No Kasano nga Usaren ti Naimbag a Damag Manipud iti Dios!
Baro a Broshur a Nadisenio a Tumulong Kadatayo iti Panagsarungkar ken Panangirugi Kadagiti Panangyadal iti Biblia
1. Ania ti baro a broshur a nairuar iti “Saluadam ta Pusom!” a Kombension Distrito a nairanta a tumulong kadatayo nga agsarungkar ken mangirugi kadagiti panangyadal iti Biblia?
1 Bayat ti “Saluadam ta Pusom!” a Kombension Distrito, naragsakantayo nga immawat iti baro a broshur a tumulong kadatayo nga agsarungkar ken mangirugi kadagiti panangyadal iti Biblia. Ti Naimbag a Damag Manipud iti Dios! ket kas met laeng iti sinuktanna a broshur a Kalikaguman, nga addaan kadagiti ababa a leksion. Dayta ti tumulong kadatayo a mangusar iti broshur a mangirugi kadagiti panangyadal iti Biblia iti ruangan. Daytoy a baro a broshur ket naipamaysa iti naimbag a damag a masarakan iti Biblia, saan a kas iti broshur a Kalikaguman, a mangilawlawag kadagiti kualipikasion iti panagbalin a Kristiano, ngem mabalin a narigat nga awaten dagiti kabbaro a yad-adalan.—Ara. 15:35.
2. Apay a naaramid ti broshur a Naimbag a Damag?
2 Apay a naaramid daytoy? Kidkiddawen dagiti kakabsat iti intero a lubong ti maaddaan iti simple nga alikamen a mangatrakar kadagiti tattao a mangawat iti kinapudno a mangiturong iti panangadal iti libro nga Isursuro ti Biblia, ti kangrunaan nga us-usarentayo a mangyadal. Dagiti tattao a saan a mayat a mangadal iti libro ket masansan a sidadaan nga agpayadal iti Biblia babaen ti broshur. Maysa pay, nalaklaka a maipatarus ti broshur iti adu a lengguahe.
3. Ania ti nakaidumaan daytoy a broshur kadagiti dadduma a publikasion nga us-usarentayo a mangyadal?
3 No Kasano a Nadisenio: Adu kadagiti publikasion nga us-usarentayo a mangyadal ket naisurat iti pamay-an a nalaka a basaen ken tapno matarusan dagiti tattao ti kinapudno, uray no awan ti mangisuro kadakuada. Naiduma daytoy a publikasion. Nadisenio daytoy kas giya iti panagadal iti Biblia nga adda mangisuro. Gapuna, no itukonyo daytoy, nasaysayaat no pagsaritaanyo ti maysa wenno dua a parapo. Ababa dagiti parapo isu a mabalinyo nga ilawlawag uray iti ruangan wenno iti lugar ti negosio. Nupay nasayaat nga irugi iti leksion 1, mabalintayo nga irugi ti panangyadal iti aniaman a leksion.
4. Kasano a makatulong kadatayo ti broshur a mangisuro a direkta manipud iti Biblia?
4 Iti adu kadagiti publikasiontayo, masarakan ti sungbat dagiti saludsod kadagiti parapo. Ngem iti daytoy a publikasion, kaaduanna a masarakan dagiti sungbat iti Biblia. Kaykayat ti kaaduan a tattao ti agadal manipud iti Biblia imbes a kadagiti literaturatayo. Gapuna, dandani awan ti nakotar kadagiti teksto a naaramat. Masapul a mabasa a mismo dagitoy iti Biblia. Daytoy ti tumulong kadagiti estudiante a mangbigbig a ti ad-adalenda ket naggapu iti Dios.—Isa. 54:13.
5. Apay a napateg nga agsagana a naimbag ti mangyad-adal iti tunggal panangyadalna?
5 Saan nga ilawlawag ti broshur ti amin a teksto. Apay? Nairanta daytoy a mangparegta iti mayad-adalan nga agsaludsod ken dayta ti mangilukat iti gundaway tapno mausar ti mangyad-adal ti abilidadna a mangisuro. Gapuna, napateg ti panagsagana a naimbag iti tunggal panagadal. Palagip: Saan koma a dakayo ti makaadu nga agsao. Kaay-ayotayo nga ilawlawag dagiti Kasuratan. Ngem masansan nga ad-adda nga agballigitayo no palubosantayo ti yad-adalantayo a mangyebkas iti kapanunotanna iti kasuratan. No sitataktika nga agusartayo kadagiti saludsod, matulongantayo ti yad-adalantayo a mangilawlawag a mismo iti tunggal teksto.—Ara. 17:2.
