Panangirugi Kadagiti Panagadal ti Biblia iti Enero
1 Imbilin ni Jesus kadagiti disipulona nga agbalinda a mannursuro iti naimbag a damag. (Mat. 28:19, 20) Ti kasta a panangisuro isut’ nangruna a maaramid babaen iti panangidaulo kadagiti panagadal ti Biblia. Makipaspasetkayo aya iti daytoy a trabaho? No saan pay, kasanoyo a mairugi iti panagadal tapno masagrapyo ti dakdakkel a paset iti panangisuro ti sabsabali?
2 Nalabit a naikkantayo ti bumalay iti kopia ti tract a Daytoy Kadi a Lubong Makalasatto? ken naikaritayo ti agsarungkar tapno malawagan iti linaonna.
No agsarungkartayo iti bumalay a nabatian iti tract, mabalintayo a kunaen:
◼ “Idi addaak ditoy iti napalabas a sumagmamano nga aldaw, napagsaritaantayo no kasano a naipadto ni Jesus dagiti agdama a kasasaad ti aldawtayo. Kayatko a mausig ti apagbiit iti sumagmamano a salaysay manipud iti tract a nabatik kadakayo. Siputanyo ti nakunana iti baba ti subtema a ‘Ti Pagilasinan.’” Iturong iti panid 3 ti tract, ken lawlawagan iti umuna a dua wenno tallo a parapo iti sidong ti subtema, a mabasa dagiti naisitar a kasuratan. Maiyurnos ti sarungkar ken malawagan dagiti sumaruno a parapo. Pagreggeten ti bumalay a basaenna dagitoy sakbay iti sarungkaryo.
3 Wenno mabalinyo a kunaen iti kaasping daytoy:
◼ “Iti daydi napalabas a panagsaotayo, nakaibatiak iti tract a napauluan iti Daytoy Kadi a Lubong Makalasatto? Iti daydi a tiempo nabasatayo iti sasao ni Jesus idiay Juan 17:3. [Mabasa.] Idinto ta nasken a maadal maipapan iti Dios ken ni Jesus no kayattayo ti agbiag iti agnanayon, maiparbeng ngarud a gun-oden dayta a pannakaammo. Idi adda ni Jesus ditoy daga, insarmingna dagiti adu a nakaskasdaaw a kalidad ti Dios. No ngarud ta ad-adu ti maadaltayo maipapan ken Jesus ken iti ministeriona, ad-adu met ti maammuantayo maipapan ken Amana. Timudenyo no ania ti makuna daytoy a libro, Ti Katan-okan a Tao a Nagbiag Pay Laeng.” Basaen ti umuna ken maikadua a parapo iti maikasangapulo a panid iti kapitulo 116. Itudo ti titulo dagiti kapitulo, ilustrasion, ken ti mapa idiay rugi iti libro. Kalpasanna maitukon ti libro, wenno no ti bumalay ket addaanen iti dayta, maiyurnos ti sarungkar tapno maitultuloy ti diskusion.
4 Kalpasan a makablaawan ti bumalay a nangawat iti “Katan-okan a Tao” a libro, mabalintayo a kunaen:
◼ “Kas nakunak iti napalabas a bisitak, ti Katan-okan a Tao a libro ket nadisenio a maipaay iti panagadal ti Biblia. Kayatko nga idemostra kadakayo iti ababa no kasano ti kasayaatan a pannakausarna.” Luktan ti libro iti kapitulo 1, “Dagiti Mensahe Manipud Langit.” Basaen ti umuna a saludsod, kalpasanna mausig dagiti panglukat a parapo. Iturong idiay ilustrasion iti maikadua a panid. Malawagan dagiti natda a saludsod, ken mailawlawag dagiti sungbat kas ipalubos ti tiempo. Sakbay a maingudo ti sarungkar, maiyurnos iti panagsubli tapno maitultuloy ti saritaan.
5 No salimetmetan iti positibo a kapanunotan, agsagana a naimbag, ken gundawayan ti kada oportunidad, makabalantayo a mangirugi iti panagadal ti Biblia bayat ti Enero.