Agtutubo—Silalaing nga Iturong Dagiti Addangyo
1 Ti Amatayo, ni Jehova, personal nga interesado unay iti espiritual a progreso dagiti agtutubo a tattao. Babaen ti nainsiriban a panagimdeng iti naayat a bilbilinna, palubosan dagiti agtutubo ni Jehova a mangipaay iti nalaing a pannakaiturong iti addangda.—Prov. 16:9.
2 Ni Kristo Jesus ti nangituyang iti ehemplo bayat ti kinaagtutubona kas maysa a gimmun-od iti anamong nga agpadpada ti Dios ken iti tao. (Luc. 2:52) Idi agedad ti 12, nabigbig ni Jesus iti tarigagayna a makisao iti sabsabali maipapan ken Jehova. (Luc. 2:46, 47) Dagiti agtutubo ita ti makaipakita ti umasping a tarigagay a mangilawlawag iti pammatida kadagiti dadduma.—w90 7/1 pp. 29-30; w87 12/1 p. 21.
3 Ania ti maaramidyo ita nga agtutubo a “mangidayaw ken Jehova babaen kadagiti napateg a sanikuayo”? (Prov. 3:9) Apay a dikay paaduen ti oras a gagangay a mausaryo iti trabaho a panangasaba ken panangisuro ti naimbag a damag, uray nalabit kas maysa nga auxiliary payunir? Daytoy ti mangted kadakayo ti oportunidad nga agtrabaho iti tay-ak ti serbisio a kadua dagiti adu iti bilangda a nagduduma nga agibumbunannag. Mabalin a mairugiyo a dagus itan babaen iti panangawisyo ti maysa wenno dua a nasanay nga agibumbunannag a kakuyogyo iti daytoy a ngudo ti lawas.
4 Maited dagiti nagannak ti naisangsangayan a pammaregta ken tulong kadagiti annakda babaen iti sesion ti panaginsayo a mainayon iti panangkadua kadakuada ti ministerio. Dagiti dadduma a nataengan iti kongregasion ti makaiyusuat nga agkiddaw kadagiti agtutubo a kumuyog kadakuada iti ruruangan a ministerio ken ti panagsarungkar ken panagadal iti Biblia a trabaho. Ti nadekket nga asosasion kadagiti kakastoy a nataengan nga agibumbunannag ti mangpabileg iti agtutubo a tumulong kadakuada nga “agtuloy iti kinamataengan.”—Heb. 6:1.
5 Dakayo aya nga agtutubo ket naan-anay ti panagsaganayo iti nakatudinganyo a pribilehio nga ited bayat ti Teokratiko a Pagadalan iti Ministerio? Adda kadi regular nga iskediolyo nga agbasa ken personal a panagadal agraman panagmennamenna? Agsaganakayo aya a naimbag kadagiti gimong tapno naan-anay a maawatanyo ti material ken nakasaganakayo a mangitukon iti komento? Inotaryo kadi dagiti makatulong a puntos a naiyebkas bayat dagiti gimong ken padasenyo nga usaren dagiti naisingasing a naituyang idiay Ti Ministeriotayo iti Pagarian?
6 Dikay koma palabsen dagiti gundaway a makiraman nga agdalus ti Kingdom Hall ken bumadang kadagiti nataengan ken baldado a kakabsat a lallaki ken babbai iti trabahoda wenno aniaman a sabali a praktikal a wagas. Dikay koma liwayan ti bukodyo a panagkontribusion a tumulong iti pannakataripato ti gastos iti Kingdom Hall ken ti sangalubongan a trabaho iti Sosiedad.
7 No ‘agaluadtayo a maiyannurot ti sao ni Jehova’ ken palubosan nga iwardasna dagiti addangtayo, iturongnatayo iti ragsak ken naparang-ay a pribilehio ti serbisio.—Sal. 119:9.