6. Kasanotayo nga usaren ti broshur (a) kadagiti tattao nga agduadua iti Dios ken iti Biblia? (b) iti panagbalaybalay? (c) a mangirugi kadagiti direkta a panangyadal iti Biblia? (d) iti panagsarungkar?
6 Kas kadagiti dadduma a publikasion a maus-usar iti panangyadal, mabalintayo nga itukon daytoy a broshur iti aniaman a gundaway, uray no sabali ti tukon iti dayta a bulan. Adu ti mangtagiragsak a mangusar iti daytoy a mangirugi iti direkta a panangyadal iti Biblia iti ruangan. Malaksid iti dayta, kas nadakamat iti kombension distrito, ti panangusar iti daytoy a broshur “talaga a pagbalinenna a makapagagar ti panagsarungkar” kadagiti interesado!—Kitaen ti kahon iti panid 5-7.
7. Kasanoyo nga ikondukta ti panagadal iti Biblia babaen ti broshur?
7 No Kasano nga Ikondukta ti Panagadal: Mabalintayo nga irugi ti saritaan babaen ti panangbasa kadagiti nanumeruan a saludsod a napuskol ti pannakaisuratna. Sumaganad, mabasa ti parapo ken dagiti teksto a nakaitaliko. Sitataktika nga agsaludsodtayo tapno matulongan ti bumalay a mangtarus iti kaipapanan ti teksto. Kalpasanna, sakbay nga umallatiwtayo iti sumaganad a seksion, kiddawentayo iti bumalay a sungbatanna ti saludsod a napuskol ti pannakaisuratna, tapno masiguradotayo no natarusanna dayta. Kadagiti damo nga isasarungkartayo, mabalin a nasaysayaat no maysa laeng kadagiti saludsod a napuskol ti pannakaisuratna ti maadal. Inton agangay, mabalintayo a yat-atiddog ti panagadal babaen ti panangsaklaw iti intero a leksion.
8. No mangibasatayo iti teksto, ania ti ibagatayo ken apay?
8 Kaaduanna a dagiti teksto a naikkan iti sao a “basaem” ti direkta a sungbat ti saludsod a napuskol ti pannakaisuratna. No mangibasatayo iti teksto, liklikantayo nga ibaga ti, “Insurat ni apostol Pablo” wenno, “Kitaenyo no ania ti impadto ni Jeremias” ta mabalin a panunoten ti bumalay a sao laeng ti tao ti basbasaentayo. Nasaysayaat no ibagatayo, “Kastoy ti kuna ti Sao ti Dios” wenno, “Kitaem ti impadto ti Biblia.”
9. Rumbeng kadi a basaen ti amin a naisitar a teksto bayat ti panangyadaltayo?
9 Rumbeng kadi a basaentayo ti amin a naisitar a teksto wenno dagiti laeng naikkan iti sao a “basaem”? Depende dayta iti kasasaad. Adda rason no apay a naikabil dagita a teksto. Naglaon ti tunggal maysa kadagita iti impormasion a maikari nga adalen. Ngem iti dadduma a kasasaad, no saan unay nga interesado ti bumalay, awan ti adu a panawenna, wenno nakapuy nga agbasa, mabalin a dagiti laeng teksto nga addaan iti sao a “basaem” ti mabasa.
10. Kaanotayo a yallatiw ti panagadal iti libro nga Isursuro ti Biblia?
10 No Kaano a Yallatiw iti Libro nga Isursuro ti Biblia ti Panagadal: No regularen ti panagadal, mabalintayon a yallatiw ti panagadal iti libro nga Isursuro ti Biblia wenno itultuloytayo ti broshur a Naimbag a Damag agingga a mairingpas dayta. Panunoten a naimbag dagiti agibumbunannag no kaanoda a yallatiw ti panagadal. No yallatiwtayo ti panagadal iti libro nga Isursuro ti Biblia, rumbeng kadi nga iti umuna a kapitulo ti pangrugiantayo? Awan ti masurot a paglintegan iti daytoy. Nagduduma ti tunggal tao. Nupay kasta, magunggonaan ti kaaduan nga estudiante no isurotayo ti ad-adu a detalye ti isu met laeng a topiko babaen ti libro nga Isursuro ti Biblia.
