Pabilgen ti Interes Babaen iti Epektibo a Panagsarungkar
1 Ti tunggal naimbag iti pannakaisaganana a palawag saklawenna ti makaallukoy iti interes nga introduksion, makaisuro a bagi, ken makatignay a konklusion. Ti introduksion isut’ mangawis ti asikaso dagiti timmabuno, ngem no awan iti bagi ken konklusion, ti palawag ket saan a kompleto. Isu met laeng a prinsipio ti agaplikar iti ministeriotayo. Naimbag a banag no mariing iti interes ti bumalay babaen iti umuna a sarungkar, ngem masapul a pabilgen dayta umuna nga interes babaen ti epektibo a panagsarungkar.
2 Apay a palubosan ti Dios iti panagsagaba: Dikay kadi kumanunong a daytoy a suheto ket adda iti panunot dagiti adu a tattao ita? Dayta ti gapuna a nasayaat no mapatanor daytoy a saludsod iti ngudo ti umuna a sarungkar nga adda iti panunot a sungbatan daytoy inton agsarungkarkayo.
3 Mabalin a kunaenyo daytoy:
◼ “Hello. Idi napalabas a panagsaotayo, ti suheto maipapan iti panangipalubos ti Dios iti panagsagaba isut’ timmaud, ket inkarik nga agsubliak kadakayo agraman ti impormasion. Adu a tattao ti makarikna a no pudno a maseknan iti Dios kadatayo, masapul koma a panungpalenna ti panagsagaba. Nalabit a kasta met ti mariknayo. [Palubosan ti bumalay a sumungbat.] Ipasigurado kadatayo iti Biblia a ti Dios ket pudno a maseknan. [Basaen ti 1 Juan 4:8.] Adda naimbag a rason ti Dios a nangipalubos iti panagsagaba nga agtultuloy agingga ita. Maysa kadagita a rason ti nailawlawag iti 2 Pedro 3:9. [Mabasa.] Dagiti dadduma a rason ti naibinsabinsa iti daytoy a broshur.” Iti dayta maiturong iti pinanid 12-14 idiay broshur a Pudno Aya a Maseknan ti Dios Kadatayo? ket lawagan ti punto a makapainteres.
4 Bayat a pagnguduenyo ti diskusion, patanorenyo iti sabali pay a saludsod ken ibaga iti bumalay a ragsakenyo manen nga ited ti makainteres a sungbat inton sumarungkarkayo kenkuana. Adu a tattao iti mayat a mangammo no ania ti mapasamak iti maysa a tao inton matay. Apay a dikay iyurnos a pagsaritaan dayta a topiko iti kombeniente a tiempo?
5 Makatulong kadakayo no adda iti panunotyo dagiti tallo a kangrunaan a prinsipio. Kinabagay. Nalabit a ti bumalay ket saan a nairuam iti naituding a masinnunuo a tiempo a maipaay iti diskusion ti Biblia. Kinaababa. Dikay unay agbayag wenno mangwanas ti adu unay a puntos iti damo. Iti kaaduan a kaso, mas paborable ti panangawatda iti sarungkaryo no kobrian laeng ti sumagmamano a puntos iti ababa a tiempo. Kinabara ken kinagayyem. Ipakita iti bumalay nga interesadokayo a mismo kenkuana.
6 Ti madagdagus a kalattayo isu ti pannakisao iti bumalay ti Nainkasuratan. Sa kayattayo a mairugi iti nabunga a panagadal ti Biblia iti pagtaengan babaen ti maitutop a publikasion, kas iti Agbiag nga Agnanayon a libro. Dayta a rag-o ti matagikuayo no anusanyo a pabilgen ti immuna nga interes babaen iti epektibo a panagsarungkar.