“Isursuroyo . . . Dagiti Bambanag nga Imbilinko Kadakayo”
1 Ti panagaramid iti disipulo ket saklawenna ti panangisuro. Sakbay a ti maysa a tao ket agbalin a disipulo ni Kristo, masapul a masuruan pay nga umuna a “mangtungpal iti amin a bambanag” nga imbilin ni Jesus. (Mat. 28:19, 20) Ti kasayaatan a wagas a mangibanag iti daytoy isut’ babaen ti panagadal ti Biblia iti pagtaengan.
2 Dagiti panagadal ti Biblia ket saan a kanayon a nalaka a mairugi, ngem saantayo koma a mapaay. Ti balligi a mangirugi kadagiti panagadal iti Biblia ket kasapulanna ti determinasion ken napinget a tarigagay a mangimula iti kinapudno kadagiti sabsabali.—Gal. 6:9.
3 Panangpataud ti Interes: Iti umuna nga ipapanyo, agpannuray iti kasasaad, ti maysa a tract, broshur, wenno magasina ket mabalin a maibati iti bumalay. Mabalin a mausaryo ti maysa kadagitoy a pangirugi iti panagadal ti Biblia iti pagtaengan. No ipakita ti bumalay iti kanayonan nga interes maipapan ti mensahe, mabalin a maiturong iti sabali a maitutop a publikasion inton sumaganad a bisita.
4 Ti panagsagana isut’ tulbek iti balligi. Apay a dikay pilien a nasakbay iti maysa a teksto ti Kasuratan a nakotar iti tract, broshur, wenno magasina a planoyo nga usaren inton bumisitakayo? Iti kasta a wagas nalakayo nga isilpo iti komentoyo manipud ti publikasion iti diskusionyo. Nalabit a mabaelanyo pay a basaen iti maysa wenno dua a parapo a diretso manipud ti publikasion.
5 Mabalinyo a kunaen:
◼ “Kayatmi a mairanud iti impormasion maipapan ti naisangsangayan a padto a madaman a matungtungpal ita.” Basaen ti Mateo 24:3, kalpasanna maisilpo iti ladawan ken komento idiay panid 24 ti “Adtoy!” a broshur. Ti umasping nga idudupag isut’ mausar no idatagyo ti tract a Daytoy Kadi a Lubong Makalasatto?
6 Apaman a maipakita ti napudno nga interes, masapul a masaruno a madagdagus. Ikagumaanyo a sarungkaran iti las-ud ti maysa a lawas tapno ti naudi a saritaan ket presko pay laeng iti panunot ti bumalay. Kada tiempo iti sarungkaryo, usigenyo ti sumagmamano a parapo manipud iti publikasion a naibatiyo. Kalpasanna, iti maitutop a tiempo, iyammoyo ti Agbiag nga Agnanayon a libro, nga itultuloyyo iti isu met laeng a wagas.
7 Kadagitoy nga aldaw nawadwad pay laeng a trabaho ti aramiden iti dakkel a panagani kas impadto ni Jesus. (Mat. 9:37, 38) Bayat nga itultuloytayo nga isuro dagiti nasingpet iti pusoda a tattao, adda kadatayo ti makapabileg a panangipanamnama ni Jesus nga ‘adda kadatayo iti amin nga al-aldaw agingga ti panagngudo iti sistema dagiti bambanag.’