11. Apay nga usarentayo a naimbag daytoy a baro a broshur?
11 Iti lubong a manmano ti naimbag a damag, addaantayo iti naisangsangayan a pribilehio a mangiwaragawag iti kasayaatan a damag—nga agturturayen ti Pagarian ti Dios ken mabiiten a yegna ti baro a lubong a pagnaedan dagiti nalinteg! (Mat. 24:14; 2 Ped. 3:13) Manamnamatayo a ti adu kadagiti makangngeg iti daytoy a mensahe ket umanamong iti daytoy a naipaltiing a sasao: “Anian a nagimnas iti rabaw dagiti bantay ti saksaka daydiay mangip-ipan iti naimbag a damag, daydiay mangipabpablaak iti talna, daydiay mangyeg iti naimbag a damag ti maysa a banag a nasaysayaat, daydiay mangipabpablaak iti pannakaisalakan, daydiay agkunkuna iti Sion: ‘Ti Diosmo nagbalinen nga ari!’” (Isa. 52:7) Sapay koma ta usarentayo daytoy a baro a broshur a mangidanon iti naimbag a damag manipud iti Dios kadagiti tattao a mawaw iti kinapudno iti teritoriatayo!
[Kahon iti panid 5]
No Agduadua Dagiti Tattao Maipapan iti Dios ken iti Biblia:
● Iti dadduma a lugar, napaliiw dagiti agibumbunannag a saan a kayat ti bumalay ti makisarita no mangngegna ti sao a “Dios” ken “Biblia.” No kasta, mabalin a nasaysayaat no iti damo a pannakisaritatayo ket dagiti topiko a paginteresan dagiti tattao iti teritoriatayo ti dakamatentayo, kas iti nasaysayaat a gobierno, pakaalaan iti praktikal a tulong para kadagiti pamilia, ken no ania ti mapasamak iti masanguanan. Kalpasan ti sumagmamano nga isasarungkar, nalabit mabalintayo nga usaren ti broshur a Naimbag a Damag tapno ilawlawagtayo no kasano nga ammotayo nga adda Dios ken no apay a mapagtalkan ti Biblia.
[Kahon iti panid 6]
Iti Panagbalaybalay:
● “Simmarungkarkami gapu ta kayatmi nga ipakita kadakayo a nalaka laeng a maammuan no ania ti panggep ti Dios iti sangatauan iti masanguanan. Iti panagkunayo, pagpatinggaento ngata ti Dios ti panagsagaba? [Palubosanyo a sumungbat.] Ipakita daytoy a broshur no ania a teksto iti Biblia ti pakakitaan iti sungbat dayta a saludsod. [Ikkanyo iti broshur, sa basaenyo ti umuna a parapo iti leksion 1, kasta met ti Jeremias 29:11.] Sigun iti nabasatayo, umanamongkayo kadi a kayat ti Dios a maaddaantayo iti nasaysayaat a masanguanan? [Palubosanyo a sumungbat.] No kayatyo, kukuayo daytan. Inton sumaruno, pagsaritaantayto ti maikadua a parapo tapno maammuantayo ti sungbat ti Biblia iti daytoy a saludsod, ‘Kasano a pagpatinggaen ti Dios ti pakaigapuan ti panagsagaba dagiti tattao?’” No kasla nawaya ti bumalay iti damo a pannakisaritayo, mabalinyo a basaen ken pagsaritaan ti maikadua a parapo ken ti tallo a teksto iti Biblia. Ibagayo nga agsublikayto tapno pagsaritaanyo ti maikadua a saludsod iti dayta a leksion.
