’ naibatay iti maikadua nga introduksion idiay panid 10 ti libro a Panakirinnason, iti baba ti paulo a “Biblia/Dios.”
Kalpasan ti nagayyeman a kablaaw, kunaenyo:
◼ “Masarakantayo nga umad-adu ita ti tattao a makarikna a saan a sigurado no sadino iti pakasarakan ti praktikal a sungbat dagiti dumegdeg a problema iti inaldaw. Pudno kadi dayta kadakayo? [Palubosan a sumungbat.] Masansan a dagiti tattao ket kumitada iti Biblia a tumulong. Aniat’ mariknayo maipapan ti Biblia?” No ti bumalay ket agduadua maipapan iti kinapudnona, iruaryo daydiay tract nga No Apay a Mapagtalkanyo ti Biblia ken basaenyo iti maikadua ken maikatlo a parapo idiay panid 2 ti tract, ket ilawlawagyo kenkuana iti apagbiit.
3 No adu ti saan a mamati idiay teritoriayo, padasenyo nga usaren iti maikalima nga introduksion idiay panid 10 ti Panakirinnason a libro.
Mabalinyo a kunaen:
◼ “Gapu kadagiti panagsusupadi ditoy lubong ita, adu a tattao ti marigatan a mamati iti Dios. Ania ti makunayo? [Palubosanyo a sumungbat.] Kitaenyo no ania ti kunaen daytoy a tract maipapan iti tattao, siensia, ken ti Biblia.” Kalpasanna rugianyo a basaen iti maikalima a parapo ti panid 3 iti tract nga No Apay a Mapagtalkanyo ti Biblia.
4 Patauden iti Salsaludsod Manipud Tract Tapno Pamuonan ti Sumaruno a Sarungkar: Planuen iti umuna a sarungkar a kas maysa laeng a rugi ti serye dagiti panagsarungkar. Saanyo unay nga aduen iti detalye, ngem ipakitayo a napudno ti interesyo kenkuana. Kalpasan a mabasa ti dua wenno tallo a parapo manipud iti tract, mamataudkayo ti saludsod a mabalinyo a pagsaritaan iti masakbayan a sarungkar.
5 Kas ehemplo, mabalin nga iturong ti asikaso iti maikatlo a parapo idiay panid 4 sa maisaludsod: “Ti pagarupyo ipaay ngata ti Biblia iti ebidensia a mapagtalkan no ania ti sawenna maipapan iti masanguanan?” Daytoy ti maipasdek a pamuon iti panagsarungkar, inton usigenyo ti kapitulo 9 ken 10 iti Ti Biblia—Saot’ Dios wenno iti Tao?
6 No ti bumalay ket napudno iti interesna mabalin nga alaenna ti Saot’ Dios a libro ken iti New World Translation bayat ti umuna a bisita. No kasta, mabalinyo nga iyawis ti asikasona kadagiti puntos idiay Kapitulo 10 iti libro ken patanoren dagiti saludsod a masungbatan inton sumaruno a sarungkar. No matmatan iti kada bumalay a kas manamnama a disipulo, ikagumaantayo nga usaren ti pammakada a sasao a mangisaad iti pamuon ti panagsarungkartayo.