● “Adu a tattao ti agkarkararag, nangruna no adda problemada. Agkarkararagkayo kadi met no dadduma? [Palubosanyo a sumungbat.] Iti panagkunayo, denggen ngata ti Dios ti amin a kararag, wenno adda dagiti kararag a saan a makaay-ayo kenkuana? [Palubosanyo a sumungbat.] Adda intugotko a broshur a mangipakita iti sungbat ti Biblia kadagita a saludsod. [Ikkanyo iti kopia, ken usigenyo ti umuna a parapo iti leksion 12 ken ti teksto nga addaan iti sao a “basaem.”] Saan kadi a makaparagsak ta sidadaan ti Dios a dumngeg kadatayo? Ngem tapno naan-anay a magunggonaantayo iti kararag, masapul a maam-ammotayo a naimbag ti Dios. [Umallatiwkayo iti leksion 2 ken ipakitayo dagiti subtitulo.] No kayatyo, kukuayo daytan a broshur, ken agsubliakto iti sabali a gundaway tapno basaenta ti sungbat ti Biblia kadagita a makapainteres a saludsod.”
● “Simmarungkarkami gapu ta maseknan dagiti tattao no anianto ti mapasamak iti daytoy a lubong. Iti panagkunayo, sumayaatto ngata ti kasasaad? [Palubosanyo a sumungbat.] Masdaaw ti adu a tattao a makaammo a ti Biblia ket naglaon iti naimbag a damag a mangted iti namnama. Adtoy ti sumagmamano a saludsod a sungbatan ti Biblia.” Ikkanyo iti broshur, ken pagpilienyo iti saludsod iti makinlikud nga akkub a paginteresanna unay. Kalpasanna, pagsaritaanyo ti leksion, ken idemostrayo ti panagadal. Ibagayo nga agsublikayto tapno usigenyo ti sumaganad a saludsod iti dayta a leksion.
[Kahon iti panid 7]
Padasenyo ti Direkta a Pamay-an:
● “Simmarungkarkami ta kayatmi nga ibaga kadakayo ti maipapan iti baro a pamay-an ti panangadal iti Biblia. Addaan daytoy a broshur iti 15 a leksion ket ipakitana no sadino ti pakasarakan iti Bibliayo ti sungbat dagiti napateg a saludsod. [Ipakitayo ti makinsango ken makinlikud nga akkub.] Napadasanyo kadin nga inadal ti Biblia? [Palubosanyo a sumungbat.] Kayatko nga ipakita kadakayo no kasano kalaka nga adalen dagitoy a leksion. [Usigenyo ti umuna a parapo iti maikatlo a saludsod iti leksion 3, ken basaenyo ti Apocalipsis 21:4, 5. No maitutop, usigenyo ti sumaruno a parapo ken ti teksto a naikkan iti “basaem.”] No kayatyo, kukuayo daytan a broshur. Padasenyo nga adalen ti Biblia uray maminsan laeng. No magustuanyo, mabalinyo nga itultuloy. Inton sumaruno, usigentayto ti umuna a leksion uray ta maysa la a panid daytoy kas makitayo.”
[Kahon iti panid 7]
Usarenyo iti Panagsarungkar:
● No sarungkarantayo ti nangipakita iti interes, mabalintayo nga ibaga: “Maragsakanak a makakita manen kadakayo. Adda kayatko nga ited kadakayo a broshur a mangipakita iti sungbat ti Biblia kadagiti adu a makapainteres a saludsod. [Itedyo ti broshur, sa ibagayo a kitaenna ti makinlikud nga akkub.] Ania kadagita a topiko ti magustuanyo? [Palubosanyo a sumungbat. Kalpasanna, pagsaritaanyo ti leksion a pinilina.] Kayatko nga ipakita kadakayo no kasano nga usaren daytoy a broshur a mangkita iti sungbat ti Biblia.” Idemostrayo ti panagadal babaen ti panangusigyo iti maysa wenno dua a parapo ken ti teksto a naikkan iti “basaem.” Nakairugikayon iti panangyadal iti Biblia! Ibatiyo ti broshur iti bumalay, ken ibagayo nga agsublikayto. No maadalyo ti intero a leksion, mabalinyo a pagsaritaan ti sabali manen a leksion a pilien ti bumalay wenno mangrugikayo iti umuna a leksion ti broshur.